Author: سلمان لودھی

کراچی کے علاقے سرسید تھانے کی حدود میں خاتون کو ہراساں کرنے والے ملزم کو پولیس نے گرفتار کرلیا۔

اے آر وائی نیوز کے مطابق گزشتہ روز کراچی کے علاقے سرسید سے خاتون کو ہراساں کرنے کی ویڈیو سامنے آئی تھی جس پر پولیس نے کارروائی کرتے ہوئے ملزم کو گرفتار کیا۔

پولیس کا بتانا ہے کہ ملزم کی شناخت گوہر کے نام سے ہوئی ہے اور اس نے مختلف علاقوں میں متعدد خواتین کو ہراساں کرنے کا اعتراف کیا ہے۔

ایس ایس پی سینٹرل ذیشان صدیقی کا کہنا ہے کہ ملزم کے خلاف مقدمہ درج کرلیا گیا ہے۔

اس سے قبل کراچی کے علاقے پرانا گولیمار میں ایک شخص نے با پردہ راہ چلتی خاتون کو ہراساں کیا تھا اور خاتون کے مزاحمت کرنے پر ملزم فرار ہوگیا تھا۔

 ترجمان ایس ایس پی کیماڑی کا بتانا تھا کہ پولیس نے خاتون کو ہراساں کرنے والے ملزم کو سی سی ٹی وی فوٹیج کی مدد سے گرفتار کرلیا۔

گرفتار ملزم کی شناخت رضا کے نام سے ہوئی تھی، ملزم نے جرم کا اعتراف بھی کیا تھا۔

کراچی کے علاقے گلستان جوہر میں تھانے میں زبردستی داخل ہونے کی کوشش پر پولیس اور وکلا کے درمیان جھگڑا ہوا۔

تھانے میں وکلا اور پولیس کے درمیان تلخ کلامی ہوئی جس کے بعد وکلا کی بڑی تعداد تھانے پہنچ گئی۔ پولیس نے دعویٰ کیا کہ وکلا نے تھانے پر حملہ کیا۔

پولیس نے بتایا کہ ایک وکیل بغیر اجازت ایس ایچ او کے سائڈ روم میں داخل ہوا تھا، وکیل کو باہر جانے کا کہا تو اس نے بدتمیزی کی، وکیل نے اپنے دیگر ساتھیوں کو بلوا کر تھانے پر حملہ کیا۔

پولیس نے تھانے میں زبردستی گھسنے والوں پر لاٹھی چارج کیا جس کے بعد وکلا نے تھانے کے باہر احتجاج شروع کر دیا۔ پولیس مظاہرین پر بھی لاٹھی چارج کی جبکہ احتجاجی وکلا کی جانب سے پتھراؤکیا گیا جس سے ایک پولیس اہلکار زخمی ہوا۔

ایس ایس پی ایسٹ نے گلستان جوہر میں ہنگامہ آرائی کی اطلاع پر اقدام اٹھاتے ہوئے ایس پی گلشن، ڈی ایس پی شارع  فیصل اور ڈی ایس پی فیروز آباد کو موقع پر پہنچنے کی ہدایت کی۔

کراچی کے علاقے ماڑی پور میں نالے سے خاتون اور دو بچوں کی لاشیں برآمد ہوئی ہیں۔

اے آر وائی نیوز کے مطابق ریسکیو حکام کا کہنا ہے کہ کراچی کے علاقے ماڑی پور شیر محمد ویلج نالے سے خاتون، بچے اور بچی کی لاشیں برآمد ہوئی ہیں، لاشوں کو سول اسپتال ٹراما سینٹر منتقل کیا جارہا ہے۔

پولیس کا کہنا ہے کہ خاتون، بچہ اور بچی دو روز سے لاپتہ تھے، اہلخانہ کی جانب سے گمشدگی کی درخواست بھی جمع کروائی گئی تھی۔

پولیس کا بتانا ہے کہ تینوں لاشیں ماڑی پور کے نالے سے ملی ہیں، خاتون کی شناخت رقیہ اور بچوں کی شناخت فاطمہ اور عدنان کے ناموں سے ہوئی ہے۔

واضح رہے کہ اس سے قبل کراچی کے علاقے ملیر برہانی ٹاؤن میں مکان کے پانی کے ٹینک سے خاتون کی لاش برآمد ہوئی تھی، پولیس کا کہنا تھا کہ متوفیہ کی شناخت اسما کے نام سے ہوئی ہے جبکہ متوفیہ تین بچوں کی ماں تھی۔

پولیس نے لاش کو ضابطے کی کارروائی کے لیے جناح اسپتال منتقل کر کے خاتون کے شوہر کاشف سے تفتیش کا اغاز کر دیا تھا۔

تفتیشی حکام کا کہنا تھا کہ خاتون کی وجہ موت کا تعین پوسٹ مارٹم رپورٹ آنے کے بعد ہی کیا جائے گا۔

کراچی میں گارڈ نے کچرا نہ اٹھانے پر لڑکے کو گولی مار دی جس کے نتیجے میں وہ جاں بحق ہوگیا۔

اے آر وائی نیوز کے مطابق شہر قائد کے علاقے نارتھ کراچی میں گارڈ اور لڑکے میں کچرا اٹھانے پر بحث ہوئی جس پر طیش میں آکر گارڈ نے لڑکے کے پیٹ میں گولی ماردی۔

زخمی بچی کو طبی امداد کے لیے عباسی شہید اسپتال منتقل کیا گیا جہاں وہ دوران علاج دم توڑ گیا جبکہ ملزم گارڈ واردات کے بعد فرار ہوگیا۔

پولیس کا کہنا ہے کہ گارڈ اور بچے کے درمیان کچرا اٹھانے پر بحث ہوئی تھی، اس دوران نجی سیکیورٹی کمپنی کے گارڈ نے گولی چلائی اور فرار ہوگیا۔

پولیس نے بتایا ہے کہ مفرور سیکیورٹی گارڈ کی شناخت رمضان کے نام سے ہوئی ہے جس کی تلاش جاری ہے۔

واضح رہے کہ تین دن قبل کراچی کے علاقے سخی حسن سرینا موبائئل مارکیٹ میں سیکیورٹی گارڈ نے ٹک ٹاکر کو ویڈٰیو بنانے پر گولی مار کر قتل کردیا تھا۔