اٹھارہ ہزاری: پاک فضائیہ کا طیارہ اٹھارہ ہزاری کے قریب گر کر تباہ ہوگیا ہے جبکہ لڑاکا طیارے کا پائلٹ حادثے میں محفوظ رہا ہے۔
پاک فضائیہ کے ترجمان کے مطابق پاک فضائیہ کا لڑاکا طیارہ اٹھارہ ہزاری کے قریب گر کر تباہ ہوا ہے۔ لڑاکا طیارے کا پائلٹ حادثے میں محفوظ رہا ہے اور حادثے میں کوئی جانی نقصان نہیں ہوا۔
ترجمان کے مطابق طیارہ معمول کی پرواز کے دوران گر کر تباہ ہوا ہے۔ پاک فضائیہ کے ترجمان کا کہنا تھا کہ ایئرہیڈ کوارٹر میں حادثے کی تحقیقات کیلئے بورڈ تشکیل دے دیا گیا ہے۔
اسلام آباد: اسلام آباد سے گلگت کیلئے پرواز کرنے والی فلائٹ پی کے 607 حادثے سے بال بال بچ گئی، کپتان نے اسلام آباد ائیرپورٹ پر طیارے کو با حفاظت اُتار لیا ہے۔
تفصیلات کے مطابق پرواز کے دوران اے ٹی آر طیارے میں خرابی کی وجہ سے طیارہ ایک طرف ڈولنے لگا تھا، جس کے باعث اسلام آباد سے گلگت کیلئے پرواز کرنے والی فلائٹ پی کے 607 حادثے سے بال بال بچ گئی ہے۔
ترجمان پی آئی اے کے مطابق کپتان کی جانب سے فنی خرابی کی اطلاع پر طیارے کو اسلام آباد ایئرپورٹ پر ایمرجنسی لینڈنگ کرادیا گیا ہے۔ طیارہ کا تمام عملہ اور مسافر محفوظ ہیں اور ٹیکنکل عملہ نے طیارہ کا معائنہ کرکے فنی خرابی کو درست کردیا ہے۔
بعد ازاں پرواز روانہ کردی گئی۔
کراچی: نائیجریا سے آنے والے مسافر کو ایبولا وائرس کے شبے میں کراچی ایئرپورٹ پر محکمہ صحت کے حکام نے روک لیا ہے۔
تفصیلات کے مطابق مسافر محمد ہارون کو ایئرپورٹ پر موجود ڈاکٹروں نے چیک کیا اور اسے جناح اسپتال منتقل کردیا گیا۔ ایئرپورٹ حکام کے مطابق 45 سالہ محمد ہارون نائیجریا سے کراچی ایئرپورٹ پہنچے تھے جہاں انہین تیز بخار کے باعث ابتدائی معائنے کے بعد جناح اسپتال کے آئسولیشن وارڈ منتقل کردیا گیا ہے۔
ڈاکٹر سیمی جمالی کے مطابق حتمی طور پر ایبولا وائرس کے بارے میں ابھی کچھ نہیں کہا جاسکتا ہے، متاثرہ شخص کے ٹیسٹ کیے جائیں گے جس کے بعد حتمی رپورٹ سامنے آئے گی۔
انہوں نے بتایا کہ صوبہ سندھ سمیت ملک بھر میں ابیولا وائرس کا کوئی کیس رپورٹ نہیں ہوا ہے۔
کراچی: وزیراعظم نوازشریف نے دفاعی پیداوار میں پاکستانی ترقی کو قابل تحسین قراردیتے ہو ئے کہا ہے کہ خود مختاری کا تحفظ آزاد ملک کی اولین ترجیح ہوتی ہے۔
