ARYNews.tv | Urdu – Har Lamha Bakhabar

Author: محمد صلاح الدین

  • پی آئی اے کا کارنامہ : سامان مسافرکے بغیر ٹورنٹو روانہ

    پی آئی اے کا کارنامہ : سامان مسافرکے بغیر ٹورنٹو روانہ

    کراچی : لاجواب لوگوں کی باکمال ایئرلائن کا ایک اور کارنامہ سامنے آیا ہے، ٹورنٹو جانے والی پی آئی اے کی پرواز کا مسافرغائب ہونے کے باوجود اس کا سامان روانہ کردیا گیا، انتظامیہ نےپرواز کی بروقت روانگی کے نام پر مسافروں کی سلامتی خطرے میں ڈال دی۔

    pia-post-01

    بورڈنگ کارڈ کے ساتھ غائب ہونے والے بلال اکبر نامی مسافر کا سامان ٹورنٹو پہنچ گیا، یاد رہے کہ ایاٹا قوانین اور پرواز کی سیفٹی کے پیش نظرغائب ہونے والے مسافر کا سامان آف لوڈ کیا جانا ضروری ہے۔

    pia-post-02

    اسٹیشن منیجر لاہور نے دعویٰ کیا ہے کہ ہم نے مسافر کو تلاش کرنے اور اس کا سامان آف لوڈ کیا تھا، اسٹیشن منیجر کے بیان کے برعکس ٹورنٹو کی جانب سے سامان پہنچنے پر مبنی ای میل ریکارڈ میں موجود ہے۔

    pia-post-03

    ای میل اورشواہد کی روشنی میں متعلقہ شعبے نے اسٹیشن منیجر کے خلاف کارروائی کی سفارش کی ہے۔ دوسری جانب اسٹیشن منیجر طارق مجید کے خلاف رپورٹ کئی روز سے سی ای او کی میز پر کارروائی کی منتظر ہے۔

    pia-post-04

    اس کے علاوہ حال ہی میں ترقی پانے والے اسٹیشن منیجر کے خلاف پہلے بھی ایک انکوائری چل رہی ہے۔

  • جدہ : پی آئی اے کا ایک اور طیارہ تباہی سے بچ گیا

    جدہ : پی آئی اے کا ایک اور طیارہ تباہی سے بچ گیا

    جدہ : پی آئی اے کا ایک اور جہاز تباہی سے بچ گیا، جدہ ایئرپورٹ پر پی آئی اے کے بوئنگ 777 کے ایک طیارے میں آگ لگ گئی، پرایئر ٹریفک کنٹرولر نے طیارے سے دھواں نکلتا دیکھ کر فائر بریگیڈ کو اطلاع کردی۔

    تفصیلات کے مطابق جدہ ایئر پورٹ پر ملتان روانگی کیلئے تیار پی آئی اے کی پرواز پی کے 740 سے اچانک دھواں نکلنے لگا.

    پی آئی اے کا عملہ طیارے سے دھواں نکلنے سے لاعلم تھا، پی آئی اے عملے کی لاعلمی کے باوجود ایئر ٹریفک کنٹرولر نے ہنگامی طور پر فائر بریگیڈ کو طلب کر لیا.

    ذرائع کے مطابق پرواز پی کے 740 جدہ سے ملتان کیلئے پہلے ہی 9 گھنٹے سے زائد تاخیرکا شکار تھی۔ خوش قسمتی سے وقوعہ کے وقت جہاز میں کوئی مسافر موجود نہیں تھا.

