Author: سلمان لودھی

کراچی کے علاقے پرانی سبزی منڈی میں بیٹے نے باپ کو قتل کردیا۔

اے آر وائی نیوز کے مطابق کراچی میں علاقے پرانی سبزی منڈی میں جائیداد کے جھگڑے پر بدنصیب بیٹے نے ماں اور بہنوں کے سامنے باپ پر فائرنگ کی۔

پولیس کا کہنا ہے کہ بیٹے کی فائرنگ سے باپ موقع پر ہی جاں بحق ہوگیا، مقتول کی شناخت 60 سالہ غنی کے نام سے ہوئی ہے۔

پولیس کا بتانا ہے کہ بیٹا نشے کا عادی ہے اس کا باپ سے جائیداد کا جھگڑا چل رہا تھا۔

تفتیشی حکام کا کہنا ہے کہ بیٹا جائیداد بیچنا چاہتا تھا جبکہ باپ انکار کررہا تھا، ملزم فائرنگ کرکے موقع سے فرار ہوگیا جس کی تلاش میں پولیس چھاپے مار رہی ہے۔

مقتول کی لاش کو ضابطے کی کارروائی کے لیے جناح اسپتال منتقل کردیا گیا ہے۔

کراچی میں رواں سال کی بڑی ڈکیتی ہوئی ہے اس دوران ملزم دو کروڑ کی رقم لوٹ کر فرار ہوگئے۔

اے آر وائی نیوز کے مطابق کراچی اسٹاک ایکسچینج کے قریب ڈکیت شہری سے 2 کروڑ کر چھین کر فرار ہوگیا اور مزاحمت کرنے پر گارڈ پر فائرنگ کردی۔

پولیس کا کہنا ہے کہ ڈاکوؤں کی واردات کے دوران فائرنگ سے بھگدڑ مچ گئی۔

تفتیشی حکام کا کہنا ہے کہ سیکیورٹی اہلکار نے بھی ڈاکوؤں کو پکڑنے کی کوشش کی، ڈاکو موٹرسائیکل پر آئے اور پارکنگ ایریا سے رقم چھین کر فرار ہوگئے۔

پولیس کے مطابق شہری نجی بینک میں رقم جمع کروانے کے لیے پہنچا تھا۔

کراچی میں پیپلزپارٹی رہنما ڈاکٹر عاصم کی اہلیہ ڈاکٹر ثمرین کی گاڑی پر نامعلوم افراد کی جانب سے فائرنگ کی گئی ہے۔

اے آر وائی نیوز کے مطابق فائرنگ کا واقعہ کراچی کے علاقے اورنگی ٹاؤن میں پیش آیا، واقعے میں ڈاکٹر عاصم کی اہلیہ ڈاکٹر ثمرین محفوظ رہیں۔

پولیس کا کہنا ہے کہ فائرنگ کا واقعہ لوٹ مار کا ہوسکتا ہے، تحقیقات جاری ہیں۔

تفتیشی حکام کا بتانا ہے کہ ڈاکٹر ثمرین اورنگی ٹاؤن میں 11 نمبر میں گرلز کالج میں 14 اگست کی تقریب کے سلسلے میں آئی تھیں اور واپس جارہی تھیں جب ان کی گاڑی کو نشانہ بنایا گیا۔

واضح رہے کہ ڈاکٹر ثمرین ڈاؤ یونیورسٹی آف ہیلتھ سائنسز کی وائس چانسلر بھی ہیں۔

کراچی میں شہری ڈاکوؤں کے رحم وکرم پر آگئے اور رواں سال کے ابتدائی سات ماہ میں اسٹریٹ کرائم کی 44 ہزار سے زائد وارداتیں ہوئیں۔

کراچی کے حالات ایسے ہو گئے ہیں کہ اگر یہ کہا جائے کہ شہر قائد میں غنڈہ راج قائم ہوگیا تو غلط نہ ہوگا۔ اعداد وشمار بتاتے ہیں کہ کراچی میں رواں سال کے ابتدائی سات ماہ کے دوران اسٹریٹ کرائم کی 44 ہزار سے زائد وارداتیں ہوئی ہیں لیکن ریکوری 10 فیصد سے بھی کم ہے۔

سی پی ایل سی کے اعداد و شمار کے مطابق شہر میں سب سے زیادہ شہریوں کو موٹر سائیکلوں سے محروم کیا گیا۔ جنوری سے جولائی تک سات ماہ کے دوران 31 ہزار سے زائد موٹر سائیکلیں چوری یا چھینی گئیں۔

