ARYNews.tv | Urdu – Har Lamha Bakhabar

Author: سلمان لودھی

  • کراچی، سیوریج لائن ٹوٹنے کے باعث مسافر بس گڑھے میں پھنس گئی

    کراچی، سیوریج لائن ٹوٹنے کے باعث مسافر بس گڑھے میں پھنس گئی

    کراچی کے علاقے نیپا میں سڑک پر سیوریج کا پانی جمع ہوگیا، جس کے باعث وہاں موجودو گڑھے میں مسافر بس پھنس گئی۔

    اے آر وائی نیوز کے مطابق نیپا کے قریب سیوریج کا پانی بڑی مقدار میں سڑک پر جمع ہے جس سے نہ صرف ٹریفک کی روانی متاثر ہورہی ہے بلکہ آس پاس دکانداروں کو بھی شدید مسائل کا سامنا ہے، اس روٹ سے گزرنے والی مسافر بس سڑک پرموجود گڑھےمیں پھنس گئی۔

    نئی سبزی منڈی میں سیوریج لائن میں ہولناک دھماکا، دل دہلا دینے والی فوٹیج سامنے آ گئی

    یونیورسٹی روڈ پر ہونے والے ترقیاتی کام کے دوران سیوریج لائن پھٹی جس سے سڑک پر پانی جمع ہوا اور رش کے اوقات میں بدترین ٹریفک جام ہوگیا۔

    مسافر بس پھنسنے کے بعد وہاں کرین طلب کی گئی ہے تاکہ بس کو وہاں سے نکالا جاسکے، ٹریفک پولیس نے اس حوالے سے اتنا ہی بتایا کہ نیپا سے حسن اسکوائر جانے والی سڑک پر پانی جمع ہے۔

    https://urdu.arynews.tv/a-passenger-bus-going-from-khanpur-to-karachi-caught-fire/

  • ایف آئی اے کا چھاپہ : کروڑوں کی کرنسی اور سونے کے 17 بسکٹ برآمد

    ایف آئی اے کا چھاپہ : کروڑوں کی کرنسی اور سونے کے 17 بسکٹ برآمد

    کراچی : ایف آئی اے نے حوالہ ہنڈی کے غیرقانونی کاروبار میں ملوث ملزمان کے دفتر سے کروڑوں روپے اور سونے کے متعدد بسکٹس برآمد کرلیے۔

    اے آر وائی نیوز کی رپورٹ کے مطابق وفاقی تحقیقاتی ادارے (ایف آئی اے) کے کارپوریٹ کرائم سرکل نے کراچی کے علاقے صدر میں قائم ایک دفتر میں حوالہ ہنڈی کے غیرقانونی کاروبار کیخلاف بڑی کارروائی کی ہے۔

    ایف آئی اے کے عملے نے کارروائی کے دوران ساڑھے 11 کروڑ روپے برآمد کیے گئے، اس کے علاوہ صدر میں قائم دفتر سے17 سونے کے بسکٹ بھی ملے، ہربسکٹ 10تولے کا ہے۔

    ایف آئی اے کے مطابق تحقیقات میں انکشاف ہوا ہے کہ حوالہ ہنڈی کے ذریعے بیرون ملک رقم بھیجی اور وصول کی جاتی تھی، ملزمان دھندہ طویل عرصے سے کررہے تھے۔

    ایف آئی اے نے مطلوبہ ملزمان سلیم اور باسط کی گرفتاری کے لیے چھاپہ مارا، مطلوبہ ملزمان کی گرفتاری ابھی تک عمل میں نہیں آسکی تاہم صدر میں دفتر سے 5 ملزمان کو گرفتار کرکے ان کیخلاف کسٹم ایکٹ کے تحت مقدمہ درج کرلیا۔

  • کراچی میں چوبیس گھنٹوں میں تیز رفتار ڈمپر کے 3 حادثات پر ویڈیو رپورٹ

    کراچی میں چوبیس گھنٹوں میں تیز رفتار ڈمپر کے 3 حادثات پر ویڈیو رپورٹ

    کراچی میں تیز رفتار ڈمپر کے حادثات کا سلسلہ جاری ہے، 24 گھنٹوں کے دوران 3 حادثات میں 2 افراد جاں بحق اور 3 زخمی ہو گئے، رواں برس ہیوی ٹریفک کے حادثات میں مرنے والوں کی تعداد 114 ہو گئی، اس ویڈیو رپورٹ میں حادثات کی تفصیل دیکھیں۔