    پی آئی اے حکام کے مطابق طیارے کا جنریٹر سسٹم میں فنی خرابی ہوگئی تھی اور اے ٹی یو سسٹم بھی کام نہیں کررہا تھا، طیارے کے پرزہ جات کراچی سے جدہ بھیج دیئے گئے ہیں، طیارہ ٹھیک ہوتے ہی پرواز کو ملتان کیلئے روانہ کردیاجائے گا۔

  • پی آئی اے کے ایک اور اے ٹی آر طیارے میں آتشزدگی

    پی آئی اے کے ایک اور اے ٹی آر طیارے میں آتشزدگی

    ملتان : پاکستان کی قومی ایئر لائن پی آئی اے کا ایک اور مسافر اے ٹی آر طیارے میں آتشزدگی کا واقعہ پیش آیا ہے، اے ٹی آر طیارہ ایک بار پھر بڑے حادثے سے بچ گیا، سول ایوی ایشن اتھارٹی نے تمام اے ٹی آر طیاروں کو گراؤنڈ کرنے کا حکم جاری کردیا۔

    تفصیلات کے مطابق پی آئی کی پرواز پی کے 581 ملتان سے لاہور جانے کیلیے روانہ ہونے ہی والی تھی کہ اے ٹی آر طیارے کے انجن میں آگ لگ گئی۔

    طیارہ ملتان سے کراچی جا رہا تھا، واقعے کے بعد فائربریگیڈ نے موقع پر پہنچ کر آگ پر قابو پایا، اور ریسکیو کی امدادی ٹیمیں بھی جائے وقوعہ پر پہنچ گئیں۔

    ذرائع کے مطابق خوش قسمتی سے کسی قسم کا کوئی جانی نقصان نہیں ہوا اور تمام 48 مسافر محفوظ رہے۔ مسافروں کو متبادل پرواز کے ذریعے کراچی روانہ کیا جائے گا۔ مسافروں کے مطابق انجن میں آگ لگنے کی اطلاع ہمیں فوری طور پر نہیں دی گئی۔

    پی آئی اے انتظامیہ کی جانب سے جہاز کا ٹائر پھٹنے کی اطلاع دی گئی تھی، جب فائر بریگیڈ کی گاڑیقاں آگئیں اس کے بعد مسافرون کو نکالا گیا۔

    مزید پڑھیں : سول ایوی ایشن کا عملہ اب جہازوں پر چھاپے مارے گا

    واقعے کے بعد سول ایوی ایشن اتھارٹی نے فوری طور پر تمام اے ٹی آر دس طیاروں کو گراؤنڈ کرنے کا حکم دے دیا ہے، سول ایوی ایشن نے ہدایت جاری کی ہے کہ اب کوئی اے ٹی آر طیارہ تا حکم ثانی اڑان نہیں بھر سکے گا۔

    اس حوالے سے یہ بات قابل ذکر ہے سانحہ حویلیاں کے اے ٹی آر طیارے میں بھی اڑتالیس مسافر سوا تھے۔

  • دیراورچترال میں را کے تربیت یافتہ دہشت گردوں کی موجودگی کا انکشاف

    دیراورچترال میں را کے تربیت یافتہ دہشت گردوں کی موجودگی کا انکشاف

    کراچی: دیر اور چترال میں را سے تربیت یافتہ دہشت گردوں کی موجودگی کا انکشاف کرتے ہوئے سول ایوی ایشن اتھارٹی کی جانب سے تھریڈ الرٹ جاری کردیا گیا ہے۔

    سول ایوی ایشن اتھارٹی کے لکھے گئے خط کے مطابق چار سے چھ را کے کیمپ سے تربیت یافتہ تحریک طالبان پاکستان کے دہشتگرددیر اور چترال میں موجود ہیں ،تھریڈ الرٹ سول ایوی ایشن اتھارٹی کے سینئر جوائنٹ ڈائریکٹر ایوی ایشن کے زیر دستخط جاری کیا گیا۔

    سول ایوی ایشن اتھارٹی کے لکھے گئے خط کے مطابق چار سے چھ دہشتگردوں نے مزار شریف افغانستان سے تربیت حاصل کی،دہشتگردوں کا ایک گروپ 2دسمبر کو دیر اور چترال کے سرحدی علاقوں میں پہنچنے کا انکشاف کیا گیا ہے۔

