اسلام آباد: وزیر اعظم نواز شریف افغانستان پر لندن کانفرس میں شرکت کیلئے لندن روانہ ہو گئے ہیں۔ کانفرس3 سے4 دسمبر لندن میں ہوگی۔
ترجمان دفتر خارجہ کے مطابق لندن کانفرس میں شرکت کی دعوت برطانوی وزیراعظم کی جانب سے دی گئی ہے اور لندن کانفرس افغانستان اور برطانیہ کی جانب سے منعقد کی جا رہی ہے۔
دفتر خارجہ کے ترجمان نے مزید بتایا ہے کہ وزیراعظم دورے کے دوران دو طرفہ تعلقات اور ورلڈ بنک کے حکام سے ملاقات کرینگے، نواز شریف دورے کے دروان جان کیری سے بھی ملاقات کرینگے۔
اسلام آباد: سپریم کورٹ نے اٹارنی جنرل کی یقین دہانی پرچیف الیکشن کمشنرکی تقرری کے لئے مہلت 8 دسمبر تک کی بڑھا دی گئی ہے۔
تفصیلات کے مطابق چیف الیکشن کمشنر کی تقرری سے متعلق کیس کی سماعت آج چیف جسٹس ناصرالملک کی سربراہی میں تین رکنی بینچ نے کی ہے۔
دوران سماعت اٹارنی جنرل نے اعلیٰ عدالت کو یقین دہانی کرائی کہ پانچ دسمبر تک عہدے پر تقرری ہوجائے گی، وقت دے دیں۔ انھوں نے پیشرفت سے آگاہ کرتے ہوئے سپریم کورٹ کو بتایا کہ پیر کے روز وزیراعظم اور قائد حزب اختلاف کے درمیان ملاقات ہوئی ہے اور سنجیدہ کوششیں کی جارہی ہیں، معاملہ اتفاق رائے کے قریب پہنچ گیا ہے۔
جس پر عدالت نے پیر تک وقت دیتے ہو ئے کہا کہ حکم پرعملدرآمد نہ ہوا تو کارروائی ہوگی۔
میرانشاہ: شمالی وزیرستان میں پاک افغان بارڈر کے قریب سیکیورٹی فورسز کی فضائی کارروائی میں طالبان کے اہم کمانڈر سمیت سترہ شدت پسند مارے گئے ہیں۔
تفصیلات کے مطابق شمالی وزیرستان میں پاک فوج کا شدت پسندوں کیخلاف آپریشن ضرب عضب کامیابی سے جاری ہے۔ سیکورٹی فورسز کی جانب سے جاری آپریشن میں اب تک سیکڑوں شدت پسند ہلاک اور زخمی ہوچکے ہیں۔ پاک فوج نے کئی علاقے دہشتگردوں سے خالی بھی کرا لئے ہیں۔
آئی ایس پی آر کے مطابق تازہ کارروائی میں پاک فضائیہ کے جیٹ طیاروں نے شمالی وزیرستان میں پاک افغان بارڈر کے قریب شدت پسندوں کے مرکز کو نشانہ بنایا ہے، جس میں شدت پسندوں کو بڑے جانی نقصان کا سامنا کرنا پڑا ہے۔
آئی ایس پی آر کے مطابق کارروائی میں ہلاک ہونے والوں میں شدت پسند ازبک کمانڈر اسد منصور محصود اورکمانڈر عمر بھی شامل ہیں جبکہ بمباری سے دہشتگردوں کی تین گاڑیاں بھی تباہ ہو گئی ہیں۔
ادھر پاک فوج کے آپریشن کے بعد شدت پسند فرار کا راستہ ڈھونڈ رہے ہیں اور دوسرے علاقوں میں جانے کی کوششیں بھی کر رہے ہیں۔
اسلام آباد: وفاقی تحقیقاتی ادارےایف آئی اے نے ملکی تاریخ میں پہلی بار سائبر کرائمز کے حوالے سے خصوصی سائبر کرائم الرٹ ایس ایم ایس سروس شروع کرنے کا فیصلہ کیا ہے۔
تفصیلات کے مطابق وفاقی تحقیقاتی ادارے ایف آئی اے نے ملکی تاریخ میں پہلی بار سائبر کرائمز کے حوالے سے خصوصی سائبر کرائم الرٹ ایس ایم ایس سروس شروع کرنے کا فیصلہ کیا ہے جس کا ملک بھر میں باقاعدہ آغاز کل سے ہو گا۔
سائبر کرائم ایس ایم ایس الرٹ سروس کا افتتاح کل ڈائریکٹر جنرل ایف آئی اے اکبر خان ہوتی کریں گے۔ ایف آئی اے ذرائع کے مطابق سائبر کرائم کے ذریعے متاثرہ شخص ویب سائٹ یا متعلقہ ادارے کی مکمل معلومات ایک ایس ایم ایس کے ذریعے سائبر کرائم الرٹ سروس کے نمبر پرکرے گا۔
