Author: سلمان لودھی

کراچی: شہر قائد کے مختلف علاقوں میں دو گھنٹوں کے دوران ڈکیتی مزاحمت پر چار افراد کو گولیاں مار دی گئیں۔

اے آر وائی نیوز کے مطابق کراچی کے مختلف علاقوں میں ڈکیتی کے دوران فائرنگ کے چار واقعات پیش آئے جس کے نتیجے میں 4 شہری زخمی ہوگئے۔

سائٹ ایریا میں اسٹریٹ کرائم کی واردات کے دوران ڈاکوؤں نے شہری کو دو گولیاں ماریں اور فرار ہوگئے۔

ادھر نیو کراچی صبا سنیما کے قریب ڈکیتی مزاحمت پر شہری کو فائرنگ کرکے زخمی کردیا گیا، گلشن اقبال بلاک 5 میں بھی ڈکیتی کے دوران مزاحمت کرنے پر ایک شخص کو گولی مار دی گئی۔

ریسکیو ذرائع کے مطابق منگھوپیر میں 55 سالہ شہری کو گولیاں مار کر زخمی کیا گیا، زخمی شہری کی شناخت ذیشان کے نام سے ہوئی، تمام وارداتوں میں ملزمان شہریوں نے نقدی اور موبائل فون چھین کر فرار ہوگئے۔

ذرائع کا بتانا ہے کہ ڈکیتی مزاحمت کے دوران زخمی ہونے والے شہریوں کو طبی امداد کے لیے اسپتال میں منتقل کردیا گیا۔

ایس ایس پی کیماڑی کا کہنا ہے کہ سائٹ ایریا میں زخمی حالت میں گرفتار ملزم دوران علاج دم توڑ گیا، ملزم کو پولیس مقابلے میں گرفتار کیا گیا تھا۔

مزید پڑھیں: کراچی میں اسٹریٹ کرائم سے نمٹنے کیلیے سخت فیصلے

اس سے قبل اجلاس میں ایڈیشنل آئی جی غلام بنی میمن کو شہر میں ماضی کے جرائم کی مکمل لسٹ پیش کی گئی تھی جس میں بتایا گیا تھا کہ 2017 سے 2021 تک 11 ہزار ایک سو 21 ملزمان کے چالان ہوئے، 3  ہزار 872 ملزمان تاحال جیل میں ہیں جب کہ 7 ہزار 249 ملزمان ضمانت پر ہیں۔ اجلاس میں ضمانت پر رہا ملزمان کا لائف اسٹائل اور ذریعہ معاش چیک کرنے ہدایت کی گئی۔

اجلاس میں احکامات دیے گئے کہ کوئی بھی واقعہ رونما ہونے کے بعد ملزمان کی فوری شناخت کرنا ہوگی، علاقہ ایس ایچ او جتنے جرم ہوں گے اتنی سی سی ٹی ویز جمع کرے گا، حاصل کردہ سی سی ٹی کو فرانزک کرا کر پیس آف ایوڈنس بنایا جائے گا، ایس ایچ او کی ہفتہ وار اور ماہانہ کارکردگی کا جائزہ لیا جائے گا، نااہل ایس ایچ او کو صرف معطل ہی نہیں بلکہ سزا بھی دی جائے گی۔

ایڈیشنل آئی جی کراچی نے سیکٹریٹری ہیلتھ 100 ڈاکٹرز پر مشتمل ٹیم مانگی۔ ڈاکٹرز کے ساتھ 2 افراد پر مشتمل پیرا میڈیکل اسٹاف بھی فراہم کرنے کا مطالبہ کیا گیا۔ گرفتاری کے بعد ملزمان کا میڈیکل کرانے کا فیصلہ کیا گیا۔

کراچی: کے علاقے نارتھ کراچی میں گاڑی پر فائرنگ کرکے بیٹے کے سامنے باپ کو موت کے گھاٹ اتار دیا گیا، واقعے کی سی سی ٹی وی فوٹیج منظرعام پر آگئی۔