ایکسپو سینٹر کراچی میں ہونے والی’ہتھیار امن کےلئے‘دفاعی نمائش آئیدیادوہزار چودہ کا باقاعدہ افتتاح آج وزیر اعظم پاکستان نواز شریف نے کر دیا ہے۔ اس موقع پر نواز شریف کا کہنا تھا کہ میرےلئے دفاعی نمائش میں شرکت باعث فخرہے اور دفاعی پیداوار کے حوالے سے ملک نے قابل تحسین ترقی کی ہے۔
وزیراعظم نے کہا کہ دفاعی مصنوعات کی تیاری میں پاکستانی انجینئرز کا کردار اہم ہے اور خودمختاری کا تحفظ کسی بھی آزاد ملک کی اولین ترجیح ہوتی ہے۔ انھوں نے کہا کہ پاکستان کو اپنے محل وقوع سے دنیا میں خاص اہمیت حاصل ہے اور پاکستان کیلئے سیکیورٹی خطرات کئی گنا بڑھ چکے ہیں، جن میں پاکستان کو دہشت گردوں، نان اسٹیٹ ایکٹرز اور کمپیوٹرہیکرزسے خطرات لاحق ہیں۔
نواز شریف کا کہنا تھا کہ سلامتی کو درپیش چیلنجز سےنمٹنے کیلئے ریاست کو ہردم تیار رہنا ہوگا اور پاکستان کے پاس جدید ترین دفاعی نظام موجود ہے۔
انھوں نے کہا کہ نمائش نے ثابت کیا ہے کہ جدید دفاعی نظام صرف ترقی یافتہ ملکوں کااستحقاق نہیں ہے اور نمائش میں رکھی گئیں مصنوعات دفاعی پیداوار کی ترقی کا ثبوت ہیں۔ وزیراعظم نے کہا کہ نمائش میں دیگر ممالک کی شرکت مصنوعات کا کارآمد ہونا ثابت کرتی ہے۔
وزیراعظم نواز شریف نے کہا کہ قوم اور ملک کے دفاع کے لیے ہر ممکن وسائل فراہم کرنے پر تیار ہیں۔ انھوں نےمزید کہا کہ ہمارےبہادرجوان قبائلی علاقوں میں دہشتگردوں کیخلاف برسرپیکارہیں۔
لاہور: لاہور ہائیکورٹ نے سانحہ ماڈل ٹاؤن کی جوڈیشل انکوائری رپورٹ منظر عام پر لانے کیلئے درخواستوں کی سماعت کرتے ہوئے قرار دیا ہے کہ پنجاب حکومت اہم دستاویزات کی حفاظت نہیں کر سکتی، کیوں نہ سانحہ ماڈل ٹاؤن جوڈیشل انکوائری رپورٹ عدالتی ریکارڈ کا حصہ بنا دی جائے۔
لاہور ہائیکورٹ کے 3 رکنی بنچ نے سانحہ ماڈل ٹاؤن کی جوڈیشل انکوائری رپورٹ منظر عام پر لانے کیلئے درخواستوں کی سماعت کی ہے۔ درخواست گزاروں کے مطابق عوام کو معلومات تک رسائی کا آئینی حق حاصل ہے، رپورٹ منظر عام پر نہ لانا بنیادی حقوق اور آئین کی خلاف ورزی ہے۔
عدالت نے قرار دیا پنجاب حکومت کا یہ ریکارڈ رہا ہے کہ وہ اہم دستاویزات کی حفاظت نہیں کر سکتی، اس سے پہلے ڈاکٹر طاہرالقادری پر فائرنگ کی جوڈیشل انکوائری رپورٹ گم کی جا چکی ہے، کیوں نہ سانحہ ماڈل ٹاؤن کی جوڈیشل انکوائری رپورٹ عدالتی ریکارڈ کا حصہ بنا دی جائے۔
عدالت نے انکوائری ٹریبونل تشکیل دینے کے حوالے سے تمام ریکارڈ رجسٹرار ہائیکورٹ سے طلب کرتے ہوئے قرار دیا دیکھنا یہ ہے کہ کیا پنجاب حکومت ہائیکورٹ کے کسی جج کو بطور انکوائری ٹریبونل تعینات کر سکتی ہے۔ جس کے بعد عدالت نے سماعت 15 دسمبر تک ملتوی کر دی ہے۔
