Author: سلمان لودھی

کراچی دو دریا کے مقام پر ایک شخص اور 2 بچے ڈوب گئے، عینی شاہدین نے آنکھوں دیکھا حال بیان کردیا۔

اے آر وائی نیوز کے مطابق عینی شاہدین کا کہنا ہے کہ ایک شخص دو بچوں کو زبردستی لے کر پانی میں کودا، بچوں کی عمریں 5 سے  سال کے درمیان تھیں، ڈوبنے والا شخص نشئی اور بچے اچھے گھرانے کے لگ رہے تھے۔

عینی شاہد کا کہنا ہے کہ بچوں نے کافی دیر تک پانی سے باہر آنے کی کوشش کی، ہم نے بچوں کو بچانے کی کوشش کی لیکن نہیں بچاسکے۔

دو دریا پر موجود عینی شاہد نے بتایا کہ ایک ڈیڑھ گھنٹے تک لوگ ڈوبے رہے لیکن کوئی نہیں آیا، مرد نے کالے رنگ کے کپڑے پہن رکھے تھے، ایک بچہ گرا تو دوسرا بھاگا لیکن مرد نے اس بچے کو بھی پکڑ لیا۔

عینی شاہد کے مطابق واقعہ تین سے سوا تین بجے کے درمیان پیش آیا، 8 غوطہ خوروں کی مدد سے 2 ٹیمیں آپریشن کررہی ہیں۔

واضح رہے کہ پولیس کا کہنا ہے کہ دو دریا کے قریب سمندر میں 3 افراد ڈوب گئے، ابتدائی معلومات کے مطابق ایک شخص نے 2 بچوں کے ساتھ سمندر میں چھلانگ لگائی، امدادی ٹیموں کی جانب سے ڈوبنے والے افراد کی تلاش جاری ہے۔

کراچی کے علاقے ملیر کھوکھراپار میں لڑکی اریبہ کی لاش ملنے کا معمہ 20 دن میں حل ہوگیا۔

اے آر وائی نیوز کے مطابق پولیس حکام کا کہنا ہے کہ 16 سالہ لڑکی اریبہ کے قتل میں ملوث پڑوسی ملزم محمد حذیف کو گرفتار کرلیا۔

ملزم نے اعترافی بیان میں کہا کہ 10 جولائی کو لڑکی کو زیادتی کا نشانہ بنایا، شور مچانے پر لڑکی کا منہ دبایا جس سے وہ مر گئی، لڑکی پڑوسن تھی، دوست کا پوچھنے میرے گھر آئی تھی۔

پولیس کے مطابق ملزم نے اعتراف کیا کہ گھر خالی تھا، شیطان کے بہکاوے میں آکر جرم کیا۔

واضح رہے کہ  لڑکی کے قتل کا مقدمہ کھوکھراپار تھانے میں درج ہے، تفتیش کے دوران 20 سے زائد افراد کا ڈی این اے ٹیسٹ کیا گیا، ملزم کو شک کی بنیاد پر حراست میں لے کر تفتیش کی گئی۔

پولیس حکام کا کہنا ہے کہ ملزم نے اعتراف جرم کرلیا ہے، عدالت نے جرم ثابت ہونے پر جیل بھیج دیا۔

لواحقین کا کہنا ہے کہ 16 سالہ اریبہ مقتولہ دو بہن بھائیوں میں پڑی تھی۔

یاد رہے کہ دو روز قبل کھوکھراپار میں 16 سالہ لڑکی کی گھر کے باہر سے پھندا لگی لاش ملی تھی۔

کراچی کے مختلف علاقوں میں ٹریفک حادثات میں بچے سمیت 3 افراد جاں بحق ہوگئے۔

ریسکیو حکام کے مطابق ماڑی پور روڈ کے قریب گاڑی کی ٹکر سے راہگیر جاں بحق ہوگیا، ناردرن بائی پاس پر ڈمپر کی ٹکر سے 8 سالہ بچہ زندگی کی بازی ہار گیا۔

پولیس کے مطابق حادثے کے بعد ڈرائیور نے فرار ہونے کی کوشش کی تعاقب کرنے پر ڈرائیور ڈمپر چھوڑ کر فرار ہوگیا۔

پولیس کا کہنا ہے کہ ڈمپر کو تحویل میں لے کر منگھوپیر تھانے منتقل کردیا گیا ہے۔

ادھر ماڑی پور آئی سی آئی چوک پر ٹینکر کی ٹکر سے موٹر سائیکل سوار جاں بحق ہوگیا، پولیس نے ڈرائیور کو گرفتار کرکے کیمیکل سے بھرا ٹینکر تحویل میں لے لیا۔

پولیس کے مطابق موٹر سائیکل محمود کی لاش کو سول اسپتال منقل کردیا گیا ہے۔