    کراچی کی سڑکوں پر دوڑتے تیز رفتار ڈمپرز شہریوں کی موت کا سبب بننے لگے ہیں، کراچی کے مختلف علاقوں میں ڈمپر کے تین حادثات میں دو شہری زندگی کی بازی ہار گئے، سمن اباد کے علاقے میں تیز رفتار ڈمپر نے موٹر سائیکل سواروں کو کچل دیا، جس سے 12 سالہ لڑکا زندگی کی بازی ہار گیا، دو نوجوان زخمی ہوئے۔

    حادثات میں واٹر ٹینکر کے سائز کا کیا کردار ہے؟ ویڈیو رپورٹ میں دیکھیں

    سپر ہائی وے پر تیز رفتار ڈمپر کی ٹکر سے موٹر سائیکل سوار شہری جان سے گیا، بورڈ آفس کے قریب کچرہ اٹھانے والے ٹرک نے رکشے کو کچل دیا، جس سے ڈرائیور شدید زخمی ہو گیا، جسے تشویش ناک حالت میں عباسی شہید اسپتال منتقل کیا گیا۔

    ملٹی میڈیا – ویڈیو خبریں دیکھنے کے لیے کلک کریں

  • میں نے بڑے بھائی کو گردہ دیا تھا، آج ڈاکوؤں نے اسے مار ڈالا، بھائی کی دُہائی

    میں نے بڑے بھائی کو گردہ دیا تھا، آج ڈاکوؤں نے اسے مار ڈالا، بھائی کی دُہائی

    کراچی : لانڈھی میں ڈاکوؤں نے مزاحمت پر ایک شہری کو فائرنگ کرکے قتل کردیا، مقتول چھوٹے بھائی کے عطیہ کیے گئے گردے پر زندگی گزار رہا تھا۔

    اے آر وائی نیوز کی رپورٹ کے مطابق کراچی کے علاقے لانڈھی نمبر 4 کے قریب ڈکیتی میں مزاحمت پر فائرنگ سے شہری کی ہلاکت کا واقعہ پیش آیا ہے۔

    مقتول کے اہل خانہ نے میڈیا کو بتایا کہ شاہ فہد 2 بچوں کا باپ اور شیر شاہ کباڑی مارکیٹ میں کمپریسر بنانے کا کام کرتا تھا۔

    اہل خانہ کے مطابق علاقے میں اس وقت بجلی نہیں تھی جس کا فائدہ اٹھا کر موٹرسائیکل سوار 2 ملزمان نے لوٹ مار کی واردات کی۔

    مقتول شاہ فہد کے بھائی نے بتایا کہ میں نے بڑے بھائی فہد کو ایک گردہ دیا تھا آج ڈاکوؤں نے اس کی بھی جان لے لی۔

    علاوہ ازیں لیاقت آباد سپرمارکیٹ کے علاقے میں مبینہ پولیس مقابلہ ہوا ہے جس میں 2 ملزمان کو گرفتار کیا گیا ہے، ملزمان کے قبضے سے اسلحہ اور لوٹا ہوا سامان برآمد کرلیا گیا ہے۔

    واضح رہے کہ شہر قائد کراچی میں رواں برس کے ساڑھے چار ماہ میں اب تک 40 شہری ڈکیتی میں مزاحمت کے دوران جان کی بازی ہار چکے ہیں۔

    کراچی : 2 بہنوں کا اکلوتا بھائی ڈاکوؤں کی فائرنگ سے جاں بحق

    یاد رہے کہ اس سے قبل گزشتہ روز ہی لانڈھی میں ڈاکوؤں نے ایک معصوم کی جان لی تھی جبکہ فائرنگ سے اس کی خالہ بھی زخمی ہوگئی، 10 سالہ امین دو بہنوں کا اکلوتا بھائی تھا۔

    لانڈھی 89 میں ڈکیتوں نے نوجوان سے موٹر سائیکل چھینتے ہوئے اندھا دھند فائرنگ کردی، جس سے گلی میں موجود 10 سالہ امین گردن پر گولی لگنے سے موقع پر ہی دم توڑ گیا۔

    پولیس کا کہنا تھا کہ فائرنگ کے واقعے میں نوجوان کی خالہ ناصرہ بی بی بھی زخمی ہوئی، جنہیں تشویش ناک حالت میں جناح اسپتال منتقل کر دیا گیا ہے تاہم فرار ملزمان کی تلاش جاری ہے۔

  • ویڈیو رپورٹ: باپ کی بوری بند لاش موٹر سائیکل پر لے جانے کا دل دہلا دینے والا واقعہ