تھر پارکر: تھرپارکر میں بچوں کی ہلاکتوں کا سلسلہ نہ تھم سکا، آج بھی دو بچے زندگی کی بازی ہار گئے۔ غذائی قلت اور قحط نے ستر دنوں میں ایک سو سینتس بچوں کو موت کی نیند سلادیا ہے۔
تھر کے صحرا میں زندگی کا سفر مشکل ہوگیا ہے، ہر گرزتا دن ننھی کلیوں کو مرجھا رہا ہے۔ غذائی قلت روز کئی مائوں کی گود یں اجاڑرہی ہے۔ مگر کوئی پرسان حال نہیں ہے، حکمرانوں کے کانوں تک آواز بھی نہیں پہنچ پاتی اقدامات صرف دوروں اور زبانی دعوؤں تک محدود ہیں۔
آج بھی سول اسپتال مٹھی میں دو بچے دم توڑ گئے ہیں جبکہ کئی اب بھی زندگی اورموت کی کشمش میں مبتلاہیں۔ بھوک، پیاس، بیماری اور اب جاڑا، تھر واسیوں کی زندگی ہر گزرتے دن کےساتھ مشکل ہوتی جارہی ہے۔ بے بس لوگوں کے لیے نئی صبح زندگی کے بجائے موت کا پیغام لاتی ہے، حکومت کے وعدے اور دعوے سب دھرے کے دھرے رہ گئے ہیں۔
کراچی: ایکسپو سینٹر میں دفاعی نمائش اور وی وی آئی پی موومنٹ کے باعث کراچی کی بیشتر سڑکوں پر بدترین ٹریفک جام ہونے سے شہریوں کو پریشانی کا سامنا کرنا پڑ رہا ہے۔
کراچی ایکسپو سینٹر میں بین الاقوامی دفاعی نمائش آئیڈیاز دوہزار چودہ جاری ہے۔ نمائش میں تین سو تینتیس ملکی و بین الاقوامی کمپنیاں اور اٹھاسی بین الاقوامی وفود شرکت کررہے ہیں۔
نمائش کی وجہ سے سیکیورٹی کے سخت ترین انتظامات کیئے گئے ہیں۔ مین یونیورسٹی روڈ کو بیت المکرم مسجد سے حسن اسکوائر تک کنٹینرز رکھ کر بند کیا گیا ہے۔
یکم تا چار دسمبر تک نمائش کے دوران سر شاہ سلیمان روڈ، حسن اسکوائر سے اسٹیڈیم کراسنگ تک صبح آٹھ بجے سے شام چھ بجے تک عام ٹریفک کیلئے بند رہے گا۔ جس کی وجہ سےحسن اسکوائر، جیل روڈ، نیپا چورنگی اور گرومندرکے اطراف میں بدترین ٹریفک جام ہونے سےشہریوں کو شدید پریشانی کا سامنا کرنا پڑ رہا ہے۔
دفاعی نمائش میں عام شہریوں کا داخلہ ممنوع ہے تاہم اس نمائش سے سب سے زیادہ متاثر عام شہری ہی ہورہے ہیں۔ شاہراہ فیصل پر بھی ٹریفک کا دباؤ بڑھنے سے کئی مقامات پر ٹریفک جام ہے۔
کراچی: جئے سندھ قومی محاذ کی اپیل پر آج سندھ بھر کے چھوٹے بڑے شہروں میں مکمل شٹر ڈاون ہرتال جاری ہے۔
قوم پرست کارکنوں کو اغوا اور تشدزدہ لاشیں ملنے اورڈاکٹر خالد محمود سومرو کے قتل کیخلاف جئے سندھ قومی محاذ اور سندھ بچاؤ کمیٹی کی جانب سے دی گئی ہڑتال کی کال پر سندھ کے مختلف شہروں میں شٹرڈاؤن ہڑتال کی جارہی ہے۔