    سول ایوی ایشن اتھارٹی کی جانب سے تمام اعلیٰ حکام کو 5دسمبر کولکھے گئے خط کے ذریعے آگاہ کردیا گیا ہے اور اعلیٰ حکام کسی بھی ناخوشگوار واقعے کی روک تھام کیلئے ہنگامی بنیادوں پر اقدامات کرنے کی ہدایت کی گئی ہے۔

    واضح رہے کہ بھارت اس سے قبل بھی پاکستان میں نقص امن کی کارروائیوں میں بلواسطہ طور پر شریک رہا ہے ، را کے ایجنٹ کلبھوشن یادو نے گرفتاری کے وقت انتہائی حیرت انگیز انکشافات کیے تھے۔

    notice

  • سیرین ایئرلائن تاحال اپنی پروازیں شروع نہ کرسکی

    سیرین ایئرلائن تاحال اپنی پروازیں شروع نہ کرسکی

    کراچی : نجی شعبے میں ممکنہ طور پر فضائی آپریشن کا آغا ز کرنے والی سیرین ایئر لائن کے عملے نے ایمرجنسی سے پہلے ہی ایمرجنسی نافذ کردی، سیرین ائرلائن کو اکتوبر 2016 سے اپنا فضائی آپریشن شروع کرنا تھا جو تاحال شروع نہ ہو سکا۔

    تفصیلات کے مطابق سیرین ایئر لائن کے پاس اکلوتے جہاز بوئنگ 737-800 کو کراچی ایئرپورٹ پر آپریشن کے لیے لایا گیا تھا، پارکنگ میں موجود جہاز کے عملے کی ناتجربہ کاری کا اندازہ اس بات سے لگایا جا سکتا ہے کہ طیارے کا ایمرجنسی ڈور خود بخود کھل گیا۔

    طیارے کا دروازہ خودبخود کھلنے کے بعد ایمرجنسی سلائیڈ بھی خود بخود کھل کر رن وے سے جا لگی۔ ذرائع کا کہنا ہے کہ سیرین ایئر کے مزید دو طیارے آنے والے ہیں۔

    سول ایوی ایشن اتھارٹی قوانین کے مطابق آپر یشن شروع کر نے کے لیے کسی بھی کمپنی کے پاس تین جہاز ہونا ضروری ہیں، مذکورہ ایر لائن کو ابھی تک ائروردیئنس سر ٹیفکٹ بھی نہیں مل سکا ہے۔

    یاد رہے کہ سیرین ائرلائن کو اکتوبر 2016 سے اپنا فضائی آپریشن شروع کرنا تھا جو تاحال شروع نہ ہو سکا۔

  • طیارہ حادثہ: فرانس کی ٹیم 24 گھنٹے میں پاکستان پہنچے گی

    طیارہ حادثہ: فرانس کی ٹیم 24 گھنٹے میں پاکستان پہنچے گی

    کراچی: حویلیاں میں ہونے والے طیارہ حادثے کی تحقیقات کے لیے فرانسیسی ٹیم آئندہ چوبیس گھنٹوں کے دوران تحقیقات کےلئے اسلام آباد پہنچے گی‘ فرانسیسی ٹیم سیفٹی انویسٹی گیشن بورڈ کے ساتھ مشترکہ تحقیقات کرے گی۔

    تفصیلات کے مطابق فرانسیسی ٹیم اور اسی آئی بی کے ارکان پیر یامنگل کو بلیک باکس اور وائس ریکارڈر لے کر فرانس روانہ ہوں گے‘ طیارہ حادثے پر فرانسیسی سفارتخانے کی جانب سے بھرپور تعاون کی یقین دہانی کرائی گئی ہے۔

    اس سلسلےمیں میں پاکستان کی تحقیقاتی ٹیم کے ویزے سے متعلق فرانسیسی سفارتخانے نے چوبیس گھنٹے میں ویزا جاری کرنے کی ہدایت کردی ہے۔

