پی ایس ایل 8 کے کوالیفائر میں ملتان سلطانز نے لاہور قلندرز کو یکطرفہ مقابلے کے بعد 84 رنز سے ہرا دیا شاہین شاہ نے شکست کی ذمے داری ہوا پر ڈال دی۔

اے آر وائی نیوز کے مطابق ایچ بی ایل پاکستان سپر لیگ 8 میں گزشتہ روز کھیلے گئے کوالیفائر میں ملتان سلطانز نے یکطرفہ مقابلے کے بعد دفاعی چیمپئن لاہور قلندرز کو با آسانی 84 رنز کے بھاری مارجن سے شکست دی جس کے باعث سلطانز نے تیسری بار پی ایس ایل کے فائنل کے لیے کوالیفائی کرلیا۔

کوالیفائر میں یکطرفہ مقابلے میں بڑے مارجن سے میچ ہارنے اور بلے بازوں کے ڈھیر ہونے پر لاہور قلندرز کے کپتان شاہین شاہ نے موسم کو مورد الزام ٹھہرا دیا۔

شاہین آفریدی نے کہا کہ موسم ہمارے بلے بازوں کی بری پرفارمنس کی وجہ بنا۔ ملتان جب بولنگ کرنے میدان میں آئی تو ہوا چلنے لگی اور ہوا چلنے سے ٹریل کو مدد ملی تاہم یہی قدرت کا نظام ہے۔

واضح رہے کہ گزشتہ روز قذافی اسٹیڈیم میں کھیلے گئے پی ایس ایل 8 کے کوالیفائر میں ملتان سلطانز نے لاہور قلندرز کو جیت کے لیے 161 رنز کا ہدف دیا تھا۔ لاہور قلندرز کی رواں ایونٹ میں پرفارمنس بالخصوص ان فارم اوپنر فخر زمان کی موجودگی میں لگ رہا تھا کہ قلندرز میچ جیت جائیں گے۔

تاہم جب قلندرز کے بلے باز میدان میں اترے تو خزاں رسیدہ پتوں کی طرح وکٹیں گرنے سے تمام شائقین کرکٹ بالخصوص لاہور کے فینز شدید حیرت اور مایوسی کا شکار ہوئے۔ قلندرز کی پوری ٹیم 14.3 اوورز میں صرف 76 رنز پر ڈھیر ہوگئی۔

اس بری شکست کے باوجود لاہور قلندرز کے فینز کو مایوس ہونے کی ضرورت نہیں کیونکہ ان کی ٹیم کو فائنل میں پہنچنے اور اپنے اعزاز کا دفاع کرنے کا ایک اور موقع کل ملے گا لیکن اس کے لیے اسے آج کے پہلے ایلیمنیٹر کی فاتح ٹیم کی دیوار کو گرانا ہوگا۔

ایچ بی ایل پاکستان سپر لیگ 8 کے گروپ اسٹیج میں ایسے ریکارڈ بھی بنے ہیں جس نے کئی عالمی ریکارڈز کو چکنا چور کردیا۔

دنیا کی مقبول ترین لیگز میں شامل پاکستان سپر لیگ ہر سیزن میں کامیابی اور مقبولیت کے نئے سنگ میل طے کر رہا ہے۔ رواں ایچ بی ایل پاکستان سپر لیگ سیزن 8 میں شائقین کرکٹ کو گروپ اسٹیج میں جہاں کئی دلچسپ، سنسنی خیز اور اعصاب شکن مقابلے دیکھنے کو ملے وہیں اس ایونٹ میں کچھ ایسے نئے اور منفرد ریکارڈز بھی بنے جس نے عالمی ریکارڈز کو چکنا چور کر دیا۔

پی ایس ایل 8 میں جہاں ٹی 20 کی تاریخ میں ایک میچ میں مجموع طور پر بننے والے رنز کا عالمی ریکارڈ ٹوٹا وہیں مختصر دورانیے کی کرکٹ کی تاریخ کا دوسرا سب سے بڑا ہدف بھی حاصل کیا گیا تو وہیں مہنگے ترین بولر کا منفی ریکارڈ بھی حصے میں آیا۔

