کراچی کے علاقے ڈیفنس میں ڈکیتی کی واردات کے دوران شہری کی فائرنگ سے ڈاکو مارا گیا۔

اے آر وائی نیوز کے مطابق ڈیفنس کے علاقے خیابان سحر میں فائرنگ کے واقعے کی سی سی ٹی وی فوٹیج منظر عام پر آگئی۔

شہری بینک سے ساڑھے چار لاکھ روپے لے کر نکلا تھا، موٹر سائیکل پر سوار دو ملزمان نے کار سوار سے لوٹ مار کی، ملزمان کے فرار ہوتے ہی شہری نے فائرنگ کردی جس کے نتیجے میں ملزم موقع پر ہی مارا گیا۔

سی سی ٹی وی فوٹیج میں مارے گئے ملزم کو ڈکیتی کی واردت کرتے دیکھا جاسکتا ہے، شہری کے گاڑی میں بیٹھتے ہی ملزمان نے واردات کی تھی۔

فوٹیج میں ایک ملزم کو موقع سے فرار ہوتے دیکھا جاسکتا ہے، متاثرہ شہری کا کہنا ہے کہ ڈکیتی مزاحمت پر ڈاکوؤں نے فائرنگ کی جس سے محفوظ رہا۔

پولیس کے مطابق ملزمان کی تعداد 3 تھی، ہلاک ملزم کی شناخت زاہد کے نام سے ہوئی، واردات میں چھینی گئی رقم 4 لاکھ 50 ہزار روپے برآمد کرلیے گئے ہیں۔

کراچی: شہر قائد کے علاقے سہراب گوٹھ مویشی منڈی کی پارکنگ میں کھڑی گاڑی سے گزشتہ روز گمشدہ ہونے والے نوجوان کی لاش برآمد ہوئی ہے۔

اے آر وائی نیوز کے مطابق سائٹ سپر ہائی وے کی حدود میں قائم ہونے والی گائے منڈی کے پارکنگ ایریا میں کھڑی گاڑی سے لاش برآمد ہوئی، جس کی شناخت اویس حمید کے نام سے ہوئی۔

پولیس حکام نے بتایا کہ گاڑی میں سے خواتین کے پرس اور نشہ آور محلول سمیت دیگر بوتلیں برآمد ہوئیں۔ پولیس کے مطابق مقتول اویس کو زہر دے کر مارا گیا ہے کیونکہ اُس کے ہاتھ پیر پیلے ہو رہے تھے۔

پولیس نے بتایا کہ گاڑی کے شیشے چڑھے ہوئے تھے جبکہ مقتول کے سر سے خون بھی بہہ رہا تھا، جسے دیکھ کر یہ کہا جاسکتا ہے کہ اُس کے سر پر بھی وار کیا گیا۔ ڈاکٹرز نے لاش کی حالت کو دیکھ کر بتایا کہ مقتول کو صبح قتل کیا گیا ہے کیونکہ لاش اکڑی ہوئی تھی۔

پولیس کے مطابق اویس حمید کے گمشدگی کی رپورٹ تھانہ بغدادی میں اہل خانہ نے گزشتہ شب درج کروائی اور مؤقف اختیار کیا کہ وہ کل شام کو صدر سے سونا لے کر نکلا تھا۔

کراچی: شہر قائد کے علاقے لانڈھی میں شوہر نے ٹک ٹاک ویڈیوز بنانے پر بیوی اور ساس کو جبکہ شاہ لطیف ٹاؤن میں بھائی نے فائرنگ کر کے بہن کو قتل کر ڈالا۔

اے آر وائی نیوز کے مطابق کراچی کے علاقے لانڈھی میں اسحاق نامی ملزم نے ٹک ٹاک ویڈیوز بنانے پر بیوی اور ساس کو قتل کیا اور فرار ہوگیا۔

پولیس حکام کے مطابق ملزم کا ٹک ٹاک کے معاملے میں اکثر بیوی سے جھگڑا رہتا تھا، مقتولہ رمشا کی ٹک ٹاک پر صبا خان کے نام سے آئی ڈی تھی۔

پولیس کے مطابق نشے کے عادی شوہر نے ٹک ٹاک ویڈیو بنانے اور دوسرے لڑکوں سے دوستی کے معاملے پر اپنی ساس سے بات کی اور جب انہوں نے بھی بیٹی کو نہ روکا تو اُس نے دونوں کو قتل کردیا۔ پولیس نے ملزم کی تصویر حاصل کر کے گرفتاری کی کوششیں شروع کردیں۔

دوسری جانب شاہ لطیف ٹاؤن میں بھائی نے اپنی بہن کو فائرنگ کر کے قتل کردیا، مقتولہ کی شناخت زینب کے نام سے ہوئی۔

پولیس نے بتایا کہ مقتولہ کے بھانجے کی شادی کی تقریب جاری تھی، اس دوران دو بھائیوں نے مل کر زینب کو فائرنگ کر کے قتل کیا، جس میں سے ایک گرفتار ہوگیا جبکہ دوسرا مفرور ہے۔

کراچی: شہر قائد کے علاقے اسٹیل ٹاؤن سے گزشتہ روز ملنے والی بوری بند لاش کا معمہ حل ہوگیا۔

اے آر وائی نیوز کے مطابق کراچی کے علاقے اسٹیل ٹاؤن کی ندی سے ایک روز قبل بوری بند لاش ملی، جسے پولیس نے تحویل میں لے کر ضابطے کی کارروائی کے لیے اسپتال منتقل کردیا تھا۔

پولیس حکام کے مطابق لاش کو  کرین کی مدد سے کھدائی کر کے نکالا گیا تھا۔  پولیس حکام کے مطابق مقتول کی شناخت دین محمد کے نام سے ہوئی، جس کا آبائی تعلق بلوچستان کے علاقے جعفرآباد سے تھا۔

پولیس نے واقعے کی تحقیقات کے لیے کمیٹی تشکیل دی۔ اہل خانہ کی جانب سے ریکارڈ کرائے گئے بیان کی روشنی میں یہ بات سامنے آئی کہ مقتول کو خاندانی دشمنی کی بنیاد پر قتل کیا گیا۔

اہل خانہ کی شکایت پر حکام نے بلوچستان پولیس سے رابطہ کیا، جس پر ملزم کو جعفرآباد سے گرفتار کیا گیا۔ ملزم نے دورانِ تفتیش نوجوان کو قتل کرنے کا انکشاف کیا، اور اُسی کی نشاندہی پر لاش برآمد کی گئی تھی۔ ملزم نے بتایا کہ محمد دین کو قتل کرنے کے لیے اُس کی لاش بوری میں بند کر کے ندی میں پھینک دی تھی۔ پولیس حکام نے بتایا کہ ملزم مقتول کا رشتے دار ہے، جس نے غیرت کے نام پر محمد دین کو قتل کیا۔