    ذرائع کا کہنا ہے کہ بلیک باکس اور وائس ریکارڈر ڈی کوڈ ہونے کے بعد اس کی تمام تر فائلوں کی کاپی ایس آئی بی کے حوالے کرد ی جائے گی جس کی جانچ کے لئے مزید دو سے تین ہفتے لگیں گے۔

    طیارے کا بلیک باکس اور وائس ریکارڈ کراچی پہنچا دیا گیا

     بلیک باکس اور وائس ریکارڈر کی ڈی کوڈ ہونے کے بعد جو ڈیٹا آئے گا اس کی روشنی میں ہی تحقیقات میں پیش رفت ہوسکے گی۔

    یاد رہے کہ 7 دسمبر کی شام چترال سے اسلام آباد آنے والی پی آئی اے کی پرواز پی کے661 حویلیاں کے نزدیک حادثے کاشکار ہوگئی تھی ‘ جہاز میں عملے سمیت 47 افراد سوار تھے۔

    حادثے میں معروف نعت خواں اور اے آروائی کے ٹی وی ہوسٹ جنید جمشید اپنی اہلیہ سمیت جاں بحق ہوگئے تھے۔ تمام افراد کی شناخت کاعمل ڈی این کے ذریعے جار ی ہے۔

  • سول ایوی ایشن کا عملہ اب جہازوں پر چھاپے مارے گا

    سول ایوی ایشن کا عملہ اب جہازوں پر چھاپے مارے گا

    کراچی: سول ایوی ایشن اتھارٹی نے فیصلہ کیا ہے کہ اب جہازوں کی جانچ پڑتال کیلئے اچانک چاپے مارے جائیں گے، سی اے اے کا ا ئیرورویننس عملہ طیاروں کو چیک کرے گا۔

    تفصیلات کے مطابق سول ایوی ایشن اتھارٹی کے ایئر وردنینس ڈائریکٹریٹ نے پی آئی اے کے اے ٹی آر طیاروں کی شیک ڈاون انسپکشن کی ہدایت کردی۔

    حویلیاں میں اندوہناک طیارہ حادثے کے بعد سول ایوی ایشن اتھارٹی نے اہم فیصلہ کرتے ہوئے بتایا ہے کہ اب سی اے اے کا عملہ طیاروں کی جانچ پڑتال کیلیے اچانک طیاروں پر چھاپے مارے گا، اس میں اے ٹی آر کے ساتھ بوئنگ 777 ایئر بس 320 طیارے بھی شامل ہو ں گے۔

    سی اےاے ائئر وردینس کی ٹیمیں جہازوں کی جانچ پڑتال کر نے کے بعد طیارے کو آڑان کی اجازت دیں گی، نمائندہ اے آر وائی نیوز صلاح الدین نے بتایا ہے کہ سب سے پہلے تمام اے ٹی آر طیاروں کی جانچ کی جائے گی اس کے ساتھ ساتھ پاکستان سے آپریٹ ہونے والی دو ایئر لائنز کمپنیاں شاھین ایئر لائن اورائیر بلو کے جہازوں کی بھی چانج پڑتال کی جائے گی یہ عمل شیک ڈاؤن آپریشن کہلاتا ہے۔

    اس سلسلے میں طیاروں کے سسٹمز کو چیک کیا جائے گا۔ کراچی ،اسلام آباد، لاہور اور پشاور میں سی اے اے کے ایئر وردنینس ٹیم طیاروں کی دوبارہ سے جانچ کرے گی۔

    پی آئی اے کے پاس اے ٹی آر کے نو طیارے ہیں جو اس وقت آپریشن میں حصہ لے رہے ہیں، اے ٹی آر ماڈل نمبر 42 اور 72 طیارے شامل ہیں جن کی دوبارہ سے جانچ ہوگی۔

