Author: سلمان لودھی

کراچی: محکمہ داخلہ سندھ نے گزشتہ روز ڈبل سواری پر مکمل پابندی عائد کی تھی جس کے بعد استشنیٰ والے اداروں پر بھی پابندی کا اطلاق ہوا مگر سندھ پولیس کے اہلکاروں‌ نے پابندی کے احکامات کو ہوا میں‌ اڑا دیا۔

تفصیلات کے مطابق ایک روز قبل محکمہ داخلہ سندھ کی جانب سے موٹر سائیکل کی ڈبل سواری پر مکمل  پابندی عائد کرنے کا نوٹیفیکیشن جاری کیا گیا تھا۔

اس سے قبل سندھ حکومت نے صحافیوں، پولیس اور قانون نافذکرنے والے اداروں کو ڈبل سواری سے مستشنیٰ قرار دیا تھا جب کہ گزشتہ روز جاری ہونے والے نوٹی فکیشن میں‌ تمام محکموں سے خصوصی رعایت واپس لے لی تھی۔

محکمہ داخلہ کی جانب سے نوٹی فکیشن جاری ہونے کے بعد ایڈیشنل آئی جی غلام نبی میمن نے احکامات جاری کیے اور پابند کیا تھا کہ ڈبل سواری کی پابندی پر سختی سے عمل درآمد کیا جائے۔

مزید پڑھیں: کراچی: ڈبل سواری کی پابندی سے استثنیٰ ختم، صحافی اور پولیس اہل کار بھی پابند ہوں گے

آج شہر بھر میں صورت حال بالکل مختلف نظر آئی کیونکہ کراچی کی تمام اہم شاہراہوں اور چوراہوں پر پولیس اور ٹریفک پولیس عام شہریوں کے ڈبل سواری کی پابندی کی خلاف ورزی کے چالان کرتے نظر آئے مگر قانون کے محافظوں نے خود ہی احکامات کی دھجیاں اڑا دیں۔

نمائندہ اے آر وائی نیوز کی رپورٹ کے مطابق ڈبل سواری کی خلاف ورزی پر صرف ساؤتھ زون میں 300 سے زائد شہریوں کے چالان جبکہ 100 سے زائد موٹرسائیکلوں کو ضبط کیا گیا۔

شہر کی دیگر شاہراہوں پر پولیس اور ٹریفک پولیس اہلکار حکومتی احکامات کی دھجیاں بکھیرتے ڈبل سواری پر گھومتے نظر آئے اور انہیں ناکوں پر تعینات کسی اہلکار نے نہیں روکا اور نہ ہی اُن کا چالان کیا گیا۔

کراچی: شہر قائد کے علاقے محمودآباد میں کرونا  وائرس کے خوف سے  لاک ڈاؤن میں بے روزگار ہونے والے شہری نے خودکشی کرلی۔

نمائندہ اے آر وائی نیوز کی رپورٹ کے مطابق کراچی کے علاقے محمودآباد تھانے کی حدود میں واقع کشمیر کالونی کے رہائشی سرفراز نے کرونا کے خوف سے خودکشی کرلی۔

متوفی کی بیوہ کے مطابق شوہر کو کسی نے کہا  تھا کہ وہ کرونا وائرس کا مریض بن گیا ہے، سرفراز کے ذہن میں یہ وہم بیٹھ گیا تھا اور وہ بہت زیادہ  خوفزدہ تھا، اُسے کوئی بیماری نہیں تھی بلکہ وہ صحت مند تھا۔

مزید پڑھیں: کراچی، لاک ڈاؤن کی خلاف ورزی پر سزائیں دینے کا فیصلہ

بیوہ کا کہنا ہے کہ سرفراز پیٹرول پمپ پر گاڑیاں دھونے کا کام کرتا تھا، کراچی میں ہونے والے لاک ڈاؤن کے بعد وہ بے روزگار ہوگیا تھا اور اُسے گھر کا کرایہ دینے کی بھی فکر تھی۔

خاتون کے مطابق سرفراز یومیہ پانچ سو روپے دیہاڑی پر کام کرتا تھا، جب سے لاک ڈاؤن ہوا تو اُس کا کام بالکل بند پڑا تھا اور گھر پر بھی معاشی صورت حال بہت زیادہ خراب ہوگئی تھی۔

دوسری جانب پولیس کا کہنا ہے کہ سرفراز نے گھریلو پریشانیوں سے تنگ آکر خودکشی کی ہے۔ واقعے کے بعد پولیس کی نفری جائے وقوعہ پہنچی اور لاش کو ضابطے کی کارروائی کے لیے جناح اسپتال منتقل کردیا۔

یاد رہے کہ کرونا وائرس کی روک تھام کے لیے سندھ حکومت نے کراچی سمیت صوبے بھر میں لاک ڈاؤن کیا ہوا ہے اور گزشتہ تین روز سے اس میں مزید سختی بھی کردی ہے۔

کراچی: شہر قائد میں زمیں بوس ہونے والی عمارت کے ملبے سے مزید لاشیں نکال لی گئیں جس کے بعد جاں بحق افراد کی تعداد 27 تک پہنچ گئی۔

اے آر وائی نیوز کی رپورٹ کے مطابق کراچی کے علاقےگلبہار میں واقع رضویہ سوسائٹی میں منہدم ہونے والی عمارت کا ریسکیو آپریشن مکمل کرلیا گیا، ٹیمیوں نے عمارت کو کلیئر قرار دے دیا۔

ریسکیو حکام کے مطابق عمارت کے ملبے سے 27 افراد کی لاشیں نکالیں گئیں، امکان ہے کہ اب ملبے میں کسی شخص کی لاش موجود نہیں ہے۔ ریسکیو حکام کے مطابق ملبہ اٹھانےکا کام جاری ہے جو جلد مکمل کرلیا جائے گا۔ ایک ہی گھر کے 7 افراد کی میتیں تدفین کے لیے میرپور خاص منتقل کردی گئیں، جن میں دو بیٹیاں، ماں، باپ اور تین بھائی شامل ہیں۔

مزید پڑھیں: رضویہ عمارت زمین بوس ہونے کاواقعہ، جاں بحق افراد کی تعداد20 ہوگئی

ملبے سے سفیان نامی اُس نوجوان کی لاش بھی نکال لی گئی جو اپنے بھائی سے پہلے روز موبائل فون کے ذریعے رابطے میں تھا اور مدد طلب کررہا تھا، سفیان نے بھائی نے نوجوان کو تسلیاں بھی دی تھیں۔

ایک روز قبل ملبے سے مزید پانچ لاشیں نکالی گئیں تھیں جس کے بعد جاں بحق افراد کی تعداد 20 تک پہنچ گئی تھی، تمام لاشوں کو ضابطے کی کارروائی کے بعد ورثاء کے حوالے کردیا گیا۔

یہ بھی پڑھیں: کراچی: عمارت منہدم ہونےکا واقعہ، بھائی ملبے تلے دبنے والے نوجوان کو تسلیاں‌ دیتا رہا

یاد رہے کہ جمعرات کی دوپہر گلہبار نمبر دو کی پھول والی گلی میں پانچ منزلہ رہائشی عمارت اُس وقت زمیں بوس ہوئی تھی جب اُس پر چھٹی منزل ڈالی جارہی تھی۔

دوسری جانب غیرقانونی تعمیرات میں ملوث سندھ بلڈنگ کنٹرول اتھارٹی کے افسران اور ملازمین اچانک روپوش ہوگئے ہیں اور اُن کے تمام نمبرز بند ہیں۔