لوگ اپنی صحت کا خیال رکھنے کے لئے طرح طرح کی غذائیں استعمال کرتے ہیں، مگر وہ یہ نہیں جانتے کہ بعض غذائیں ایسی بھی ہیں جنہیں اگر دوبارہ گرم کرکے استعمال کیا جائے تو وہ صحت کے لئے انتہائی خطرناک ثابت ہوسکتی ہیں۔
طبی ماہرین تجویز کرتے ہیں کہ اگر آپ کو اپنی صحت عزیز ہے تو فروزن فوڈز (جمی ہوئی غذائیں)، فاسٹ فوڈ اور تلی ہوئی غذاؤں سے اجتناب کرنا ہوگا، یہی نہیں بلکہ کچھ غذائیں ایسی بھی ہیں جنہیں اگر دوبارہ گرم کیا جائے تو وہ صحت کے لئے انتہائی خطرناک کردار ادا کرسکتی ہیں۔
ماہرین کا دعویٰ ہے کہ پکی ہوئی غذاؤں کو بار بار مائیکرو ویو اوون میں گرم کرنا آپ کی صحت پر انتہائی مضر اثرات مرتب کرتا ہے۔
سائنسی تحقیق سے پتہ چلتا ہے کہ کچھ مخصوص غذائیں ایسی ہیں جنہیں کھانے کے لئے اگر دوبارہ گرم کیا جائے تو اِن میں مضرِ صحت بیکٹیریاز جنم لے لیتے ہیں اور یہ غذائیں آپ کو بیمار کرسکتی ہیں۔
امریکا کے سینٹر فار فوڈ سیفٹی کی تحقیق سے پتہ چلتا ہے کہ پکی ہوئی سبزیوں کو دوبارہ گرم کر کے کھانے سے یہ ناصرف خطرناک ثابت ہوسکتی ہیں بلکہ ان کے استعمال سے آپ کی جان بھی جاسکتی ہے۔
غذائی ماہرین کی تحقیق میں یہ بات ثابت ہوچکی ہے کہ جڑوں والی سبزیاں، پالک، دھنیا، ساگ، گاجر، شلجم کو دوبارہ گرم نہیں کرنا چاہئے۔
ماہرین چاولوں کو بھی بار بار گرم کرنے سے منع کرتے ہیں۔ کیونکہ مائیکرو ویو اوون میں گرم کرنے سے ان میں مضرِ صحت جراثیم پیدا ہوسکتے ہیں۔ اِنہیں پہلے فریج سے نکال کر باہر رکھیں اور گیس کے چولہے پر ہلکی آنچ پر گرم کریں۔
سمندر سے حاصل ہونے والی غذاؤں کو سرد درجہ حرارت میں نہ رکھا جائے تو ان میں جراثیم جنم لیتے ہیں، جنہیں گرم کرنے کے بعد بھی ختم نہیں کیاجاسکتا۔ اس لئے سمندر سے حاصل ہونے والی غذاؤں کو استعمال میں لانے سے قبل فریج میں لازمی رکھیں۔
انڈے کو آملیٹ بنانے یا ابالنے کے بعد دوبارہ مائیکرو ویو اوون میں رکھنا صحت کے لیے مضر ثابت سکتا ہے۔انڈوں سے بنی غذاؤں کو اگر دوبارہ گرم کیا جائے تو اس میں سالمونیلا جیسے بیکٹیریاز جنم لیتے ہیں، جس کے باعث فوڈ پوائزننگ ہوسکتی ہے۔
غذائی ماہرین کا کہنا ہے کہ آلوؤں کو بھی مائیکرو ویو اوون میں گرم کرنا صحت کے لیے خطرناک ثابت ہوسکتا ہے۔ اس سے آلوؤں میں سی بوٹولینم نامی جراثیم کا خدشہ پیدا ہوجاتا ہے۔
مشرومزکو اگر دوبارہ گرم کیا جائے تو اس سے معدے پر اثر پڑتا ہے، اس لیے اگر پریشانی سے بچنا چاہتے ہیں تو مشرومز کو گرم کرنے سے پرہیز کریں۔
سورج مکھی، کنولا آئل اور کھانا پکانے کے لیے استعمال ہونے والے دیگر ایسے آئل جنہیں ٹھنڈا کیا گیا ہو تو اِنہیں دوبارہ گرم کرنے سے پرہیز کریں، کوکنگ آئل میں اومیگا 3 موجود ہوتا ہے، جس کی حساسیت بہت زیادہ ہوتی ہے۔
چکن کا بچا ہوا سالن بھی ایسی غذاؤں میں شمار ہوتا ہے جنہیں مائیکرو ویو اوون میں گرم کرنے سے پرہیز کرنا چاہئے۔
غذائی ماہرین کے مطابق چکن کو جلدی گرم کرنے کے لیے مائیکرو ویو اوون میں رکھا جائے تو اس میں موجود پروٹین اپنی تاثیر بدل کر زہریلے مادے میں تبدیل ہوجاتے ہیں۔