کراچی کے علاقے نارتھ کراچی میں گاڑی پر فائرنگ کی گئی جس کے نتیجے میں ایک شخص جاں بحق جبکہ بچہ زخمی ہوگیا تھا۔

پولیس نے فائرنگ کی تصدیق کرتے ہوئے بتایا کہ واقعہ نارتھ کراچی کے علاقے پیلا اسکول کے قریب پیش آیا، جہاں ایک کار پر فائرنگ ہوئی، فائرنگ کے نتیجے میں سلمان نامی شخص جاں بحق جبکہ دس سالہ بچہ زخمی ہوا بچےکو ایک گولی لگی جس کی شناخت صبور کے نام سے ہوئی ہے۔

اب واقعے کی ویڈیو منظرعام پر آئی ہے جس میں دیکھا جاسکتا ہے کہ مقتول سلمان گاڑی میں بچوں کو چھوڑنے جارہے ہیں اسی دوران ان کے پیچھے ملزمان تعاقب کررہے ہیں۔

مزید پڑھیں: کراچی: گاڑی پر فائرنگ سے باپ جاں بحق، بیٹا زخمی

پولیس کے مطابق ایک موٹر سائیکل پر دو ملزمان آئے تھے انہوں نے مقتول سلمان کو ٹارگٹ کیا اور اسی راستے سے فرار ہونے میں کامیاب ہوگئے۔

پولیس کا کہنا ہے کہ رہائشی علاقے کی مزید فوٹیج حاصل کرنے کی کوشش کی جارہی ہے تاکہ موٹر سائیکل کی نمبر پلیٹ حاصل کرکے ملزمان کی تلاش کی جاسکے۔

کراچی: شہر قائد کے علاقے سپر ہائی وے کے قریب سے 7 سالہ مغوی بچے کی لاش برآمد ہوئی ہے۔

اے آر وائی نیوز کی رپورٹ کے مطابق کراچی کے علاقے سپر ہائی وے فقیرا گوٹھ کی جھاڑیوں سے 7 سالہ بچے کی لاش برآمد ہوئی ہے، بچہ رضوان 6 روز سے لاپتا تھا۔

پولیس کا کہنا ہے کہ بچے کی لاش کو ضابطے کی کارروائی کے لیے اسپتال منتقل کیا جارہا ہے، پوسٹ مارٹم کے بعد بچے کی موت کا تعین ہوسکے گا۔

ذرائع کا کہنا ہے کہ بچے کے گلے پر کپڑا لپٹا ہوا ہے، پولیس کا کہنا ہے کہ گھر والوں کے بیان قلمبند کیے جارہے ہیں، پوسٹ مارٹم رپورٹ آنے سے پہلے کچھ کہنا قبل از وقت ہوگا۔

علاقہ مکینوں کا بتانا ہے کہ رضوان کو 6 روز قبل الاصف اسکوائر کے قریب سے اغوا کیا گیا تھا، بچے کی لاش ملنے پر والد شدت غم سے نڈھال ہیں۔

مزید پڑھیں: کراچی: لاپتہ کمسن بچے کی لاش ندی سے برآمد، علاقہ میں اشتعال

 واضح رہے کہ گزشتہ ماہ اغوا ہونے والے 4 سالہ حسبان کی لاش ندی سے مل گئی ہے، کمسن بچے کی اندوہناک موت پر لواحقین غم سے نڈھال اور اہل علاقے میں شدید اشتعال پایا گیا تھا۔

 پولیس کی جانب سے جاری بیان میں کہا گیا ہے کہ بچے کو کیوں اور کس نے قتل کیا پولیس کی تحقیقات جاری ہیں؟ جلد تفصیلات منظر عام پر آجائیں گی۔

یہ پڑھیں: نیو کراچی قبرستان سے 7 سالہ بچے کی لاش برآمد، مقدمہ درج

ادھر سندھ اسمبلی میں پی ٹی آئی کے پارلیمانی لیڈر خرم شیر زمان نے واقعے پر شدید ردعمل کا اظہار کرتے ہوئے کہا تھا کہ معصوم بچہ نالے میں حادثاتی طور پر گرا یا قتل کیا گیا؟ پولیس تمام پہلوؤں سے شفاف تحقیقات کرے اور لواحقین کو جلد آگاہ کرے۔

