Author: راجہ محسن اعجاز

پنجاب اور خیبر پختونخوا میں صوبائی اسمبلیوں کے انتخابات کے کیس میں الیکشن کمیشن حکام نے فنڈز سے متعلق پیش رفت رپورٹ سپریم کورٹ میں جمع کرا دی ہے۔

اے آر وائی نیوز کے مطابق پنجاب اور خیبر پختونخوا میں صوبائی اسمبلیوں کے انتخابات کے کیس میں الیکشن کمیشن حکام نے فنڈز سے متعلق پیش رفت رپورٹ سپریم کورٹ میں جمع کرا دی ہے جس میں عدالت عظمیٰ کو انتخابات کے لیے فنڈز نہ ملنے سے آگاہ کیا گیا ہے۔

ذرائع کے مطابق الیکشن کمیشن کی جانب سے عدالت عظمیٰ میں جمع کرائی گئی رپورٹ میں کہا گیا ہے کہ سپریم کورٹ کے حکم پر اسٹیٹ بینک کی طرف سے الیکشن کمیشن کو رقم ٹرانسفر نہیں کی گئی۔

واضح رہے کہ سپریم کورٹ نے الیکشن کمیشن کو 18 اپریل تک فنڈز کے حوالے سے رپورٹ جمع کرانے کا حکم دے رکھا تھا۔

اس سے قبل انٹیلی جنس ایجنسیز کے اعلیٰ حکام نے سپریم کورٹ میں الیکشن کیس کی سماعت کرنے والے تین رکنی بینچ کو سیکیورٹی پر چیف جسٹس کے چیمبر میں بریفنگ دی۔ بریفنگ میں چیف جسٹس عمرعطا بندیال، جسٹس اعجازالاحسن اور جسٹس منیب اختر موجود تھے۔

پنجاب اور خیبر پختونخوا کے انتخابات کیس میں انٹیلی جنس ایجنسیز کے اعلیٰ حکام کی سپریم کورٹ آئے اور چیمبر میں ججز کو سیکیورٹی صورتحال پر بریفنگ دی۔

اے آر وائی نیوز کو ذرائع سے ملنے والی اطلاعات کے مطابق انٹیلی جنس ایجنسیز کے اعلیٰ حکام نے سپریم کورٹ میں الیکشن کیس کی سماعت کرنے والے تین رکنی بینچ کو سیکیورٹی پر چیف جسٹس کے چیمبر میں بریفنگ دی۔ بریفنگ میں چیف جسٹس عمرعطابندیال، جسٹس اعجازالاحسن اور جسٹس منیب اختر موجود تھے۔

ذرائع کا کہنا ہے کہ چیف جسٹس کے چیمبر میں انٹیلیجنس حکام اور ججز کے درمیان ملاقات ڈھائی گھنٹے سے زائد جاری رہی اور اس ملاقات میں سیکریٹری دفاع بھی موجود تھے۔

واضح رہے کہ چیف جسٹس کی سربراہی میں جسٹس منیب اختر اور جسٹس اعجاز الاحسن پر مشتمل تین رکنی بینچ نے 4 اپریل کو الیکشن کمیشن آف پاکستان کی جانب سے پنجاب اسمبلی کے انتخابات ملتوی کرنے کے فیصلے کو "غیر آئینی” قرار دیتے ہوئے حکم دیا تھا کہ پنجاب میں 14 مئی کو انتخابات ہوں گے۔

عدالت عظمیٰ نے اسٹیٹ بینک کو 21ارب روپے جاری کرنے کے بھی احکامات دیے تھے اور 18 اپریل تک الیکشن کمیشن کو اس ضمن میں رپورٹ داخل کرنے کی بھی ہدایت دے رکھی ہے جب کہ وفاقی حکومت کو 17 اپریل تک انتخابات کے لیے سیکیورٹی اہلکاروں کی فراہمی کے حوالے سے تفصیلات جمع کرانے کا بھی حکم دیا تھا۔

سپرم کورٹ نے اسٹیٹ بینک کو پنجاب اور خیبرپختونخوا میں انتخابات کے لیے فنڈز جاری کرنے کا حکم دے دیا ہے۔

