قومی ٹیم کے سابق کپتان انضمام الحق آج پاکستان کرکٹ ٹیم کے لئے اہم ذمہ داری سنبھالیں گے، چیف سلیکٹر ہارون رشید کی جگہ اب انضمام الحق کو چیف سلیکٹر بننے کے لیے فیورٹ قرار دیا جارہا ہے۔
ذرائع کے مطابق انضمام الحق چیف سلیکٹر کا چارج لینے کے بعد ایشیا کپ اور افغانستان کی سیریز کے لئے ٹیم کا انتخاب کریں گے، جس کا اعلان جمعرات تک متوقع ہے۔
ٹیکنیکل کمیٹی کے سربراہ مصباح الحق کی جانب سے ہیڈ کوچ گرانٹ بریڈ برن، ٹیم ڈائریکٹر مکی آرتھر، بولنگ اور بیٹنگ کوچز کو نہ چھیڑنے کا مشورہ دیا گیاہے۔
ذرائع کے مطابق پاکستان کرکٹ بورڈ کے حکام نے سینٹرل کنٹریکٹ پر سری لنکا میں کھلاڑیوں سے ویڈیو لنک پر طویل میٹنگ کرکے مطالبات جاننے کی کوشش کی ہے۔
یہ بھی اطلاعات سامنے آرہی ہیں کہ افغان سیریز اور ایشیا کپ کے لیے ایک ہی ٹیم منتخب کی جائے گی۔ قومی ٹیم کے سابق کپتان انضمام الحق لاہور میں ذکا اشرف سے ملاقات کرکے چیف سلیکٹر کی ذمے داری سنبھالیں گے۔
ذرائع کا کہنا ہے کہ سلیکشن کمیٹی کے قیام کے بعد سینٹرل کنٹریکٹس کا اعلان کیا جائے گا، جس میں وائٹ بال اور ریڈ بال کیٹگریز ختم کر کے معاوضوں میں ایک سو فیصد سے زائد اضافے کی تجویز سامنے آئی ہے، میچ فیس میں اضافہ کیا جا رہا ہے، ٹیسٹ میچ فیس میں پچاس فیصد اضافہ ہوگا۔
