کراچی: قومی ایئر لائن کی دو روزہ مارکیٹنگ کانفرنس جاری ہے‘ کانفرنس میں دنیا بھر سے پی آئی اے کے کنٹری منیجرشرکت کررہے ہیں‘ سی ای او کا کہنا ہے کہ ادارے کی کارکردگی میں اضافہ ہورہا ہے۔
تفصیلات کے مطابق کانفرنس کی صدارت وزیراعظم کے ممشیر ہوابازی سردار مہتاب عباسی کررہے ہیں اور کانفرنس میں پی آئی اے کا منافع بڑھانے کے ممکنہ پہلوؤں پر غور کیا جائے گا۔
کانفرنس کی صدارت کرتے ہوئے سردار مہتاب عبادی نے کہا کہ اوپن اسکائی پالیسی کو منصفانہ ہونا چاہئے‘ ماضی میں اوپن اسکائی پالیسی نے پی آئی اے کو نقصان پہنچایا۔ ان کا کہنا تھا کہ ہماری کوشش ہے کہ کسی بھی ملک کو فراخ دلانہ طور پر رائٹس نہیں دیئے جانے چاہئے‘ ہمیں اپنے ملک کا مفاد مقدم رکھنا ہوگا۔
انہوں نے یہ بھی کہا کہ پی آئی اے کے نیٹ ورک میں اضافے کے لیے کوششیں کر رہے ہیں‘ ملازمین کو بھی ایئرلائن کے لئے اونر شپ لینا ہوگی۔
اس موقع پر ایئر لائن کے سی ای او نیئر حیات کا کہنا تھا کہ پی آئی اے کو کھویا ہوا مقام واپس دلانے کیلئے کوششیں کر رہے ہیں ‘ہمیں ایئرلائن کی بحالی کیلئے نئے بزنس ماڈل اختیار کرنا ہوں گے۔
انہوں نے شرکاء کو بتایا کہ پی آئی اے کی کارکردگی میں بتدریج اضافہ ہورہا ہے‘ سیٹ فیکٹر کے ساتھ ساتھ روینیو میں بھی اضافہ ہوا ہے۔
پی آئی اے ریاض ایئرپورٹ اتھارٹی کی نادہندہ نکلی
خیال رہے کہ پاکستان کی قومی ایئرلائن طویل عرصے سے خسارے میں چل رہی ہے‘ گزشتہ دنوں ریاض ایئرپورٹ اتھارٹی نے پی آئی اے کو پانچواں اور آخری خط ارسال کرکے واجب الادا چالیس لاکھ ریال ادا کرنے کی یاد دہانی کرائی تھی۔
قومی ایئر لائن نے ریاض ایئرپورٹ کے لاکھوں ریال ادا نہیں کیے ہیں جس کے سبب ایئرپورٹ اتھارٹی نے آپریشن بند کرنے پر غور شروع کردیا ہے۔
اگرآپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اوراگرآپ کو یہ مضمون پسند آیا ہے تو اسے اپنی فیس بک وال پرشیئرکریں۔