    ویڈیو رپورٹ: باپ کی بوری بند لاش موٹر سائیکل پر لے جانے کا دل دہلا دینے والا واقعہ

    کراچی کے علاقے ایف بی ایریا میں بیٹوں نے مل کر باپ کو قتل کر ڈالا تھا، مقتول خاور انجم کو قتل کرنے کے بعد جب بیٹے اس کی لاش بورے میں ڈال کر موٹر سائیکل پر کچرا کنڈی پھنکے نکلے تو راستے میں جوہر اباد پولیس کے ہاتھوں پکڑے گئے۔

    مقتول خاور انجم حکیم تھا اور آبائی تعلق میر پور خاص سے تھا، خاور انجم کو اس کے بیٹوں ابراہیم اور افضل نے تشدد اور گلا گھونٹ کر قتل کیا تھا، گرفتار ملزمان کہتے ہیں والد کے طعنوں سے پریشان ہو گئے تھے۔

    گرفتار ملزمان ابراہیم اور افضل کراچی کی جامعات میں تعلیم حاصل کر رہے ہیں، جن کے خلاف قتل کا مقدمہ درج کر لیا گیا ہے۔

    صندوق سے ملنے والی لاش کس کی تھی؟ زیورات اور 50 ہزار کی رقم کہاں گئی؟ ویڈیو رپورٹ

    ملٹی میڈیا – ویڈیو خبریں دیکھنے کے لیے کلک کریں

  • کراچی میں باپ کو قتل کرنے والے بیٹوں کے تفتیش میں تہلکہ خیز انکشافات

    کراچی میں باپ کو قتل کرنے والے بیٹوں کے تفتیش میں تہلکہ خیز انکشافات

    کراچی کے علاقے فیڈرل بی ایریا بلاک 14 میں باپ کو قتل کرنے والے بیٹوں نے تفتیش میں تہلکہ خیز انکشافات کردیے۔

    اے آر وائی نیوز کے مطابق ملزم بیٹوں نے دوران تفتیش پولیس کو بتایا کہ مقتول نے انہیں میرپورخاص سے کراچی بلایا اور روزگار کے لیے کہتا تھا، والد نے چند دنوں قبل مارا پیٹا بھی تھا۔

    بیٹوں نے دوران تفتیش بتایا کہ 60 سالہ والد خاور انجم کو کولڈرنک میں چوہے مار دوا پلا کر بے ہوش کیا، گلے پر چھری پھیر کر قتل کیا پھر جسم کے ٹکڑے کرنے کی بھی کوشش کی۔

    ملزمان نے بتایا کہ لاش کو کسی جگہ پھینکنا چاہتے تھے، گھر سے نکلنے لگے تو چوکیدار نے روکا اور پوچھا بورے میں کیا ہے، بتایا کہ سامان ہے جس کو پنجاب بھیجنا ہے۔

    یہ پڑھیں: باپ کی لاش بوری میں ڈال کر لے جانے والے بیٹے پکڑے گئے

    بیٹوں کے مطابق راستے میں پولیس مل گئی وہ سمجھی کہ بورے میں گٹکا یا ماوا ہے جب تلاشی لی گئی تو لاش نکلی۔

    تفتیشی حکام کا کہنا ہے کہ چوکیدار کا بیان بھی قلمبند کرلیا گیا ہے۔

    پولیس حکام نے بتایا ہے کہ مقتول پیشے کے اعتبار سے حکیم تھا، اور اپنے بیٹوں کے ساتھ مدرسے میں رہائش پذیر تھا۔

    پولیس کا کہنا ہے کہ گرفتار ملزمان کے نام ابراہیم اور افضل ہیں، جن سے مزید تفتیش کی جا رہی ہے۔

    کراچی کی خبریں

  • جناح اسپتال کے باہر ہوٹل میں فائرنگ کے واقعے میں بڑی پیشرفت

    جناح اسپتال کے باہر ہوٹل میں فائرنگ کے واقعے میں بڑی پیشرفت

    کراچی : جناح اسپتال کے قریب ہوٹل میں فائرنگ کے واقعہ کی تحقیقات میں نیا موڑ آگیا، فائرنگ کرنے والا ملزم ذہنی مریض نکلا جس کا آبائی تعلق بنوں سے ہے۔

    اس حوالے سے پولیس حکام کا کہنا ہے کہ ملزم زاہد علی کے اہلخانہ سے رابطہ ہوا ہے، اہلخانہ کے مطابق ملزم کا نفسیاتی ڈاکٹر سے علاج بھی کرایا گیا تھا۔

