Author: سلمان لودھی

کراچی: شہر قائد کے علاقے بنارس میں حساس ادارے اور پولیس نے مشترکہ کارروائی کرتے ہوئے کالعدم تنظیموں سے تعلق رکھنے والے 4 مبینہ دہشت گردوں کو گرفتار کرلیا۔

اے آر وائی نیوز کی رپورٹ کے مطابق کراچی کے علاقے بنارس میں حساس ادارے اور کاؤنٹر ٹیرر ازم ڈپارٹمنٹ (سی ٹی ڈی) نے مشترکہ کارروائی کرتے ہوئے کالعدم تنظیموں سے تعلق رکھنے والے 4 مبینہ دہشت گردوں کو گرفتار کرلیا۔

سی ٹی ڈی حکام کے مطابق گرفتار 3 مبینہ دہشت گردوں کا تعلق کالعدم تحریک طالبان اور ایک کا بی ایل اے سے ہے، چاروں دہشت گرد افغانستان سے بلوچستان کے راستے کراچی پہنچے تھے۔

پولیس کے مطابق کالعدم بی ایل اے کا مبینہ دہشت گرد بارودی مواد، بم بنانے کا سامان لے کر پہنچا تھا، کراچی پہنچ کر کالعدم ٹی ٹی پی کے مبینہ دہشت گرد بنارس پر ایک سرائے میں مقیم تھے۔

مزید پڑھیں: ایم کیو ایم لندن کے 5 ٹارگٹ کلر گرفتار

سی ٹی ڈی حکام کے مطابق دہشت گردوں کی نشاندہی پر 60 میٹر ڈیٹونیٹنگ وائرز، 16 ڈیٹونیٹرز اور اسلحہ برآمد کرلیا گیا ہے۔

پولیس کا کہنا ہے کہ چاروں دہشت گردوں کو افغانستان میں دہشت گردی کی ٹریننگ دی گئی ٹریننگ کے بعد انہیں کراچی میں دہشت گردی کا ٹاسک دے کر بھیجا گیا تھا، مبینہ دہشت گردوں کو سماجی ویب سائٹ کی ایک آئی ڈی اور پاس ورڈ بھی دیا گیا تھا، اسی آئی ڈی پر انہیں حملے کے لیے ٹارگٹ دیا جاتا تھا۔

سی ٹی ڈی حکام کا کہنا ہے کہ کالعدم تحریک طالبان، کالعدم بی ایل اے مل کر دہشت گردی کرنا چاہتے تھے، گرفتار مبینہ دہشت گرد میڈیا اور سوشل میڈیا کو خصوصی طور پر مانیٹر کرتے تھے اور ماضی میں بھی دہشت گردی کی کئی وارداتوں میں ملوث ہیں۔

کراچی: کاؤنٹر ٹیررازم ڈیپارٹمنٹ (سی ٹی ڈی) نے کراچی میں کارروائی کرتے ہوئے مفتی عبداللہ پر قاتلانہ حملے میں ملوث مفرور ملزم کو گرفتار کرلیا۔

اے آر وائی نیوز کی رپورٹ کے مطابق کراچی میں فرقہ وارانہ دہشت گردی کا بین الاقوامی نیٹ ورک بے نقاب ہوگیا، کراچی کے علاقے جمشید کوارٹرز میں مفتی عبداللہ پر قاتلانہ حملے میں ملوث مفرور ملزم گرفتار کرلیا گیا، ذرائع سی ٹی ڈی کا کہنا ہے کہ ملزم حارث عرف فرحان نے حوالہ ہنڈی سے فنڈنگ بھی ظاہر کردی۔

سی ٹی ڈی ذرائع کا کہنا ہے کہ ملزم کی گرفتاری سے بیرون ملک موجود ساتھی بھی بے نقاب ہوئے، ملزمان کو شہر میں فرقہ واریت کا ٹاسک دیا گیا تھا، ملزمان کو مذہبی شخصیات کو ٹارگٹ کرنے کے لیے حوالہ ہنڈی سے رقم منتقل ہوئی۔

ذرائع سی ٹی ڈی کے مطابق ملزمان کا منصوبہ پہلے ہی ٹارگٹ میں ناکام ہوگیا تھا، مفتی عبداللہ پر حملے کے دوران ملزم مدثر میمن پکڑا گیا تھا۔

مزید پڑھیں: کراچی میں فائرنگ سے پیش امام زخمی

پولیس کا کہنا ہے کہ حملے میں ملوث ملزم فرحان موقع سے فرار ہوگیا تھا، سی ٹی ڈی نے 14 دن بعد ملزم حارث لنگڑا عرف فرحان کو گرفتار کرلیا۔

سی ٹی ڈی حکام کے مطابق بیرون ملک سے مذہبی فساد کے لیے ٹاسک اور حوالہ ہنڈی سے رقم منتقل کی گئی تھی، ملزمان مفتی عبداللہ کو نہیں جانتے تھے، ریکی کے لیے نمازیوں کا روپ دھارا، ملزمان نے مسجد سبحانی میں مفتی عبداللہ کا خطاب بھی سنا تھا۔

یاد رہے جمشید روڈ ایک نمبر میں موٹر سائیکل سوار دو ملزمان نے فائرنگ کرکے مسجد کے پیش امام کو زخمی کردیا تھا ،جن کی شناخت مولانا عبداللہ کے نام سے ہوئی تھی۔

واقعے کے بعد علاقہ مکینوں اور سیکیورٹی گارڈز نے ایک مبینہ ملزم کو پکڑ لیا تھا اور دوسرا فرار ہوگیا تھا۔

کراچی: شہر قائد کے علاقے زمان ٹاؤن میں غیرت کے نام پر خاتون کو قتل کردیا گیا۔

اے آر وائی نیوز کے مطابق کراچی کے علاقے زمان ٹاؤن میں بھائی نے غیرت کے نام پر بہن کو قتل کردیا، پولیس نے بروقت کارروائی کرتے ہوئے ملزم کو گرفتار کرلیا۔

پولیس کے مطابق مقتولہ کی شناخت 20 سالہ انعم کے نام سے ہوئی ہے، خاتون کی لاش کو ضابطے کی کارروائی کے لیے اسپتال منتقل کردیا گیا ہے۔

پولیس کا کہنا ہے کہ مقتولہ کو سگے بھائی 28 سالہ سہیل زمان نے قتل کیا، ملزم نے پہلے گلا دبایا پھر فائرنگ کرکے بہن کو قتل کیا۔

زمان ٹاؤن پولیس کا کہنا ہے کہ گرفتار ملزم سے مزید تفتیش جاری ہے۔

مزید پڑھیں: کراچی میں غیرت کے نام پر خاتون سمیت 2 افراد قتل

واضح رہے کہ دو ماہ قبل کراچی کے علاقے ابراہیم حیدری میں بھائی نے فائرنگ کرکے بہن اور اس کے ساتھی کو قتل کردیا تھا۔

پولیس کا کہنا تھا کہ فائرنگ سے مقتولہ کے 2 بچے بھی معمولی زخمی ہوئے ہیں جنہیں طبی امداد کے لیے اسپتال منتقل کردیا گیا ہے، بچوں کی عمریں 5 اور 6 سال ہیں۔

ابراہیم حیدری پولیس کا کہنا تھا کہ جائے وقوعہ سے 30 بور کی گولیوں کے خول تحویل میں لے لیے گئے ہیں، عینی شاہدین کے بیانات قلمبند کیے جارہے ہیں جبکہ ملزم کی گرفتاری کے لیے ٹیمیں تشکیل دے دی گئی ہیں۔