ملتان سلطانز نے کوئٹہ گلیڈیئٹرز کے خلاف 262 رنز سجائے جو اب تک پاکستان سپر لیگ میں سب سے بڑا ٹوٹل بنا تاہم اس میچ میں ایسا کچھ بھی ہوا جو ٹی 20 کرکٹ کی بیس سالہ تاریخ میں اس سے قبل کبھی نہیں ہوا تھا۔

اس میچ میں ملتان سلطانز کے 262 رنز کے جواب میں کوئٹہ گلیڈیئٹرز نے ہدف کا تعاقب کرتے ہوئے مقررہ 20 اوورز میں 253 رنز بنائے۔ یوں ٹی 20 کرکٹ کی تاریخ میں پہلی بار دونوں ٹیموں نے 250 سے زائد رنز اسکور کیے اس کے ساتھ ہی ایک میچ میں مجموعی طور پر 515 رنز بھی بنے جو اس سے قبل کبھی نہیں بنے تھے یوں دو عالمی اعزاز پی ایس ایل 8 نے اپنے نام کیے۔

رواں ایونٹ کے گروپ اسٹیج میں ملتان سلطانز نے پشاور زلمی کی جانب سے دیا گیا 243 رنز کا پہاڑ جیسا ہدف عبور کرکے ٹی ٹوئنٹی کرکٹ کی تاریخ میں دوسرا بڑا ہدف حاصل کرنے کا اعزاز بھی اپنے نام کرلیا۔ مختصر دورانیے کی اس کرکٹ میں سب سے بڑا ہدف عبور کرنے کا اعزاز صرف ایک رنز کے فرق سے آسٹریلیا کے پاس ہے جو اس نے نیوزی لینڈ کے خلاف 2018 میں 244 کا ہدف حاصل کرنے بنایا تھا۔

پی ایس ایل 8 کو یہ بھی اعزاز حاص ہوگیا کہ ایونٹ کے کسی ایک بھی سیزن میں سب سے زیادہ سنچریاں بھی رواں ٹورنامنٹ میں یہ بنی ہیں جن کی تعداد 7 ہے جب کہ چار میچز جاری ہیں۔ ان میں سے 4 سنچریاں ملکی جب کہ 3 سنچریاں غیر ملکی کھلاڑیوں نے بنائیں۔ ایونٹ کے 4 میچز باقی ہے اور سنچریوں کی تعداد بڑھ سکتی ہے۔ نوجوان صائم ایوب نے 5 نصف سنچریاں بنائی ہیں۔

عثمان خان نے جہاں 36 گیندوں پر پی ایس ایل کی تیز ترین سنچری بنانے کا اعزاز اپنے نام کر ڈالا تو وہیں جیسن روئے نے 145 رنز کی دھواں دھار اننگ کھیل کر لیگ کی اب تک کی سب سے بڑی اننگ داغ دی۔

رواں پی ایس ایل لاہور قلندرز کے فخر زمان 26 چھکے لگا کر سب سے آگے ہیں تو بابر اعظم سب سے زیادہ 47 چوکے لگا چکے ہیں اور دونوں ہی بلے باز پلے آف میں اپنا ریکارڈ مزید بہتر بنانے کی جستجو کریں گے۔
رواں پی ایس ایل میں ایک ہیٹ ٹرک کے ساتھ 22 وکٹیں لے کر ملتان سلطانز کے عباس آفریدی ٹاپ بولر ہیں تو اسی فہرست میں دوسرے نمبر پر موجود احسان اللہ 12 رنز کے عوض 5 شکار کرکے بہترین بولنگ فیگرز کا اعزاز لے اڑے۔

پی ایس ایل 8 کا ایک منفی ریکارڈ قیص احمد کا مہنگا ترین اسپیل رہا جس میں انہوں نے چار اوورز کے کوٹے میں مخالف ٹیم کو 77 رنز دے ڈالے۔

