Author: راجہ محسن اعجاز

اسلام آباد : سپریم کورٹ نے پنجاب اور کے پی الیکشن التوا کیس میں حکومتی اتحاد کے وکلا کو سننے سے انکار کردیا، چیف جسٹس نے کہا کہ حکومت عدالت کا بائیکاٹ نہیں کرسکتی ، بائیکاٹ کرنا ہے تو عدالتی کاروائی کا حصہ نہ بنیں۔

تفصیلات کے مطابق سپریم کورٹ میں پنجاب اور کے پی الیکشن التوا کیس کی سماعت ہوئی ، چیف جسٹس عطا عمر بندیال کی سربراہی تین رکنی بینچ نے سماعت کی۔

وکیل فاروق ایچ نائیک روسٹرم پر آئے اور کہا کہ کچھ گزارشات کرناچاہتاہوں، جس پر جسٹس منیب اختر کا کہنا تھا اخبارات تو کچھ اور کہہ رہےہیں۔

چیف جسٹس نے استفسار کیا کہ کیاآپ نےبائیکاٹ ختم کردیا ہے، جس پر فاروق ایچ نائیک نے جواب دیا کہ میں نے بائیکاٹ نہیں کیا تو چیف جسٹس نے سوال کیا کہ پھرکس نے بائیکاٹ کیا ہے، وکیل نے کہا مجھے نہیں پتا کہ کس نے بائیکاٹ کیا ہے۔

چیف جسٹس نے فاروق ایچ نائیک سے مکالمے میں کہا کیا آپ کارروائی کا حصہ بننا چاہتے ہیں تو فاروق ایچ نائیک کا کہنا تھا کہ جی کارروائی کا حصہ ہیں، ہم نے تو بائیکاٹ کیا ہی نہیں تھا۔

چیف جسٹس نے ریمارکس دئیے کہ اخبار میں تو کچھ اور لکھا تھا جبکہ جسٹس منیب اخترکا کہنا تھا کہ آپ ایک طرف بینچ پر اعتراض کرتے ہیں، دوسری طرف کارروائی کا حصہ بھی بنتے ہیں ، حکومتی اتحاد اجلاس کا اعلامیہ پڑھ کر سنائیں،جوزباں اس میں استعمال کی گئی۔

دوران سماعت وکیل کامران مرتضیٰ نے کہا کہ ہمارے تحفظات بینچ پر ہیں، وکیل فاروق ایچ نائیک کا کہنا تھا کہ درخواستوں کےقابل سماعت ہونے پر تحفظات ہیں، بینچ کے دائرہ اختیار پر بھی تحفظات ہیں۔

جسٹس منیب اختر کا کہنا تھا کہ 48گھنٹے سے میڈیا کہہ رہا ہے اعلامیہ کے مطابق سیاسی جماعتیں بینچ پرعدم اعتماد کر رہی ہیں، ہم پر اعتماد نہیں ہے تو دلائل کیسے دے سکتے ہیں، اگر اعلامیہ واپس لیا ہے تو آپ کو سن لیتے ہیں۔

سپریم کورٹ نے حکومتی اتحاد کے وکلا کو سننے سے انکار کردیا ، چیف جسٹس نے ریمارکس دیئے بائیکاٹ کرنا ہے تو عدالتی کاروائی کا حصہ نہ بنیں، بائیکاٹ نہیں کیا تو لکھ کر دیں۔

وکیل اکرم شیخ نے کہا کہ وکلالت نامہ واپس لینے تک وکیل دلائل دے سکتے ہیں، جس پر جسٹس اعجاز الاحسن کا کہنا تھا کہ وکلالت نامہ دینے والوں نے ہی عدم اعتماد کیا ہے تو وکیل نے مزید کہنا تھا کہ وکلا کا عدالت آنا ہی اعتماد ظاہر کرتا ہے۔

چیف جسٹس نے اٹارنی جنرل سے استفسار کیا اٹارنی جنرل صاحب آپ کو کیا ہدایت ملی ہیں، حکومت عدالت کا بائیکاٹ نہیں کرسکتی ، جس پراٹارنی جنرل نے بتایا کہ حکومت بائیکاٹ نہیں کرسکتی ، حکومت آئین کے مطابق چلتی ہے تو چیف جسٹس نے کہا کہ سنجیدہ اٹارنی جنرل سے ایسی ہی توقع تھی۔

بینچ نے ریمارکس دیئے کہ کیس آپ نے بائیکاٹ کا فیصلہ واپس لےلیا ؟ کیا آپ نے بائیکاٹ والا اعلامیہ واپس لے لیا ؟ ایک طرف بائیکاٹ دوسری طرف کارروائی کا حصہ بھی،ایسا نہیں ہوتا۔

چیف جسٹس نے بائیکاٹ کرنیوالی جماعتوں کے وکلاکو ہدایت کی کہ آپ بیٹھ جائیں۔

اسلام آباد : وفاقی حکومت نے پنجاب اور کے پی الیکشن التوا کیس کی سماعت کرنیوالے سپریم کورٹ کے موجودہ بینچ پر اعتراض کردیا۔

تفصیلات کے مطابق سپریم کورٹ میں پنجاب اور کے پی الیکشن التوا کیخلاف کیس کی سماعت کچھ دیر میں ہوگی ، وفاقی حکومت نے سپریم کورٹ میں اپنا مؤقف تحریری طور پر جمع کروا دیا۔

جس میں وفاقی حکومت نے کیس کی سماعت کرنیوالےسپریم کورٹ کے موجودہ بینچ پر اعتراض کردیا ہے۔

