کراچی : پی آئی کا 8 رکنی وفد دبئی ایئر شو میں شرکت کیلئے آج روانہ ہوگا، وفد میں شامل پانچ افراد کا دورے کے مقاصد سے کوئی تعلق نہیں۔
تفصیلات کے مطابق باکمال لوگ لاجواب سروس کی دعویدار پی آئی اے انتظامیہ اربوں روپے کے خسارے میں ہونے کے باوجود اپنی شاہ خرچیاں کنٹرول نہیں کرپائی، پی آئی اے کی بہتری کے دعویدار انتظامی افسران کا آٹھ رکنی وفد ائر لائن کے سی ای او مشرف رسول کی قیادت میں دبئی روانہ ہوگیا۔
وفد کی روانگی کا مقصد دبئی ایئر شو میں درکار موزوں طیاروں کا جائز ہ لینا اور بات چیت کرنا ہے، پی آئی اے ذرائع کا کہنا ہے کہ وفد کے چارسے پانچ افراد کا دورے کے مقاصد سے مبینہ طور پربراہ راست تعلق نہیں۔
ذرائع کے مطابق بارہ سے15نومبر تک جاری ائر شو میں شرکت کرنے والوں میں دو افسران کے پی ایس او بھی شامل ہیں، مذکورہ پی ایس او کا تعلق وزیر اعظم کے مشیر ہوابازی اور ائر لائن کے چیف ایگزیکٹو افسر سے ہے۔
اس کے علاوہ چیف آپریٹنگ آفیسر، چیف ٹیکنیکل آفیسر، چیف کا رپوریٹ ڈویلپمنٹ آفیسر، چیف فلائٹ آپریشنز،لیگل کنسلٹنٹ،ڈپٹی چیف پائلٹ بھی وفد میں شامل ہیں۔
وفد آج رات دس بجے پی کے 213سے روانہ جبکہ پی کے 214 سے15نومبر کو وطن واپس آئے گا، وزیر اعظم کے مشیر ہوابازی اور چیئرمین پی آئی اے ائر شو انتظامیہ کی دعوت پر شریک ہوں گے۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