    سی اے اے ذرائع کے مطابق سول ایوی ایشن اتھارٹی نے پی آئی اے کے انجینئرز کو بھی طلب کرلیا ہے، ذرائع کا کہنا ہے کہ اس فیصلے کا مقصد فضائی سفر کو مزید بہتر بنانا ہے تاکہ آئندہ اس قسم سے افسوسناک واقعات کی روک تھام کی جا سکے۔

  • پاکستان میں طیاروں سے پرندے ٹکرانے کے واقعات میں مسلسل اضافہ

    پاکستان میں طیاروں سے پرندے ٹکرانے کے واقعات میں مسلسل اضافہ

    دنیا بھر میں آج شہری ہوا بازی کا عالمی دن منایا جارہا ہے جس کا مقصد مسافروں کو محفوظ ترین سفری سہولت فراہم کرنے کے ساتھ ہوا بازی کے اہم شعبے کو جدید خطوط استوار کرنا ہے۔

    دور جدید میں فضائی سفر کو بہت اہمیت حاصل ہے۔ ہوائی سفر نے دنوں کے فاصلوں کو سمیٹ کر رکھ دیا ہے۔ شہری ہوا بازی کی عالمی تنظیم 7 دسمبر 1944 کو قائم کی گئی جس کے تحت ہر سال ہوا بازی کا عالمی دن منایا جاتا ہے۔

    پاکستان کی سول ایو ی ایشن اتھارٹی اپنے فرائض احسن طریقے سے انجام نہیں دے پا رہی۔ مختلف ایئرپورٹس پر پرندے ٹکرانے کے واقعات میں مسلسل اضافہ ہو رہا ہے جو کہ انتہائی خطرناک ہے۔

    مزید پڑھیں: ہوائی جہاز کے بارے 8 حیرت انگیز حقائق

    اس کے ساتھ رات کے اوقات میں مختلف ایئرپورٹس پر لینڈنگ اور ٹیک آف کے دوران لیزر لائٹس مارنے کے واقعات بھی پیش آ رہے ہیں جو کہ طیاروں کے حادثے کا سبب بن سکتے ہیں۔

    سول ایوی ایشن اتھارٹی کے ڈپٹی مینیجنگ ڈائریکٹر عامر محبوب کا کہنا ہے کہ ملک میں شہری ہوا بازی کا شعبہ تیزی سے ترقی کر رہا ہے۔

    ذرائع کے مطابق پاکستان میں مختلف ہوائی اڈوں پر بین الاقوامی ایوی ایشن قوانین کی خلاف ورزیاں سامنے آتی ہیں۔ اکثر ایئر پورٹ پر جہازوں سے دوران پرواز پرندوں کے ٹکرانے کے خطرات لاحق رہتے ہیں۔

    رواں سال پی آئی اے سمیت غیر ملکی طیاروں سے پرندے ٹکرانے کے 73 سے زائد واقعات رپورٹ ہوئے ہیں جس کی وجہ سے جہازوں کو نقصان پہنچا ہے۔

    مزید پڑھیں: جہاز میں کھڑکی کا شیڈ کھلا رکھنے کی ہدایت کیوں کی جاتی ہے؟

    اس کے ساتھ ہی ملک کے بڑے ایئرپورٹ کراچی، اسلام آباد، لاہور اور پشاور ایئرپورٹ پر رات کے دوران لینڈنگ اور ٹیک آف کے وقت جہازوں پر لیزر لائٹس مارنے کے واقعات بھی سامنے آئے ہیں۔

    پالپا کے صدر کیپٹن خالد حمزہ نے اے آروائی نیوز کو بتایا کہ سول ایوی ایشن اتھارٹی کو پرندوں کے خاتمے کے لیے ہنگامی طور پر اقدامات کرنے ہوں گے۔

    رات کے وقت اکثر طیاروں سے لینڈنگ اور ٹیک آف کے دوران طیاروں کو لیزر لائٹ مارنا انتہائی خطرناک ہوتا ہے۔ ان کی روک تھام کے لیے سول ایوی ایشن اتھارٹی اور ضلعی انتظامیہ کو اقدامات کرنا ہوں گے۔

