Author: سلمان لودھی

کراچی: شہر قائد میں ایک بار پھر فائرنگ اور پرتشدد واقعات میں تیزی آگئی ہے ، پولیس نے گینگ وار کے دوبارہ منظم ہونے کا خدشہ ظاہر کردیا۔

نمائندہ اے آر وائی نیوز کے مطابق کراچی کے علاقے پرانا گولیمار گٹر باغیچہ کے قریب فائرنگ کا واقعہ پیش آیا جس کے نتیجے میں ایک شخص جاں بحق اور دوسرا شدید زخمی ہوا۔

پولیس نے رضا کاروں کی مدد سے فائرنگ سے متاثر ہونے والے افراد کو سول اسپتال منتقل کردیا۔ لاش کو ضابطے کی کارروائی کے بعد لواحقین کے حوالے کیا جائے گا۔

پولیس حکام نے خدشہ ظاہر کیا ہے کہ واقعے میں لیاری گینگ وار کے کارندے ملوث ہوسکتے ہیں کیونکہ مذکورہ علاقے میں گینگ وار کا گروپ منظم انداز سے کام کررہا ہے اور ماضی میں یہاں پر منشیات فروشوں کے مسلح جھگڑا بھی ہوچکا ہے۔

قبل ازیں کورنگی کے سیکٹر فائیو میں فائرنگ کا واقعہ پیش آیا تھا جس میں نامعلوم افراد نے پولیس اہلکار کو فائرنگ کر کے زخمی کردیا تھا، پولیس اہلکار کو زخمی حالت میں جناح اسپتال منتقل کیا گیا جہاں ڈاکٹرز نے اب اُس کی حالت خطرے سے باہر قرار دی ہے۔

آئی جی سندھ مشتاق احمد مہر نے کورنگی سیکٹر5 میں فائرنگ سے پولیس اہلکار کے زخمی ہونے کے واقعہ کا نوٹس لیتے ہوئے ایس ایس پی کورنگی سے تمام تر ضروری پولیس کاروائی اور اقدامات پر مشتمل رپورت فی الفور طلب کرلی ہے۔

انہوں نے ہدایت کی کہ زخمی اہلکار کے علاج معالجے میں کوئی کسر نہ چھوڑی جائے متاثرہ اہلکار کے اہل خانہ سے مستقل رابطے کویقینی بنایا جائے۔انہوں نے کہا کہ پولیس اہلکار پر فائرنگ میں ملوث ملزمان کی جلد سے جلد گرفتاری کے لیئے دیگر سیکیورٹی اداروں سے رابطہ کیا جائے۔

کراچی: فیڈرل انویسٹی گیشن ایجنسی کے سائبر کرائم ونگ نے شہر قائد میں کارروائی کرتے ہوئے بچوں کی غیر اخلاقی ویڈیو بنانے میں ملوث ایک اور ملزم کو گرفتار کرلیا۔

نمائندہ اے آر وائی نیوز کے مطابق سائبر کرائم ونگ نے چائلڈ پورنو  گرافی کے خلاف گرینڈ آپریشن کا آغاز کیا ہوا ہے، اس ضمن میں پاکستان کے مختلف علاقوں سے کارروائیاں عمل میں لائی گئیں۔

سائبر کرائم ونگ کی ٹیم نے آج کراچی میں کارروائی کرتے ہوئے چائلڈ پورنو گرافی میں ملوث ایک اور ملزم کو گرفتار کیا۔

ایف آئی اے کے ترجمان کی جانب سے جاری اعلامیے کے مطابق گرفتار ہونے والے ملزم کی شناخت فراز خان کے نام سے ہوئی جو  بیرون ملک بھی چائلڈپورنوگرافی میں ملوث ہے۔

فیڈرل انویسٹی گیشن ایجنسی کے مطابق ملزم فرازخان گروہ کاسرگرم رکن اور کئی کارروائیوں میں ملوث رہا ہے۔ ملزم کی گرفتاری کو اہم سمجھا جارہا ہے اور امکان ہے کہ وہ تفتیش کے دوران اہم انکشافات کرے گا جن کی مدد سے اس غیر اخلاقی کام میں ملوث گروہ کا قلا قمع کیا جاسکے گا۔

مزید پڑھیں: بچوں کی غیراخلاقی ویڈیوز بنانے والا ملزم ارسلان سیالکوٹ سے گرفتار

یاد رہے کہ چار جولائی کو ایف آئی اے سائبر کرائم ونگ نے بڑی کارروائی کرتے ہوئے چائلڈ پورنو گرافی میں ملوث ارسلان نامی ملزم کو پنجاب کے شہر گوجرانوالہ سے گرفتار کیا تھا۔

ملزم کے قبضہ سے فحش ویڈیوز اور تصاویر کی صورت میں225 جی بی ڈیٹا بھی برآمد کیا گیا تھا۔ ایف آئی اے حکام کے مطابق ملزم کا سیالکوٹ میں فرنیچر شو روم تھا، جس میں اس نے ایک کمپیوٹر اور الیکٹرونک ڈیوائسز رکھی ہوئی تھی جن کو بھی قبضہ میں لے لیا گیا ہے۔

کراچی: شہر قائد کے علاقے جمشید روڈ پر نامعلوم افراد نے ڈاکٹر کی گاڑی پر فائرنگ کی جس میں خوش قسمتی سے کوئی جانی نقصان نہیں ہوا۔

نمائندہ اے آر وائی نیوز کے مطابق کراچی کے علاقے جمشید ٹاؤن تھانے کی حدود میں واقع اسلامیہ کالج کے قریب ڈاکٹر تبریز کی گاڑی پر نامعلوم افراد نے فائرنگ کی۔

ایس پی جمشید ٹاؤن کے مطابق نامعلوم افراد نے ڈاکٹر کی گاڑی کو روکا اور اُن سے نہ ہی موبائل مانگا اور نہ پرس، انہوں نے گاڑی پر دو گولیاں ماریں اور موٹرسائیکل پر بیٹھ کر آسانی سے فرار ہوگئے۔

ایس پی چمشید کے مطابق ڈاکٹر نے بتایا کہ ملزمان نے اپنے چہرے پر ماسک پہنے ہوئے تھے جس کی وجہ سے اُن کی شناخت نہیں ہوسکی۔

پولیس نے جمشید ٹاؤن تھانے میں واقعے کا مقدمہ درج کر کے تفتیش کا آغاز کردیا۔

یاد رہے کہ ایک روز قبل اورنگی ٹاؤن میں ایم کیو ایم کے رکن اسمبلی صداقت حسین کے گھر کے باہر فائرنگ کا واقعہ پیش آیا تھا جس کے نتیجے میں اُن کے بھائی اور بہنوئی زخمی ہوئے تھے۔

رکن سندھ اسمبلی کے مطابق ایک نوجوان کاغذات کی تصدیق کروانے اُن کے گھر آیا، وہ مہر لینے کے لیے واپس گئے تو فائرنگ کی آواز سنی، جب باہر آکر دیکھا تو بھائی اور بہنوئی دونوں زخمی پڑے ہوئے تھے۔

پاکستان بازار تھانے کی پولیس کے مطابق دونوں زخمیوں کو عباسی شہید اسپتال منتقل کیا گیا جہاں ڈاکٹرز نے اُن کی حالت خطرے سے باہر قرار دی تھی۔