    ملزم زاہد علی کچھ عرصے سے کراچی میں رہائش پذیر تھا، ملزم کے اہلخانہ سے نفسیاتی ڈاکٹر کے علاج کی تفصیلات اور میڈیکل سرٹیفکیٹ منگوائے ہیں۔

    پولیس کے مطابق تاحال ملزم کا کوئی رشتہ دار کراچی نہیں پہنچا ہے، گزشتہ روز چائے کے ہوٹل پر اندھا دھند فائرنگ سے ایک شخص قتل اور 3 زخمی ہوگئے تھے۔

    واقعے میں جاں بحق ہونے والا عمران اپنے عزیز سے ملنے آیا تھا جس کے ہاں بچے کی پیدائش ہوئی تھی، ہوٹل پر چائے پیتے ہوئے عمران فائرنگ کی زد میں آکرجاں بحق ہوگیا تھا۔

    ملزم زاہد علی نے فائرنگ کرکے خود کو میزنائن فلور پر جاکر گولی مارکر خودکشی کرلی تھی، واقعے کے 2 مقدمات صدر تھانے میں درج ہیں۔

    مزید پڑھیں : جناح اسپتال کے باہر ہوٹل پر فائرنگ، 1 جاں بحق، ملزم نے بھی خود کشی کرلی

    فائرنگ سے زخمی ہونے والے 3 افراد میں سے 2 کی حالت انتہائی تشویشناک ہے، ملزم، مقتول اور زخمیوں کا آپس میں کوئی تعلق نہیں، نہ ہی کوئی کسی کو جانتا ہے، موبائل فون ریکارڈ سے بھی تمام افراد کا آپس میں کوئی تعلق نہیں نکلا۔

  • کراچی : کھدائی کے دوران 5 گاڑیاں گڑھے میں جاگریں

    کراچی : کھدائی کے دوران 5 گاڑیاں گڑھے میں جاگریں

    کراچی : پلاٹ کی کھدائی کے دوران دیوار گرنے سے 5 گاڑیاں گڑھے میں گرگئیں، واقعے کے بعد مزدوراور ٹھیکیدار بھاگ کھڑے ہوئے۔

    اے آر وائی نیوز کی رپورٹ کے مطابق کراچی کے علاقے گارڈن ویسٹ جیلانی مسجد کے قریب زیرتعمیر عمارت کیلئے کھدائی کے دوران حادثہ پیش آیا ہے۔

    ہیوی مشینری کے استعمال سے برابر والے پلاٹ کی دیوار گرگئی، جس کے بعد 5 گاڑیاں گڑھے میں جاگریں۔

    اس حوالے سے علاقہ مکینوں نے بتایا کہ زیرتعمیر عمارت پر کام کرنے والے مزدور اور ٹھیکیدار موقع سے فرار ہوگئے۔

    حادثے کی اطلاع ملتے ہی پولیس جائے وقوعہ پہنچ گئی، پولیس کا کہنا ہے کہ زیرتعمیر عمارت کے برابر والے پلاٹ پر علاقہ مکینوں نے اپنی گاڑیاں پارک کر رکھی تھیں۔

    علاقہ مکینوں کا کہنا ہے کہ حادثے کے باعث کروڑوں روپے مالیت کی گاڑیوں کو شدید نقصان پہنچا اس کا ازالہ کیا جائے۔

  • کراچی : مشتعل وکلاء سراپا احتجاج، کورنگی روڈ پر بدترین ٹریفک جام

    کراچی : مشتعل وکلاء سراپا احتجاج، کورنگی روڈ پر بدترین ٹریفک جام

    کراچی میں ڈیفنس تھانے کے قریب وکلا کی جانب سے پولیس کے خلاف احتجاج کیا گیا جس کے نیتجے میں کورنگی روڈ پر ٹریفک جام کے باعث گاڑیوں کی طویل قطاریں لگ گئیں۔

    شہر قائد کے علاقے ڈیفنس میں پولیس اور وکلاء کے درمیان تنازع کے بعد وکلاء کی بڑی تعداد نے احتجاج کرکے گاڑیوں کی آمد و رفت معطل کردی۔

    رپورٹ کے مطابق کراچی کے علاقے ڈیفنس میں پولیس اہلکاروں کے مبینہ تشدد سے وکلا کے زخمی ہونے کا واقعہ اور پولیس افسران کے خلاف مقدمہ درج نہ کرنے پر وکلاء نے کورنگی روڈ پر احتجاج کیا۔