اسٹریٹ کرمنلز نے 11 ہزار 800 سے زائد شہریوں کو موبائل فون سے محروم کیا گیا جب کہ 1200 افراد سے گاڑیاں چھین یا چوری کر لی گئیں۔

رواں برس اس شہر نا پرساں میں اغوا برائے تاوان کے 12 اور بھتہ خوری کے 52 کیسز رپورٹ ہو چکے ہیں۔

کراچی کے علاقے سرجانی ٹاؤن میں اتائی ڈاکٹر کی جانب سے 9 سالہ بچی کو مبینہ طور پر جنسی زیادتی بنانے کا واقعہ سامنے آگیا۔

بچی سے مبینہ جنسی زیادتی میں ملوث اتائی ڈاکٹر کو علاقہ مکینوں نے پکڑ لیا اور تشدد کا نشانہ بنانے کے بعد پولیس کے حوالے کر دیا۔

متاثرہ بچی نے اپنے بیان میں بتایا کہ مجھے زبردستی پکڑ کر بے ہوش کر کے زیادتی کی گئی۔ سرجانی پولیس کے مطابق بچی کا میڈیکل کروایا جا رہا ہے۔

پولیس نے بتایا کہ بچی کے اہل خانہ کی مدعیت میں ملزم برکت کے خلاف مقدمہ درج کر لیا گیا۔

ادھر، اے آر وائی نیوز کی خبر پر وزیر داخلہ سندھ ضیاء الحسن لنجار نے واقعے کا نوٹس لیتے ہوئے ایس ایس پی ویسٹ سے تفصیلات طلب کر لیں۔

صوبائی وزیر داخلہ نے اپنے بیان میں ہدایت کی کہ جامع تفتیش کے بعد ملوث ملزم کو قانون کی گرفت میں لایا جائے، متاثرہ بچی اور اہل خانہ کے تحفظ کو یقینی بنایا جائے۔

گزشتہ روز فیصل آباد میں جعلی پیر کی 16 سال کی لڑکی سے مبینہ جنسی زیادتی کا کیس سامنے آگیا تھا۔ چک جُھمرہ کی رہائشی خاتون نے اپنی بیٹی کو چار ماہ پہلے پیر شکیل کے اہل خانہ کی خدمت کیلیے گھر بھیجا تھا۔

جعلی پیر لڑکی کو گھر میں قید رکھ کر مبینہ طور پر زیادتی کا نشانہ بناتا رہا تاہم موقع ملنے پر لڑکی فرار ہو کر والدین کے پاس پہنچ گئی تھی۔

متاثرہ لڑکی کے والد نے تھانہ چک جھمرہ میں مقدمہ درج کروایا تھا۔ پولیس حکام کا کہنا تھا کہ ملزم جعلی پیر شکیل فرار ہوگیا ہے جس کی تلاش جاری ہے جبکہ متاثرہ لڑکی کی میڈیکل رپورٹ میں زیادتی کی تصدیق ہوگئی۔

وزیر سوشل ویلفیئر سہیل شوکت بٹ نے سی پی او سے رابطہ کیا تھا اور فرار ملزم کی گرفتاری کیلیے ہر ممکن اقدامات کرنے کی ہدایت کی تھی۔

کراچی میں یونیورسٹی کی لڑکیوں کو کوکین بیچنے والے ملزم کو پولیس نے گرفتار کرلیا۔

اے آر وائی نیوز کے مطابق کراچی کے مختلف علاقوں میں کوکین فروخت کرنے والے بین الصوبائی گروہ کے گرفتار کارندے نے تہلکہ خیز انکشافات کردیے۔

ملزم احسن نے پولیس کو دیے گئے بیان میں بتایا کہ ایک گرام کوکین 19 سے 20 ہزار روپے میں بیچتے ہیں، گروہ کا سرغنہ رانا شہریار عرف شیری دبئی میں مقیم ہے۔

گرفتار ملزم کا کہنا ہے کہ چچا رانا شہریار لوکیشن بھیجتا ہے جہاں ہم خریدار کو کوکین پہنچا دیتے ہیں۔

ملزم احسن نے انکشاف کیا کہ کوکین خریدنے والوں میں کالج، یونیورسٹیز کے طلبا بھی شامل ہیں، خواتین، نوجوان اور بڑی عمر کے لوگ بھی کوکین خریدتے ہیں۔

ملزم نے بتایا کہ مجھے کوکین سپلائی کرنے کے عوض 60 ہزار روپے ماہانہ دیے جاتے ہیں۔