Author: سلمان لودھی

کراچی: شہر قائد کے علاقے سخی حسن پر واقع موبائل مارکیٹ کو ایس او پیز کی خلاف ورزی پر  عارضی طور پر سیل کردیا گیا۔

اے آر وائی نیوز کی رپورٹ کے مطابق مقامی انتظامیہ نے کرونا ایس او پیز کی خلاف ورزی پر موبائل مارکیٹ کو سیل کرنے کی کارروائی کی تو دکانداروں نے پولیس اہلکاروں کے ساتھ جھگڑا شروع کردیا۔

پولیس اہلکاروں اور دکانداروں کے درمیان جھگڑا ہوا جس کے بعد صورت حال کشیدہ ہوئی تو دیگر تھانوں سے نفری کو طلب کیا گیا۔

پولیس حکام کے مطابق مارکیٹ یونین کے صدر اور دکانداروں نے قانونی کارروائی میں رخنہ ڈالنے کی کوشش کی اور جب انہیں سمجھایا گیا تو انہوں نے جھگڑا شروع کردیا۔

پولیس افسران نے صورت حال کشیدہ ہونے کے بعد سرینا موبائل مارکیٹ کے صدر اور دکانداروں سے مذاکرات کیے جس کے بعد وہ منتشر ہوگئے۔ دکان داروں نے دعویٰ کیا کہ اُن کے کچھ ساتھیوں کو گرفتار کر کے تیموریہ تھانے منتقل کیا گیا ہے۔

موبائل مارکیٹ کی یونین اور دیگر دکان دار ساتھیوں کی رہائی کے لیے  تیموریہ تھانے پہنچے جہاں انہوں نے پولیس اسٹیشن کے باہر دھرنا دیا۔

رپورٹ کے مطابق ضلعی انتظامیہ نے اس ساری صورت حال کے بعد موبائل مارکیٹ کو عارضی طورپر سیل کر کے داخلی دروازوں پر نوٹی فکیشن چسپاں کردیا۔

کراچی میں 17 سالہ لڑکی نے گھر میں گولی مار کر خودکشی کر لی۔

ریسکیو ذرائع کے مطابق واقعہ گلبرگ بلاک 12 میں پیش آیا جہاں گھر میں لڑکی نے خود کو گولی ‏مار کر زندگی کا خاتمہ کر لیا۔

اطلاع ملنے پر ریسکیو ٹیم نے لاش کو ایمبولینس کے ذریعے عباسی شہید اسپتال منتقل کیا جہاں ‏لڑکی کی شناخت لائبہ دختر اقبال کے نام سے ہوئی۔

پولیس نے ضابطے کی کارروائی کے بعد لاش کو اہل خانہ کے حوالے کر دیا ہے اور واقعے سے ‏متعلق شواہد اکٹھے کر لیے ہیں۔

دوسری جانب منظور کالونی میں ایک شخص نے خودکشی کر لیا، 28 سالہ فرقان کی پھندا لگی ‏لاش گھر سے ملی۔ پولیس نے لاش تحویل میں لےکر کارروائی شروع کر دی ہے۔

کراچی: شہر قائد کے علاقے سائٹ ایریا میں رکن سندھ اسمبلی کے دفتر کے باہر سے دستی بم برآمد ہوا، پولیس حکام کے مطابق دستی بم اندر سے خالی تھا۔

اے آر وائی نیوز کی رپورٹ کے مطابق کراچی کے علاقے سائٹ ایریا میں واقع پٹھان کالونی میں تحریک انصاف کے رکن سندھ اسمبلی سعید آفریدی کے دفتر کے قریب سے دستی بم برآمد ہوا۔

پولیس حکام نے بم برآمدگی کی تصدیق کی اور بتایا کہ ہینڈ گرینڈ کو پلاسٹک کی تھیلی میں چھپا کر رکھا گیا تھا۔ پولیس نے جائے وقوعہ پہنچنے کے بعد  حفاظتی اقدامات کے تحت علاقہ مکینوں کو مذکورہ مقام سے دور کیا اور بم ڈسپوزل اسکواڈ کے اہلکاروں کو طلب کیا۔

بم ڈسپوزل اسکواڈ کے عملے نے معائنے کے بعد پولیس حکام کو آگاہ کیا کہ تھیلی سے ایک خالی دستی بم اور بال برآمد ہوئی۔ بی ڈی ایس نے خالی دستی بم کو تحویل میں لے لیا۔

پولیس حکام کے مطابق  خاکروب کو گٹر سے شاپر ملا،جس میں دستی بم تھا تو اُس نے  فوری طور پر پولیس کو اطلاع دی، یہ تھیلی تحریک انصاف کے دفتر کے کافی فاصلے پر موجود تھی۔

دوسری جانب تحریک انصاف کے رکن سندھ اسمبلی نے اس حوالے سے بیان جاری کیا، جس میں اُن کا کہنا تھا کہ ’شہر میں ایک بار پھر دہشت گردی بڑھ رہی ہے، ہم ان اوچھے ہتھکنڈوں سے ڈرنے والے نہیں ہیں‘۔ اُن کا کہنا تھا کہ ’دہشت گردوں کےحملے میں والد سمیت خاندان7 کےافراد شہید ہوچکے ہیں۔