ذرائع کا کہنا ہے کہ سروس سے سوشل میڈیا پر بلیک میلنگ اور دیگر جرائم کا جہاں خاتمہ ہوگا وہیں سائبر کرائم کے بڑے گروہ قانون کے شکنجے میں آئیں گے۔
کوئٹہ: کوئٹہ میں ایف سی، پولیس اور دیگر حساس اداروں کا مشرقی بائی پاس لیبر کالونی میں مشترکہ سرچ آپریشن، ایک مبینہ دہشت گرد ہلاک اور تین اے ٹی ایف اہلکار زخمی ہوگئے ہیں۔
پولیس کے مطابق خفیہ اطلاع ملنے پر ایف سی پولیس اور حساس اداروں نے لیبر کالونی میں سرچ آپریشن کیا اور اس دوران ایک مکان سے سیکورٹی ٹیم پر فائرنگ کی گئی، جس کی زد میں آکر اے ٹی ایف کے تین جوان زخمی ہوگئے ہیں۔
سیکورٹی اداروں نے جوابی کارروائی کی جس کے نتیجے میں ایک دہشتگرد ہلاک ہوگیا ہے، پولیس نے مکان سے پانچ دستی بم ایک ٹی ٹی پسٹل اور ایک کلاشنکوف بھی برآمد کرلی گئی ہے اور ہلاک دہشت گردی کی لاش اور زخمیوں کو سول ہسپتال پہنچایا گیا ہے۔
واقع کے بعد زخمی اہلکاروں کو سی ایم ایچ منتقل کیا گیا، جن کی حالت خطرے سے باہر بتائی جارہی ہے۔
پولیس کے مطابق ہلاک دہشتگرد غیر ملکی ہے اور شبہ ہے کہ وہ 26نومبر کو پولیو ٹیم پر حملے میں ملوث ملزمان میں سے ایک ہے۔
کراچی: کراچی میں فائرنگ کے مختلف واقعات میں دو افراد ہلاک دو زخمی ہو گئے جبکہ مبینہ پولیس مقابلے میں ایک ملزم زخمی حالت میں گرفتار کر لیا گیا ہے۔
ریسکیو ذرائع کے مطابق کراچی کے علاقے شاہ فیصل ٹائون میں نامعلوم افراد کی فائرنگ سے ایک شخص ہلاک ہوگیا جبکہ ایک زخمی ہو گیا۔ جاں بحق ہو نے والے فرد کی شنا خت نہیں ہو سکی جبکہ زخمی کو اسپتال منتقل کرکے طبی امداد فراہم کردی گئی ہے۔
ادھر اورنگی ٹائون میں نامعلوم افراد کی فائرنگ سے سہیل نامی دوکاندار جان کی بازی ہار گیا، واقع کی اطلاع ملتے ہی سہیل کے والد پر دل کا دورہ پڑگیا جو جاں لیوا ثابت ہوا۔ ملزمان فائرنگ کر تے ہو ئے موقع سے فرار ہو نے میں کامیاب ہو گئے۔ دوسری طرف جوہر موڑ کے قریب فائرنگ سے ایک شخص زخمی ہو گیا ہے۔
کراچی کے علاقے نیٹی جیٹی پل کےقریب مبینہ پولیس مقابلہ میں ایک ملزم کو زخمی حالت میں گرفتار کر لیا گیا ہے، ملزم کے قبضے سے اسلحہ اورچھینی گئی موٹرسائیکل بھی برآمد کر لی گئی ہے۔
لاہور: مسلم لیگ ق کے صدر چوہدری شجاعت حسین اورامیر جماعت اسلامی سراج الحق نے طاہرالقادری عیادت کی ہے، چوہدری شجاعت کہتے ہیں کہ بی۔سی پلان نہیں حکمرانوں کو پورا قاعدہ پڑھانا پڑسکتا ہے۔
مسلم لیگ قائداعظم کے صدر چوہدری شجاعت حسین اور امیر جماعت اسلامی سراج الحق نے گزشتہ روز ڈاکٹر طاہر القادری کی عیادت کی ہے۔
میڈیا سے گفتگو کرتے ہوئے چوہدری شجاعت حسین نے کہا کہ حکومت تنہا ہوچکی ہے اور اب شہباز شریف کو مستعفی ہونا پڑے گا۔ انھوں نے کہا کہ اگر حکمرانوں نے بی اور سی پلان کو سنجیدہ نہ لیا تو انہیں پورا قاعدہ پڑھانا پڑ سکتا ہے۔
اس موقع پر امیر جماعت اسلامی سراج الحق نے میڈیا سے گفتگو کرتے ہوئے کہا کہ حکومت اپوزیشن کے ساتھ مذاکرات میں سنجیدہ نہیں ہے اور ضرورت اب اس بات کی ہے کہ دونوں فریقین نقصان کے بغیر اپنے اپنے موقف میں لچک دکھاتے ہوئے مذاکرات کی میز پر واپس آجائیں۔
پاکستان عوامی تحریک کے سیکرٹری جنرل خرم نواز گنڈا پور نے حکومت کی جانب سے ڈاکٹر طاہرالقادری کو ائیر ایمبولینس فراہم کی جانے والی خبروں کی سختی سے تردید کرتے ہوئے کہا کہ ڈاکٹر طاہرالقادری کے معالج آج امریکہ سے پاکستان پہنچیں گے۔ انھوں نے مزید کہا کہ وہ اور ان کی جماعت حکومت سے کسی قسم کی رعایت نہیں لے گی۔