جسقم کی ہڑتال کے موقع پر نواب شاہ شہر کی اہم مارکیٹیں اور دیگر تجارتی مراکز مکمل طور پر بند ہیں۔ شہر میں وقفے وقفے سے رات بھر ہوائی فائرنگ اور ٹائر نذر آتش کئے جارہے ہیں۔ حیدرآباد میں بھی تمام تجارتی مراکز اور پیٹرول پمپ بند ہونے کے باعث شہریوں کعو شدید مشکلات کا سامنا ہے۔
شکارپو میں مختلف مقامات پر قوم پرست کارکنوں کی جانب سے احتجاجی مظاہرے جاری ہیں۔ جام شورو سمیت دیگر علاقوں میں ٹریفک نہ ہونے کے باعث سڑکیں ویرانی کا منظر پیش کررہی ہیں۔
کراچی/لاہور: وزیر اعظم نواز شریف کیجانب سے پیٹرولیم مصنوعات کی قیمتوں میں کمی کے بعد پیٹرول نایاب ہوگئیں۔ کراچی، لاہور سمیت کئی شہروں میں متعدد پمپس بند ہیں جبکہ لاہور میں پرانی قمیتوں پر فروخت پر پانچ پیٹرول پمپس بند کر دیئے گئے ہیں۔
کراچی اورلاہور سمیت ملک کے مختلف شہروں میں پیٹرول پمپ مالکان حکومت کیجانب سے قیمتوں میں کمی کے باوجود پرانی نرخوں پر پیٹرول فروخت کر رہے ہیں جبکہ کئی پیٹرول پمپ مالکان نے پٹرولیم مصنوعات کی قیمتوں میں کمی پر پیٹرول کی مصنوعی قلت پیدا کردی ہے۔
کہیں بجلی کی لوڈشیڈنگ اور کہیں سپلائی نہ ہونے کا بہانہ بنایا جارہا ہے۔ پیٹرول کی مصنوعی قلت کےباعث شہریوں کو شدید مشکلات کاسامناکرنا پڑ رہا ہے۔
لاہور میں ضلعی انتظامیہ نے پیٹرول مالکان کیجانب سے مصنوعی قلت پیدا کرنے اور نئی قیمتوں پر فروخت نہ کرنے پر پانچ پیٹرول پمپس سیل کر دئیے۔ ضلعی انتظامیہ کی ٹیموں نے ماڈل ٹاؤن میں پیٹرول پمپس کی چیکنگ کی ہے۔
کراچی میں کئی پیٹرول پمپس بند ہیں جبکہ بعض علاقوں میں پمپس پر شہریوں کی بڑی تعداد نظر آرہی ہیں۔
سڈنی: آسٹریلوی کرکٹر فلپ ہیوز کی ناگہانی موت نے دنیائے کرکٹ کر غم زدہ کردیا ہے۔ ننھے کرکٹرز نے بھی میچز سے پہلے آنجہانی کرکٹر کو خراج عقیدت پیش کیا۔
آسٹریلیا کے مختلف شہروں میں آنجہانی کرکٹر کو خراج عقیدت پیش کی جارہی ہے۔ کرکٹ میچ سے پہلے ننھے کرکٹرز نے آنجہانی کرکٹر کی یاد میں خاموشی اختیار کی۔ کھلاڑیوں کے چہرے قومی ہیرو کی اچانک موت پر افسردہ تھے۔
میچ میں ریٹائرمنٹ اسکور پچاس سے بڑھا کر فل ہیوز کی یاد میں تریسٹھ کردیا گیا تھا۔ ایڈیلیڈ کے اوول گراؤنڈ کے باہر بھی کرکٹر لورز اپنے پسندیدہ کھلاڑی کی تصاویر کے سامنے پھولوں کے گلدستے رکھ کر اور دنیا بھر میں کھلاڑی اور شائقین بیٹ اور کرکٹ کیپ کے زریعے جذبات کا اظہار کررہے ہیں۔