    مظاہرین نے ڈیفنس موڑ کے قریب میں روڈ پر دھرنا دے دیا، احتجاج کے باعث ٹریفک کی آمد ورفت شدید متاثر ہوئی اور گاڑیوں کی لمبی قطاریں لگ گئیں، شہریوں کو شدید مشکلات کا سامنا کرنا پڑا۔

    وکلا کے مطابق پولیس کی جانب سے چند روز قبل ڈیفنس تھانے کے اندر کئی لاء کے اسٹوڈنٹس کو تشدد کا نشانہ بنایا گیا تھا، جس میں سے ایک کی حالت تشویش ناک ہے اور وہ ہسپتال میں وینٹیلیٹر پر ہے۔

    مظاہرین وکلا کے مطابق پولیس نے یکطرفہ طور پر واقعے کا مقدمہ وکلا کے خلاف درج کیا، آج وکلا کی بڑی تعداد عدالتی احکامات لے کر ڈیفنس تھانے کے افسران کے خلاف مقدمہ درج کرانے پہنچی تھی ، تاہم پولیس نے ایف ائی ار درج کرنے سے انکار کر دیا۔

    جس کے بعد وکلا نے پہلے ڈیفنس تھانے پھر ڈیفنس موڑ کے قریب احتجاج کیا، جس کی وجہ سے کئی گھنٹوں سے  ٹریفک جام  اور گاڑیوں کی آمد و رفت معطل رہی۔

    وکلاء برادری نے مطالبہ کیا کہ ان کے کیس کا فوری طور پر ایف آئی آر درج کیا جائے تاکہ معاملے کا جلد حل نکالا جا سکے۔

    بعد ازاں ڈیفنس موڑ کے قریب وکلاء نے پولیس کے خلاف 3 گھنٹے بعد احتجاج ختم کردیا، وکلا پُرامن طور پر منتشر ہوگئے اور کورنگی روڈ کو عام ٹریفک کیلئے کھول دیا گیا،  احتجاج کے باعث اطراف کی سڑکوں پر بدترین ٹریفک  جام رہا۔

  • کراچی : دوپٹے پیکو کرنے والے نوجوان کو ڈاکوؤں نے مار ڈالا

    کراچی : دوپٹے پیکو کرنے والے نوجوان کو ڈاکوؤں نے مار ڈالا

    کراچی : شہر قائد میں ڈاکوؤں نے دوپٹے پیکو کرنے والے نوجوان کی زندگی چھین لی، کورنگی میں گھر کے باہر بیٹھے ثاقب سے موبائل فون چھین کر جان سے مار ڈالا۔

    اے آر وائی نیوز کی رپورٹ کے مطابق کراچی کے علاقے کورنگی ساڑھے 5 نمبر کے قریب فائرنگ کا واقعہ پیش آیا ہے جس میں ایک نوجوان جان کی بازی ہار گیا۔

    اس حوالے سے واقعے کے عینی شاہد نے پولیس کو بیان دیا کہ جاں بحق ہونے والا نوجوان ثاقب گھر کے باہر بیٹھا تھا کہ اس دوران 2 ڈاکوؤں نے آکر اس کو تھپڑ مارا اور موبائل فون بھی چھین لیا۔

    عینی شاہد کے مطابق مقتول اٹھ کر کھڑا ہوا تو ایک ڈاکو نے اسے گولی مار دی، مقتول کے کزن نے یہ منظر دیکھ کر شور مچایا تو ڈاکوؤں نے اسے بھی گولی مار دی اور فرار ہونے میں کامیاب ہوگئے۔ ڈاکو پہلے بھی واردات کرکے آرہے تھے۔

    زخمی ہونے والوں کو فوری طور پر جناح اسپتال پہنچایا گیا جہاں زیادہ خون بہہ جانے کے باعث اور زخموں کی تاب نہ لاتے ہوئے ثاقب جان کی بازی ہار گیا۔

    مزید پڑھیں : عید کی چھٹیوں پر گھر آئے نوجوان کو ڈکیتوں نے قتل کر دیا

    مقتول کے لواحقین نے پولیس کو بیان دیا کہ ثاقب ماموں کی دکان پر دوپٹے پر پیکو کا کام کرتا تھا، اسپتال پہنچنے تک ثاقب دم توڑ گیا، واقعے کے ایس پی لانڈھی ماجدہ ہالیپوٹو جناح اسپتال پہنچ گئیں۔