ایچ بی ایل پاکستان سپر لیگ 8 کا پہلا مرحلہ اختتام پذیر ہوگیا۔ اس مرحلے میں بیٹنگ اور بولنگ میں پاکستانی کھلاڑی ہی سب سے آگے رہے۔

دنیا کی مقبول ترین لیگز میں شامل پاکستان سپر لیگ سیزن 8 کے پہلے مرحلے کا اختتام ہوگیا۔ 30 میچوں پر مشتمل اس مرحلے میں شائقین کرکٹ کو کئی سنسنی خیز، دل کی دھڑکنیں تیز کرنے والے اعصاب شکن اور دلچسپ میچز دیکھنے کو ملے۔

پی ایس ایل میں دنیا بھر سے کرکٹ کے بڑے بڑے کھلاڑی شریک ہیں تاہم پہلے مرحلے کے اختتام پر بیٹنگ اور بولنگ کے شعبے میں پاکستانی کھلاڑی ہی سر فہرست نظر آ رہے ہیں۔

محمد رضوان

بیٹنگ کی بات کی جائے تو ملتان سلطانز کے کپتان محمد رضوان سب سے آگے نظر آتے ہیں جو رواں ایونٹ میں 10 میچز کھیل کر 60.37 کی اوسط سے 483 رنز بنائے ہیں۔

محمد رضوان نے ایک سنچری اور اور 4 نصف سنچریاں جڑی ہیں۔ کراچی کنگز کے خلاف صرف 64 گیندوں پر 110 کی ناقابل شکست اننگ ان کی ایونٹ میں ناقابل فراموش کارکردگی ہے۔

بابر اعظم

قومی ٹیم کے ساتھ پشاور زلمی کی قیادت کرنے والے بابر اعظم پی ایس ایل 8 کے بلے بازوں کی ٹاپ فہرست میں دوسرے نمبر پر ہیں۔ انہوں نے 9 میچز کی 9 اننگز میں 52 کی اوسط سے 416 رنز بنا رکھے ہیں۔

بابر اعظم نے بھی ایک سنچری اور 4 نصف سنچریاں جڑی ہیں۔ کوئٹہ گلیڈیئٹرز کے خلاف 65 رنز پر ان کے جارحانہ 115 رنز پی ایس ایل کی یادگار اننگز میں سے ایک ہے۔

عماد وسیم

کراچی کنگز پی ایس ایل کے پلے آف مرحلے میں تو کوالیفائی نہیں کرسکی تاہم اس کے کپتان عماد وسیم نے ایونٹ میں اپنے بلے اور گیند دونوں سے جادو جگایا اسی بدولت وہ ٹاپ بلے بازوں کی فہرست میں تیسرے نمبر پر ہیں جنہوں نے 404 رنز بنائے۔

عماد وسیم کی بیٹنگ کی خاص بات یہ ہے کہ وہ 10 اننگز میں 7 بار ناقابل شکست رہے اور ان کا بیٹنگ ایوریج سب سے زیادہ 134.66 رہا ہے۔ انہوں نے تین نصف سنچریاں بنائیں۔

بولنگ کے شعبے میں بھی پاکستانی بولرز ہی چھائے رہے۔

عباس آفریدی

ملتان سلطانز کے رائٹ آرم میڈیم فاسٹ بولر عباس آفریدی کا نام ٹاپ بولرز کی فہرست میں سب سے پہلے جگمگا رہا ہے جنہوں نے ایونٹ کے پہلے مرحلے میں 10 میچز کھیل کر 14.95 کی اوسط سے 22 وکٹیں حاصل کرکے قومی ٹیم میں سلیکشن کے لیے سلیکٹرز کی نظریں خود پر مرکوز کرالی ہیں۔