کراچی میں قتل کی لرزہ خیز واردات، شوہر نے مبینہ طور پر بیوی کو ذبح کر کے خودکشی کر لی۔

پولیس کے مطابق دل دہلا دینے والا واقعہ منظور کالونی میں پیش آیا جہاں ایک گھر سے میاں بیوی کی لاشیں ملی ہیں۔

پولیس کا کہنا ہے کہ ابتدائی طور پر یہ لگتا ہے کہ شوہر سیف اللہ نے بیوی آمنہ کو تیز دھار آلے سے وار کر کے قتل کیا اور بعد میں پنکھے سے پھندا لگا کر خودکشی کر لی۔

مقامی پولیس کا کہنا ہے کہ کثیرالمنزلہ عمارت میں میاں بیوی کے ساتھ بچے بھی تھے لیکن کوئی بھی بچہ عینی شاہد نہیں ہے۔ 7 بہن بھائیوں میں کچھ بالائی اور کچھ نچلی منزلوں پر تھے لیکن کوئی بھی وقوعہ کے وقت والدین کے پاس نہیں تھا۔

پولیس نے ابتدائی شواہد اکٹھے کرکے بچوں کے بیانات قلمبند کیے ہیں جب کہ معاملے کی تحقیقات کے لیے کرائم سین یونٹ اور فرانزک ٹیموں کو طلب کر لیا ہے۔

کراچی کے دو شہریوں کو اغوا کرکے زنجیروں میں باندھ کر تشدد کا نشانہ بنانے کی ویڈیو منظر عام پر آگئی۔

اے آر وائی نیوز کے مطابق کراچی کے دو مغوی شہریوں کو بہیمانہ تشدد کا نشانہ بنادیا گیا، دونوں افراد غیر قانونی طور پر یورپ جانے کے لیے نکلے تھے، واقعے کا مقدمہ درج کرکے پولیس نے تحقیقات شروع کردیں۔

ویڈیو میں دیکھا جاسکتا ہے کہ دونوں شہریوں کو زنجیروں سے باندھ کر تشدد کا نشانہ بنایا جارہا ہے، ویڈیو میں نظر آنے والے دونوں افراد کی شناخت افتخار اور طاہر کے ناموں سے ہوئی ہے۔

ذرائع کے مطابق واقعے کا مقدمہ اغوا ہونے والے شہریوں کے بھائیوں کی مدعیت میں درج کیا گیا، دونوں شہری کراچی سے کوئٹہ پھر ایران اور اٹلی جانا چاہتے تھے۔

پولیس کا کہنا ہے کہ مغوی افراد کے بھائیوں نے انہیں غیرقانونی طور پر یورپ جانے سے منع کیا تھا، دونوں افراد کراچی سے کوئٹہ کے لیے روانہ ہوئے اور اہلخانہ سے رابطے میں تھے۔

پولیس کے مطابق دونوں افراد نے 10 جنوری کو کوئٹہ اور 13 جنوری کو ایران سے واٹس ایپ پر رابطہ کیا گیا، دونوں نے آخری بات چیت میں بتایا جلد فشنگ ٹرالر سے ایران روانہ ہوں گے۔

اہلخانہ نے پولیس کو دئیے گئے بیان میں بتایا کہ اس رابطے کے بعد ان سے کوئی رابطہ نہیں ہوا، نامعلوم نمبروں سے بھائیوں پر تشدد کی ویڈیوز موصول ہونا شروع ہوگئیں۔

مغوی افراد کے اہلخانہ کے مطابق اغوا کار بھائیوں کی رہائی کے لیے تیس لاکھ روپے کا مطالبہ کررہے ہیں۔

پولیس کا کہنا ہے کہ واقعے کی تفتیش اے وی سی سی کرے گی، معاملہ ہیومن ٹریفکنگ کا ہے تو کیس ایف آئی اے کو دیا جائے گا۔