Author: سلمان لودھی

کراچی کے علاقے پاک کالونی میں پولیس نے عزیز آباد سے چھینے گئے مویشی برآمد کرلیے۔

اے آر وائی نیوز کے مطابق پاک کالونی پولیس نے کارروائی کرتے ہوئے عزیز آباد سے چھینے گئے مویشی برآمد کرکے تین ملزمان کو گرفتار کرلیا۔

پولیس حکام کے مطابق ملزمان کے قبضے سے موٹر سائیکلیں بھی برآمد کی گئیں۔

واضح رہے کہ عزیز آباد کے علاقے سے چند روز قبل جانور چھینے گئے تھے، سوشل میڈیا پر ویڈیو وائرل ہونے کے بعد اے آئی جی نے نوٹس لیا تھا۔

 نامعلوم ملزمان اسلحہ کے زور پر مویشوں کے بیوپاری سے دنبوں سے بھرا چنگچی لوڈر رکشہ چھین کر فرار ہوگئے۔

عزیز آباد پولیس نے واقعے کا مقدمہ درج کرکے تفتیش شروع کر دی تھی۔

مویشوں کے بیوپاری محمد راشد سلیم نے بتایا تھا کہ  ایف سی ایریا لیاقت آباد کا رہائشی ہوں اور حجام کا کام کرتا ہوں۔ عیدالاضحیٰ پر عارضی روزگار کے لیے دنبوں کی خرید و فروخت کرتا ہوں۔ 29 مئی کو پیالہ ہوٹل کے قریب قربانی کے جانوروں کا کام ختم ہونے کے بعد ایف سی ایریا اپنے گھر چنگچی لوڈر رکشہ سے واپس آرہا تھا کہ جس میں تین دنبے موجود تھے۔

بیوپاری نے بتایا تھا کہ عزیز آباد تھانے کی حدود میں عائشہ منزل پل کے قریب 2موٹر سائیکلوں پر سوار 4 مسلح ملزمان آئے اور انہوں نے اسلحے کے روز پر چنگچی لوڈر رکشے میں موجود تینوں دنبے اور موبائل فون چھین کر فرار ہوگئے۔

کراچی کے علاقے سرجانی ٹاؤن میں گھر سے خاتون اور بچے کی لاشیں برآمد ہوئی ہیں۔

اے آر وائی نیوز کے مطابق کراچی کے علاقے سرجانی ٹاؤن میں خاتون اور بچے کو چھریوں کے وار کرکے قتل کردیا گیا۔

مقتولہ کی شناخت 35 سالہ ثنا، بچے کی شناخت 10 سالہ محمد علی کے نام سے ہوئی ہے جبکہ زخمی شوہر فیصل کی عمر 40 سال بتائی گئی ہے۔

پولیس کا کہنا ہے کہ شوہر فیصل کی گردن پر بھی چھری کے وار کے نشانات ہیں جسے زخمی حالت میں اسپتال منتقل کردیا گیا ہے۔

ایس ایس پی ایسٹ کے مطابق اہل محلہ نے گھر سے لڑائی کی آوازیں سنی تھیں، گھر کا دروازہ بھی اندر سے بند تھا، بظاہر یہ گھریلو جھگڑا لگتا ہے۔

پولیس حکام کا کہنا ہے کہ جائے وقوعہ سے چھری ملی ہے، واقعے کی مزید تحقیقات جاری ہیں۔

کراچی کی مصروف شاہراہ ملائی کلاچی روڈ پر مسلح ملزمان کی فائرنگ سے ٹریفک پولیس اہلکار شہید ہو گیا۔

ابتدائی اطلاعات کے مطابق واقعہ مائی کلاچی روڈ پر پھاٹک کے قریب پیش آیا جہاں نامعلوم موٹرسائیکل سوار ملزمان نے پولیس اہلکار پر فائرنگ کر دی۔

شہید اہلکار کو دو گولیاں لگیں اور وہ موقع پر ہی دم توڑ گیا۔

اہلکار کی شناخت 30 سالہ زین محمد کے نام سے ہوئی جس کی میت کو جناح اسپتال منتقل کر دیا گیا ہے۔

بتایا گیا ہے کہ واقعہ کے وقت پھاٹک کے قریب واقعے چوکی میں مزید دو ٹریفک پولیس اہلکار بھی موجود تھے تاہم متوفی اہلکار اکیلا باہر کھڑا تھا۔

ٹریفک پولیس اہلکار زین محمد سلطان آباد ٹریفک سیکشن میں تعینات تھا اور اس نے سال 2023 میں ٹریفک پولیس میں ملازمت اختیار کی تھی۔ شہید ٹریفک پولیس اہلکارکیماڑی کا رہائشی تھا۔

کراچی کے علاقے شاہین کمپلیکس کے قریب بجلی کی بندش کے خلاف تاجروں کے احتجاج پر کے الیکٹرک کامؤقف آگیا۔

کراچی کے علاقے شاہین کمپلیکس کے قریب بجلی کی بندش پر جامع کلاتھ کے تاجروں کی جانب سے احتجاج کیا جارہا ہے، مظاہرین نے آئی آئی چندر ریگر روڈ جانے والی سڑک بلاک کردی۔

مظاہرین کا کہنا ہے کہ زیادہ لوڈشیڈنگ کے باعث کاروبار شدید متاثر ہے۔

احتجاج کے باعث آئی آئی چندریگر روڈ جانے والی سڑک بند ہوگئی جس کی وجہ سے اطراف کی شاہراہوں پر ٹریفک متاثر ہے اور گاڑیوں کی قطاریں لگ گئیں۔

ترجمان کے الیکٹرک کا کہنا ہے کہ جامع کلاتھ اور ملحقہ علاقوں میں معمول کے مطابق بجلی کی فراہمی جاری ہے۔

کے الیکٹرک ترجمان کا کہنا ہے کہ جامع کلاتھ اور ملحقہ علاقوں میں عدم ادائیگیوں کے باعث واجب الادا رقم 9 کروڑ سے تجاوز کرچکی ہے، لوڈشیڈنگ کا دورانیہ علاقے میں ہونے والی بجلی چوری اور نقصانات کی شرح پر منحصر ہے۔

ترجمان کے الیکٹرک کے مطابق علاقہ مکین وقت پر بجلی کے بلوں کی ادائیگیوں کو یقینی بنائیں، وقت پر کی گئی ادائیگیاں علاقے کی لوڈشیڈنگ میں کمی یا خاتمے کا اہم جز ہے۔