کوئٹہ گلیڈیئٹرز کے خلاف 47 رنز کے عوض 5 وکٹوں کی کارکردگی سے ان کا نام کرکٹ کے حلقوں میں گونجا جب کہ اسی ایونٹ میں وہ دو بار چار وکٹیں لینے کا کارنامہ بھی انجام دے چکے ہیں۔

احسان اللہ

اس فہرست میں دوسرے نمبر پر موجود احسان اللہ کا تعلق بھی ملتان سلطانز سے ہے جنہوں نے 20 وکٹیں حاصل کر رکھی ہیں۔ ان کی بہترین کارکردگی گلیڈیئٹرز کے خلاف رہی جس میں انہوں نے صرف 12 رنز کے عوض 5 وکٹیں حاصل کرکے کوئٹہ کی بیٹنگ کو تہس نہس کردیا تھا۔

احسان اللہ رواں ماہ افغانستان کے خلاف شارجہ میں کھیلی جا رہی ٹی ٹوئنٹی سیریز میں قومی ٹیم میں جگہ پاکر اپنی اس بے مثال کارکردگی کا صلہ پا چکے ہیں۔

راشد خان

افغانستان کے مایہ ناز آل راؤنڈر جو پی ایس ایل 8 میں لاہور قلندرز کی نمائندگی کر رہے ہیں۔ 8 میچز میں 15 وکٹیں حاصل کرکے تیسرے نمبر پر ہیں۔

افغانستان کے خلاف رواں ماہ شیڈول تین ٹی 20 میچوں پر مشتمل سیریز میں پاکستان کرکٹ ٹیم کا کپتان کون ہوگا آج پتہ چل جائے گا۔

اے آر وائی نیوز کے مطابق افغانستان کے خلاف رواں ماہ 24 مارچ سے شارجہ میں کھیلی جانے والی تین ٹی 20 میچوں پر مشتمل سیریز کے لیے پاکستان کرکٹ ٹیم کا اعلان آج ہوگا۔

چیئرمین سلیکشن کمیٹی ہارون رشید آج لاہور میں قومی اسکواڈ کا اعلان کریں گے جس کے ساتھ ہی کپتانی کے تنازع پر جاری افواہوں کا زور ٹوٹ جائے گا اور سب کو معلوم ہو جائے گا کہ اس سیریز میں پاکستان کرکٹ ٹیم کی کپتانی کون کرے گا۔

واضح رہے کہ میڈیا خبروں کے مطابق پاکستان کرکٹ بورڈ افغانستان کے خلاف مذکورہ سیریز میں ریگولر قومی کپتان بابر اعظم کو آرام دے کر شاہین شاہ آفریدی کو قیادت سونپنا چاہتا ہے۔

ان اطلاعات کے بعد کرکٹ حلقوں میں کپتانی کے معاملے پر افواہیں گردش کر رہی ہیں اور ذرائع یہ بھی کہہ رہے ہیں کہ پی سی بی مستقبل کے لیے شاہین شاہ آفریدی کی قیادت کی صلاحیتوں کو آزمانا چاہتا ہے۔

اس حوالے سے گزشتہ روز چیئرمین پی سی بی منیجمنٹ کمیٹی نجم سیٹھی کا شاہین شاہ آفریدی سے ٹیلیفونک رابطہ ہوا ہے جس میں اسٹار فاسٹ بولر نے قیادت کی ذمے داری لینے پر آمادگی ظاہر کی ہے۔

ذرائع کا کہنا ہے کہ افغانستان کے خلاف سیریز میں قومی آل راؤنڈر عماد وسیم سمیت رواں پی ایس ایل 8 میں بہترین کارکردگی دکھانے والے بیٹرز صائم ایوب، اعظم خان اور بولر احسان اللہ کو بھی اسکواڈ میں شامل کیے جانے کا امکان ہے۔

پاکستان افغانستان کے درمیان تین ٹی 20 میچوں پر مشتمل سیریز شارجہ میں کھیلی جائے گی۔ سیریز کا پہلا میچ 24 مارچ، دوسرا 26 جب کہ تیسرا میچ 27 مارچ کو کھیلا جائے گا۔