اے آر وائی نیوز کے مطابق پنجاب اور خیبر پختونخوا میں انتخابات کے لیے فنڈز فراہمی کیس کی سپریم کورٹ ان چیمبر سماعت ہوئی جس میں عدالت عظمیٰ نے فنڈز جاری نہ کرنے پر حکومت پر برہمی کا اظہار کیا اور ذرائع کے مطابق اسٹیٹ بینک کو انتخابات کے لیے فنڈز جاری کرنے کا حکم دیتے ہوئے کہا کہ 21 ارب روپے کے فنڈز الیکشن کمیشن کو جاری کیے جائیں۔

ذرائع کے مطابق سماعت کے موقع پر ججز نے واضح کیا کہ عدالت حکم پر عمل کرنا پڑے گا۔ اس موقع پر اٹارنی جنرل آف پاکستان منصور عثمان اعوان بھی پیش ہوئے جنہیں  عدالت میں پیش کیے گئے حکومتی موقف پر سخت سوالات کا سامنا کرنا پڑا۔ وفاقی حکومت نے اپنے تحریری جواب میں موقف اپنایا کہ حکومت نے عدالت احکامات پر عمل کر دیا ہے۔

حکومت کی جانب سے جمع کرائے گئے تحریری جواب میں کہا گیا کہ فیڈرل کنسولیڈیٹڈ فنڈ سے پیسے جاری کرنے کیلئے ایکٹ آف پارلیمنٹ کی ضرورت ہوتی ہے۔ یہ بل پارلیمان نے مسترد کر دیا۔ جس کے بعد وفاقی حکومت کے پاس فنڈز جاری کرنے کا اختیار نہیں۔

اٹارنی جنرل نے کہا کہ وفاقی حکومت اسٹیٹ بینک کو فنڈ جاری کرنے کا حکم نہیں دے سکتی۔ حکومت نےعدالتی حکم کے تحت اپنی قانونی ذمے داری پوری کر دی۔

سپریم کورٹ نے حکومت پاکستان کے موقف کا جائزہ لینے کے بعد اسٹیٹ بینک کو انتخابات کے لیے فنڈز جاری کرنے کا حکم دیا اور مرکزی بینک کو ہدایت کی الیکشن کمیشن کو پنجاب اور کے پی میں انتخابات کے لیے 21 ارب روپے کے فنڈز جاری کیے جائیں۔

واضح رہے کہ اس سے قبل قومی اسمبلی اور سینیٹ کی قائمہ کمیٹی برائے خزانہ انتخابات کے لیے الیکشن کمیشن کو فنڈز دینے کے بل مسترد کر چکی ہیں۔

اسلام آباد: سپریم کورٹ پریکٹس ایںڈ پروسیجر بل کیس کی سماعت کا تحریری حکم نامہ جاری کردیا گیا ہے۔

اے آر وائی نیوز کے مطابق عدالت نے سپریم کورٹ پریکٹس اینڈ پروسیجر بل پر عملدرآمد روک دیا ہے جبکہ اٹارنی جنرل، سپریم کورٹ بار اور پاکستان بار کونسل کو نوٹس جاری کردیے گئے ہیں۔

تحریری حکم نامے میں کہا گیا ہے کہ بظاہر مجوزہ قانون سے عدلیہ کی آزادی میں مداخلت کی گئی ہے، سپریم کورٹ پریکٹس اینڈ پروسیجر بل پر تاحکم ثانی عمل نہیں کیا جائے گا۔

عدالتی حکم نامے کے مطابق جس لمحہ مجوزہ قانون پر صدر دستخط کرے اس سے اگلے لمحے بل پر عمل نہیں کیا جاسکے گا۔

سپریم کورٹ کا حکم نامے میں کہا گیا ہے کہ سوال پیدا ہوتا ہے کیا موجودہ معاملے میں کوئی عبوری حکم دینا مناسب ہوگا؟

حکم نامے میں کہا گیا ہے کہ ڈاکٹر مبشر حسن بنام فیڈریشن کیس میں فل کورٹ نے مشاہدہ کیا کہ عام طور پر کسی قانون کی دفعات کو معطل نہیں کیا جاسکتا۔

تحریری حکم نامے کے مطابق یہ عدالت صرف خاص حکم، فیصلہ یا کارروائی وغیرہ کو معطل کرسکتی ہے، اس کیس میں پیش کیے جانے والے حقائق اور حالات غیرمعمولی ہیں۔

سپریم کورٹ میں کیس کی سماعت دو مئی تک ملتوی کردی گئی ہے۔