اسلام آباد/پشاور: الیکشن کمیشن نےخیبر پختونخواہ میں بلدیاتی انتخابات کوحتمی شکل دینے کافیصلہ کرلیا۔ صوبائی حکومت نےحلقہ بندیوں سے متعلق تفصیلات الیکشن کمیشن کوفراہم کر دیں ہیں۔
بلدیاتی انتخابات پرالیکشن کمیشن اورخیبرپختونخوا حکومت میں رابطے تیز ہوگئے ہیں۔ الیکشن کمیشن نےصوبےمیں بلدیاتی انتخابات کو حتمی شکل دینے کا فیصلہ کرلیا ہے۔
انتظامات اورتیاریوں سےمتعلق معاملات کاجائزہ لینے کیلئےالیکشن کمیشن کا اہم اجلاس آئندہ ہفتے ہوگا ذرائع کا کہنا ہے اجلاس میں بلدیاتی انتخابات کے شیڈول پرغور ہو گا اور انتخابات مارچ کے آخر یا اپریل کے آغاز پر ہوں گے جبکہ انتخابی شیڈول جنوری میں جاری کئے جانے کا امکان ہے۔
خیبر پختونخواہ حکومت نےحلقہ بندیوں اور قوانین کی تفصیلات الیکشن کمیشن کو فراہم کرتے ہوئے بائیو میٹرک سسٹم کو پشاور تک محدود کرنے کی تجویز دی ہے تاہم الیکشن کمیشن نے بائیومیٹرک سسٹم کے استعمال پر تاخیر کا خدشہ ظاہر کیا ہے۔
اسلام آباد: پیپلز پارٹی کے سنیئر رہنما خورشید شاہ کا کہنا ہے کہ حکومتی ترجمان کی جانب سے مزاکرات نہ کر نے کا بیان انتہائی غلط ہے ۔ مذاکرات کا سلسلہ جاری رہنا چاہیئے۔
اسلام آباد میں صحافیوں سے بات چیت کے دروان خورشید شاہ کا کہنا تھا کہ حکومت کو عمران خان سے مزاکرت کر نے پڑے گے۔ اگر حکومت مزاکرات نہیں کرے گی تو اپنے گڑھے کھودیں گی۔
انھوں نے مزید کہا کہ حکومت اور عمران خان دونوں ریاست کو نقصان پہنچا رہے ۔ خورشد شاہ کا مزید کہنا تھا کہ مزاکرات نہ کرنے کے بیان پر آج وزیراعظم سے بات کرونگا۔
سکھر: جمیعت علمائے اسلام کے امیر مولانا فضل الرحمن نے الزام عائد کیا ہے کہ انتخابات میں دھاندلی خیبر پختونخواہ میں ہوئی جہاں عمران خان کی حکومت ہے۔
سکھرمیں جے یو آئی کی مجلس عاملہ کےاجلاس کے بعد میڈیا سے گفتگو کرتے ہوئے انہوں نے کہا کہ عمران خان سولہ دسمبر کی تاریخ دہرانا چاہتے ہیں۔ مولانا فضل الرحمن کا کہنا تھا کہ خالد محمود کی شہادت کا واقعہ ہم سب کیلئے بڑا سانحہ ہے۔
مولانا فضل الرحمان نے کہا کہ اس وقت پوری دنیا میں جنگ امریکا کا ایجنڈا ہے۔ انھوں نے کہا کہ امریکا 21ویں صدی کو اپنی صدی کہتا ہے اور امریکا نے 2001سے مذہبی جماعتوں کو نشانہ بنا رکھا ہے۔
مولانا نے کہا کہ مجرموں کو پکڑنا حکومت کا کام ہے یا کہہ دیں کہ وہ بے بس ہیں اور انھوں نے کہا کہ جےیوآئی کا ہرکارکن مظلوم ہے اور احتجاج ہمارا حق ہے۔ انھوں نے مزید کہا کہ قانون کےدائرے میں رہتے ہوئے پرامن احتجاج پر یقین رکھتے ہیں۔
مولانا نے مزید کہا کہ مسئلہ پوری قوم کا ہے سب سے یکجہتی کی درخواست ہے۔ جے یو آئی کے رہنما کا کہنا تھا کہ موجودہ صورت حال اس لئے پیدا کی جارہی ہے کہ جمہوریت کی بساط کو لپیٹا جا سکے۔
،جے یو آئی کے رہنما کا کہنا تھا کہ 20 سے 40 لوگ دھماکوں میں مارے جاتے ہیں اور بلیک واٹر پاکستان میں دہشت گردی میں ملوث ہے۔ مولانانے کہا کہ ایک سفیر نےبلیک واٹر کے700ایجنٹس کو ویزے جاری کئے ہیں۔
مولانا فضل الرحمان کا کہنا تھا کہ صرف طالبان کو دہشتگرد قراردینے سے ریاستی ذمہ داری پوری نہیں ہوتی ہے۔