سعید آفریدی کا کہنا تھا کہ دو روزقبل اورنگی ٹاؤن پانچ نمبر کے قریب رینجرز کی گاڑی پر بھی حملہ کیا گیا، ہم دہشت گردی کےحوالے سے سندھ حکومت کو آگاہ کرچکےہیں، اُس کے باوجود حکومت نے سیکیورٹی واپس لے لی ہے۔

رکن اسمبلی کا کہنا تھا کہ ’شہداکی قربانیوں سے قائم ہونے والے امن خراب ہونے نہیں دیں گے، سندھ حکومت امن امان سمیت ہر چیز میں مکمل ناکام ہوچکی ہے، ڈی جی رینجرز شہرکےحالات پر فوری نوٹس لیں۔

واضح رہے کہ سعید آفریدی سندھ اسمبلی کے حلقہ پی ایس 120 (ویسٹ) سے 2018 کے انتخابات میں تحریک انصاف کے رکن اسمبلی منتخب ہوئے۔

کراچی: شہر قائد کے علاقے اورنگی ٹاؤن میں رینجرز پر حملے میں استعمال ہونے والی موٹر سائیکل سے متعلق اہم حقائق سامنے آگئے۔

اے آر وائی نیوز کی رپورٹ کے مطابق کراچی کے علاقے اورنگی ٹاؤن میں رینجرز پر حملے میں استعمال ہونے والی موٹر سائیکل کی چوری کا مقدمہ پولیس نے تخریب کاری میں استعمال کے بعد درج کیا، 70 سالہ موٹر سائیکل مالک کو حراست میں لیا گیا تو پولیس کو مقدمے کا ہوش آیا، موٹر سائیکل مجاہد کالونی سے 14 دن پہلے چوری ہوئی تھی۔

واضح رہے کہ اورنگی ٹاؤن میں گزشتہ روز رینجرز موبائل پر حملہ کیا گیا تھا، دھماکے میں 2 رینجرز اہلکار شہید اور 8 افراد زخمی ہوئے تھے۔

ذرائع کے مطابق موٹر سائیکل چوری ہونے پر شہری تھانے کے چکر لگاتا رہا لیکن پولیس کی جانب سے مقدمہ درج نہیں کیا گیا تھا۔

مزید پڑھیں: کراچی: رینجرز پر حملے کی ایک اور سی سی ٹی وی فوٹیج سامنے آ گئی

موٹر سائیکل کے مالک رمضان کا کہنا تھا کہ 3 مارچ کی شام موٹر سائیکل گھر کے باہر کھڑی کی تھی، رات ساڑھے 11 بجے کے قریب دیکھا تو موٹر سائیکل موجود نہ تھی، رات 12 بجے ون فائیو پر اطلاع دی، 15 منٹ بعد تھانے طلب کیا گیا۔

متاثرہ شہری کا کہنا تھا کہ تھانے پہنچنے کے باوجود پولیس نے مقدمہ درج نہیں کیا، گزشتہ روز مقدمہ درج کرنے کے بعد مجھے رہا کیا گیا۔

یاد رہے کہ تفتیشی حکام کا کہنا تھا کہ دھماکے سے چند منٹ قبل 2 حملہ آوروں نے موٹر سائیکل لا کر کھڑی کی تھی، ایک حملہ آور دور چلا گیا، دوسرا رینجرز موبائل آنے تک لوگوں کو وہاں سے ہٹاتا رہا، خیال رہے کہ دھماکے کے مقام سے کچھ ہی فاصلے پر رینجرز اور پولیس کی مشترکہ پکٹ لگی ہوئی تھی۔

کراچی کے علاقے اولڈ سٹی میں اسکول سے گھر جاتی طالبہ کو سرِراہ ہراساں کرنے والے ملزم کو ‏پولیس نے گرفتار کرنے کے بعد چھوڑ دیا۔

تفصیلات کے مطابق موٹر سائیکل سوار کی اسکول سے آتی بچی سے دست درازی کا واقعہ پیش آیا ‏جس کی سی سی ٹی وی فوٹیج سامنے آنے پر پولیس نے ایکشن لیتے ہوئے ملزم کو شناخت کر کے ‏اسے گرفتار کیا۔

پولیس نےملزم کو تھانےمنتقل کیا جس کی شناخت اویس کے نام سے ہوئی۔ پولیس کا کہنا ہے کہ ‏مقدمہ کےاندراج کیلئے طالبہ کے والدین کو تھانے بلایا لیکن وہ نہیں آئے جس کے بعد ملزم کو ‏چھوڑ دیا گیا۔

پولیس کا کہنا ہے کہ واقعہ چند روز قبل پیش آیا اور پولیس نے ازخود نوٹس لیتے ہوئے ملزم کو گرفتار کیا لیکن متاثرہ طالبہ کے اہل خانہ تھانے نہیں آئے، مدعی کے انکار پر واقعے کا مقدمہ درج نہیں کیا جا سکا۔