کراچی: شہر قائد کے علاقے ناظم آباد میں مبینہ پولیس مقابلے میں عثمان نامی شہری جاں بحق ہوگیا۔
اے آر وائی نیوز کے مطابق کراچی کے علاقے ناظم آباد میں مبینہ پولیس مقابلہ ایک اور شہری کی جان لے گیا، پولیس اہلکاروں کا دعویٰ ہے کہ چپس فروش کو منشیات فروشوں کی گولی لگی، واقعے کے خلاف مشتعل شہری سراپا احتجاج بن گئے۔
پولیس کے مطابق ناظم آباد میں فائرنگ کا واقعہ کابلی بازار میں پیش آیا، 4 اہلکار انٹیلی جنس اطلاعات پر علاقے میں گئے تھے، منشیات فروشوں نے پولیس اہلکاروں کی تعداد کم دیکھ کر حملہ کیا، ایک اہلکار کے پاس پستول تھا اس کی جانب سے بھی جوابی فائرنگ کی گئی، دو طرفہ فائرنگ کی زد میں آکر چپس فروش ہلاک ہوگیا۔
پولیس کا کہنا ہے کہ منشیات فروشوں نے ایک اہلکار کو پکڑ کر تشدد کا نشانہ بنایا، پولیس اہلکار بمشکل جان بچا کر علاقے سے نکلے۔
پولیس کے مطابق منشیات فروش اور ان کے حامی افراد الزام پولیس پر ڈالنے کی کوشش کررہے ہیں، معاملے کی باریک بینی سے تحقیقات کررہے ہیں۔
مقتول کے بھتیجے کا کہنا ہے کہ پولیس مقابلے کے دوران میرے چچا کو گولی لگی، منشیات فروشوں کے خلاف آپریشن میں پولیس نے فائرنگ کی۔
اہلخانہ کا کہنا ہے کہ مقتول عثمان کے پانچ بچے ہیں، لاش عباسی اسپتال لے کر پہنچے تو ایم ایل او ہی موجود نہیں تھا۔
مقتول کے اہلخانہ کا کہنا ہے کہ صرف پولیس نے فائرنگ کی اور کسی نے نہیں کی، ہم پولیس اور منشیات فروشوں پر مقدمہ درج کرانا چاہتے ہیں۔
