Author: سلمان لودھی

کراچی میں نامعلوم مسلح افراد نے گاڑی پر فائرنگ کر کے تاجر کو قتل کر دیا۔

پولیس کے مطابق فائرنگ کا واقعہ لیاقت آباد 10 نمبر میں پیش آیا، مقتول کی شناخت 40 سالہ عمران ہارون کے نام سے ہوئی ہے جو کپڑے کا تاجر تھا، مقتول کو سر پر گولی ماری گئی۔

پولیس کا کہنا ہے کہ واقعہ بظاہر ٹارگٹ کلنگ کا لگتا ہے، شہری کو ایک گولی ماری گئی، مقتول سے کسی قسم کی چھینا چھپٹی نہیں کی گئی، وقوعہ سے نائن ایم ایم گولی کا خول ملا ہے، مقتول شہری کی بولٹن مارکیٹ میں کپڑے کی دکان ہے۔

پولیس حکام کا کہنا ہے کہ مقتول ناظم آباد میں اپنے گھر کی جانب جا رہا تھا، فائرنگ کرنے والوں نے گاڑی روکی نہ ہی کچھ طلب کیا، موٹر سائیکل سواروں نے گاڑی پر ایک فائر کیا اور فرار ہوگئے، لواحقین سے معلومات حاصل کرنے کی کوشش کر رہے ہیں۔

کراچی میں پسند کی شادی کرنے والے نوجوان کو پولیس نے مبینہ طور پر چھت سے دھکا دے دیا۔

اے آر وائی نیوز کے مطابق کراچی کے علاقے لیاقت آباد میں نوجوان 5 منزلہ عمارت سے گر کر جاں بحق ہوگیا، والد نے پولیس پر بھتہ مانگنے اور چھت سے دھکا دینے کا الزام عائد کیا ہے۔

ذرائع کے مطابق لیاقت آباد سی ون ایریا کے رہائشی نبیل صدیقی نے دو روز قبل کورٹ میرج کی تھی۔

نوجوان نبیل کے والد نے بتایا کہ بیٹے نے پسند کی شادی کی اور لڑکی والوں کی جانب سے مقدمہ درج کروایا گیا تھا، تفتیشی افسر نے مبینہ طور پر دھکا دیا ہے۔

نوجوان کے والد کا کہنا ہے کہ بیٹے نے عدالت سے ضمانت لے رکھی تھی مگر کیس کا تفتیشی افسر عامر گھر آیا اور 50 ہزار روپے رشوت کا مطالبہ کیا اور رشوت نہ دینے پر نبیل اور اس کے والد کو ڈکیتی کے مقدمے میں تھانے میں بند کرنے کی دھمکی دی اور نبیل کو دھکا دے کر پانچویں منزل سے گرادیا۔

پولیس کا کہنا ہے کہ شریف آباد انویسٹی گیشن پولیس نبیل کے والد کا بیان لینے گئی تھی۔

دوسری جانب ایس ایس پی سینٹرل معروف عثمان نے واقعے کا نوٹس لیتے ہوئے انکوائری کا حکم دے دیا، ایس ایس پی سینٹرل نے واقعے کی انکوائری ایس پی نیو کراچی کو سونپ دی ہے۔

کراچی میں شہری نے ڈکیتی کی کوشش ناکام بناتے ہوئے ڈاکوؤں پر فائرنگ کردی جس کے نتیجے میں ایک مبینہ ڈاکو مارا گیا۔

اے آر وائی نیوز کے مطابق کراچی کے علاقے نارتھ ناظم آباد میں شہری نے دو مبینہ ڈاکوؤں پر فائرنگ کردی جس کے نتیجے میں ایک ڈاکو ہلاک اور دوسرا زخمی ہوگیا۔

متاثرہ شہری کا کہنا ہے کہ کنسٹرکشن کے پلاٹ پر 4 مسلح افراد واردات کے لیے آئے تھے، میرے ساتھی کی فائرنگ سے ایک ڈاکو مارا گیا جبکہ ایک ڈاکو زخمی اور دو فرار ہوگئے۔

متاثرہ شہری کے مطابق ایک ڈکیت کے ساتھی کو ہم نے پکڑ کو پولیس کے حوالے کیا۔

فائرنگ کے واقعے کے بعد پولیس موقع پر پہنچی اور ہلاک و زخمی ڈاکوؤں کو اسپتال منتقل کردیا، پولیس کا کہنا ہے ہلاک ڈاکو کی شناخت خرم اللہ اور زخمی ڈاکو کی شناخت تنویر کے نام سے ہوئی ہے۔

مزید پڑھیں: کراچی اسٹریٹ کرائم: ڈاکوؤں کی فائرنگ سے پولیس اہلکار زخمی

واضح رہے کہ کراچی میں اسٹریٹ کرائمز پر قابو نہیں پایا جاسکا ہے روزانہ درجنوں شہریوں کو موبائل فون اور قیمتی اشیا سے محروم کردیا جاتا ہے اور ڈکیتی کے دوران مزاحمت کرنے پر شہریوں کو گولی مار دی جاتی ہے۔

اس سے قبل گلشن حدید میں دو کم عمر لڑکوں سے موٹر سائیکل چھین لی گئی تھی، ایک موٹر سائیکل پر سوار 3 ملزمان نے لڑکوں کا پیچھا کیا کم عمر لڑکے ملزمان کو دیکھتے ہی موٹر سائیکل سے اتر گئے۔

ملزمان لڑکوں سے گھر کی دہلیز پر موٹر سائیکل چھین کر فرار ہوئے، ملزمان نے شناخت چھپانے کے لیے ماسک لگا رکھا تھا۔

کراچی میں پولیس اہلکاروں کو چھاپہ مار کارروائی کے دوران تشدد کیا گیا اور ان کی وردیاں پھاڑ دی گئیں۔

اے آر وائی نیوز کے مطابق ماڈل کالونی میں چھاپہ مارنے آئے پولیس اہلکاروں پر کئی افراد نے تشدد کیا، ہوٹل پر موجود کئی افراد نے ایس ایچ او اور اہلکاروں کو تشدد کا نشانہ بنایا۔

ایس ایچ او اور پولیس اہلکاروں پر تشدد کی ویڈیو منظر عام پر آگئی۔ کئی افراد نے پولیس ٹیم پر تشدد کیا اور وردیاں پھاڑ دیں۔ تشدد کا نشانہ بننے والی پولیس ٹیم کو جان بچا کر بھاگنا پڑا۔

پولیس کے مطابق پولیس ٹیم ماڈل کالونی میں ہوٹل پر چھاپہ مار کارروائی کے لیے گئی تھی، پولیس جرائم پیشہ عناصر کی  موجودگی کی اطلاع پر ہوٹل پہنچی تھی، ہوٹل مالک کی جانب سے ملزمان کو فرار کرایا گیا۔

پولیس کے مطابق کار سرکار میں مداخلت اور پولیس یونیفارم پر ہاتھ ڈالنے پر قانونی ایکشن ہوگا، ڈی ایس پی اور ایس پی بھی جائے وقوع پر پہنچ گئے۔