اس سے قبل تحریک انصاف کے رہنما فوادچوہدری چیف جسٹس کی عدالت میں پیش ہوئے اور کہا کہ ریڈ زون کےداخلی راستےسیل کردیےگئےہیں، لگتاہےہم غزہ میں ہیں، وکلاکوبھی آنےسےروکاجارہاہے، ریڈزون کےداخلی راستوں پرجھگڑےہورہےہیں۔

چیف جسٹس نےفواد چوہدری کی ریڈ زون کے داخلی راستے کھلوانے کی استدعامستردکردی اور کہا انتظامیہ سیکورٹی انتظامات کے پیش نظر روک رہی ہوگی، ہم ابھی کیس کی سماعت کررہےہیں فیصلہ نہیں آیا۔

خیال رہے سپریم کورٹ نے آج پنجاب ، کے پی الیکشن التوا کیس میں دیگر فریقین کے ساتھ سیکریٹری خزانہ اور سیکریٹری دفاع کو پیش ہونے کا حکم دے رکھا ہے۔

پی ٹی آئی کے وکیل بیرسٹرعلی ظفر اور الیکشن کمیشن کے وکیل دلائل مکمل کرچکے ہیں۔۔آج اٹارنی جنرل، نگراں حکومت پنجاب اور گورنر کے پی کے وکلاء دلائل دیں گے۔

کیس میں پیپلز پارٹی، مسلم لیگ (ن) اور جے یو آئی نے بھی فریق بننے اور 3ججزکے بجائے فل کورٹ کی استدعا کر رکھی ہے۔

واضح رہے اتحادی جماعتوں نے سپریم کورٹ کے تین رکنی بینچ پرعدم اعتماد کااظہارکرتے ہوئے کہا تھا کہ تین رکنی بینچ پراعتماد نہیں ہے،چیف جسٹس سمیت تین رکنی بینچ کےدیگرجج صاحبان مقدمے سے دستبردار ہو جائیں۔

اسلام آباد : سپریم کورٹ میں پنجاب اور خیبرپختونخوا میں الیکشن التوا کیس کی سماعت آج پھر ہوگی، سیکرٹری خزانہ اور سیکرٹری دفاع آج عدالت میں پیش ہوں گے۔

تفصیلات کے مطابق پنجاب اور خیبرپختونخوا میں زیرالتوا انتخابات سے متعلق کیس کی سماعت سپریم کورٹ میں صبح آج ساڑھے گیارہ بجے ہوگی، عدالت نے سیکریٹری خزانہ اور سیکریٹری دفاع کو پیش ہونے کا حکم دے رکھا ہے۔

چیف جسٹس پاکستان عمر عطاء بندیال، جسٹس اعجاز الاحسن اور جسٹس منیب اختر پر مشتمل تین رکنی خصوصی بنچ سماعت کرے گا۔

پی ٹی آئی کے وکیل بیرسٹرعلی ظفر اور الیکشن کمیشن کے وکیل کے دلائل مکمل ہوچکے ہیں۔۔ آج اٹارنی جنرل، نگران حکومت پنجاب اور گورنر کے پی کے وکلاء دلائل دیں گے۔

کیس میں پیپلز پارٹی، مسلم لیگ (ن) اور جے یو آئی نے بھی فریق بننے اور 3ججزکے بجائے فل کورٹ کی استدعا کر رکھی ہے۔

اس موقع پر سپریم کورٹ کےباہرسیکیورٹی کے انتہائی سخت انتظامات کئے گئے ہیں، ترجمان اسلام آباد کیپیٹل پولیس کا کہنا ہے کہ سپریم کورٹ میں آج وہی افراد داخل ہوسکیں گے، جن کے مقدمات ہیں۔

ترجمان نے بتایا کہ جن افراد کے پاس سپریم کورٹ انتظامیہ کا اجازت نامہ ہوگا وہ داخل ہوسکیں گے، قانون کا احترام سب پر لازم ہے، اس کا نفاذ برابری کی سطح پر کیا جائے گا ، ریڈ زون میں تعینات پولیس اور دیگر اداروں کے ساتھ تعاون کریں۔

یاد رہے31 مارچ کو پنجاب اورخیبرپختونخوا میں الیکشن التوا کیس کی سماعت کرنے والا سپریم کورٹ کا بینچ ٹوٹ گیا تھا ، جسٹس جمال خان مندوخیل بینچ سےعلیحدہ ہوگئے اور کل کے حکم نامے سے اختلاف کرتے ہوئے کہا تھا کہ سماعت کا حکم نامہ عدالت میں نہ تو لکھوایا گیا نہ مجھ سےمشاورت کی گئی۔

بعد ازاں سپریم کورٹ میں چیف جسٹس عمر عطا بندیال کی سربراہی میں تین رکنی بنچ نے پنجاب اور خیبر پختونخوا میں انتخابات ملتوی کرنے سے متعلق کیس کی سماعت کی تھی۔

سپریم کورٹ نے اٹارنی جنرل کی فل کورٹ بنانے کی درخواست فی الحال مسترد کر دی تھی، جس کے بعد اتحادی جماعتوں نے سپریم کورٹ کے تین رکنی بینچ پرعدم اعتماد کااظہارکرتے ہوئے کہا تھا کہ تین رکنی بینچ پراعتماد نہیں ہے،چیف جسٹس سمیت تین رکنی بینچ کےدیگرجج صاحبان مقدمے سے دستبردار ہو جائیں۔