  • پی آئی اے نے کپتانوں کی تنخواہیں آدھی کردیں

    پی آئی اے نے کپتانوں کی تنخواہیں آدھی کردیں

    کراچی: پی آئی اے نے مالی بحران کے باعث کپتانوں کی تنخواہ آدھی کردی، کپتانوں نے احتجاجاً اضافی ڈیوٹی نہ دینے کا فیصلہ کرتے ہوئے کٹوتی کا سلسلہ بند کرنے کا مطالبہ کیا ہے۔

    تفصیلات کے مطابق قومی ایئرلائن پی آئی اے نے شدید ترین مالی بحران سے چھٹکارا حاصل کرنے کیلئے پائلٹس کی تنخواہیں نصف کردیں جس کے بعد پالپا نے بھی اضافی پروازیں اڑانے سے انکار کردیا ہے۔

    اس حوالے سے پالپا کے صدرکیپٹن خالد حمزہ کی زیر صدارت ہنگامی اجلاس میں تنخواہوں کی کٹوتی پر شدید تشویش کا اظہارکیا گیا۔

    اجلاس میں کہا گیا کہ ہمارے ساتھ پی آئی اے انتظامیہ کا رویہ اسی طرح رہا تو پی آئی اے کا کوئی بھی کپتان اضافی ڈیوٹی نہیں کرے گا۔

    اجلاس میں فیصلہ کیا گیا کہ جب تک پوری تنخواہیں ادا نہیں کی جاتیں تب تک کوئی بھی پائلٹ اضافی پروازیں نہیں اڑائے گا۔ پی آئی اے انتظامیہ کو آگاہ کردیا گیا ہے کہ کپتانوں کی پوری تنخواہ ادا کی جائے، کٹوتی کا سلسلہ بند کیا جائے ورنہ ہم بھی اہم فیصلے کرنے پرمجبورہوں گے۔

    ذرائع کا کہنا ہے کہ پائلٹس کو تنخواہیں توپوری مل رہی ہیں تاہم ان کے انٹرنیشنل الاؤنسز میں کمی کردی گئی ہے جبکہ دیگر الاؤنسز ختم کردیئے گئے ہیں۔

  • پی آئی اے کے ڈرائیورزکی حکمرانوں کے گھرپرڈیوٹیوں کا انکشاف

    پی آئی اے کے ڈرائیورزکی حکمرانوں کے گھرپرڈیوٹیوں کا انکشاف

    کراچی : حکمران جماعت مسلم لیگ نواز کے سینیٹرز کا پی آئی اے کے ڈرائیورز کو اپنے گھرپر ڈیوٹی کرانے کا انکشاف ہوا ہے۔

    تفصیلات کے مطابق مال مفت دل بے رحم کے مصداق اربوں روپے کے خسارے سے دوچار قومی ائیر لائن کے ڈرائیورز سینیٹرز کے گھروں میں اپنی ڈیوٹیاں انجام دے دے رہے ہیں۔

    میاں صاحب کی کابینہ بھی صاحب بن گئی، اس حوالے سے ذرائع کا کہنا ہے کہ پی آئی اے موٹرٹرانسپورٹ کے 3 ڈرائیورز لیگی سینیٹر نہال ہاشمی کی رہائش گاہ پرڈیوٹیاں دے رہے ہیں۔

    مذکورہ تینوں ڈرائیوروں کو تنخواہ پی آئی اے کے اکاؤنٹ سے ادا کی جارہی ہے، ایک ڈرائیور سینیٹرنہال ہاشمی کے اہل خانہ سے تلخ کلامی کے بعد واپس پی آئی اے بھیج دیا گیا۔

    ذرائع نے انکشاف کیا ہے کہ مذکورہ ڈرائیوروں کی نہال ھاشمی کے گھر پر ڈیوٹی کی اجازت اعلیٰ سطح نے دی ہے۔