Author: سلمان لودھی

کراچی: شہر قائد کے علاقے گلشن اقبال سے خاتون کی 12 سال پرانی لاش برآمد ہوئی تھی جس کے بعد پولیس نے فلیٹ کا تالہ توڑ دیا ہے۔

تفصیلات کے مطابق کراچی کے علاقے گلشن اقبال بلاک 11 سے خاتون کی 12 سال پرانی لاش برآمد ہوئی تھی، ایس پی گلشن اور دیگر افسران نے جائے وقوعہ کا دورہ کیا، پولیس کا کہنا ہے کہ فلیٹ کے اندر سے کوئی مشکوک چیز نہیں ملی ہے۔

پولیس کے مطابق فلیٹ سے پلاسٹک سے بھری بوریوں کی بڑی تعداد ملی ہے، فرانزک ٹیم نے تمام کمروں کا جائزہ لیا اور شواہد اکٹھے کیے۔

پولیس کا کہنا ہے کہ خاتون زکیہ گورنمنٹ اسکول ٹیچر تھیں، علاقہ مکینوں کے مطابق بہن بھائیوں کی حرکات مشکوک تھیں۔

پولیس کے مطابق قیصر نے خودکشی کی تھی اور کچھ عرصہ پہلے مقتولہ کی بیٹی شگفتہ کی موت ہوگئی تھی۔

مزید پڑھیں: کراچی: اولاد نے ”محبت“ میں ماں کی لاش کو 12 سال تک فریزر میں رکھا

واضح رہے کہ کراچی کے علاقے گلشن اقبال میں بیٹے اور بیٹی نے “محبت” میں ماں کی لاش کو دفنانے کی بہ جائے 12 سال تک اس کو فریزر میں رکھا تھا۔

پولیس کا کہنا تھا کہ جب ذکیہ کا بیٹا اور بیٹی بھی فوت ہوئے تو ان کے بھائی محبوب نے لاش کی دیکھ بھال شروع کی، گزشتہ رات محبوب نے ان کا ڈھانچا نکال کر کچرا کنڈی میں پھینک دیا تھا، محبوب کا کہنا تھا کہ بیٹے اور بیٹی نے ماں کو محبت میں سنبھال کر رکھا تھا۔

خاتون کے بھائی نے اپنے ابتدائی بیان میں کہا کہ ان کی بہن ذکیہ کی بیٹی شگفتہ 4 ماہ قبل انتقال کر گئی تھیں، وہ 2 دن پہلے بہن کے گھر گیا تو دیکھا کہ بہن کی لاش بستر پر پڑی ہے، ذکیہ کا ذہنی توازن بھی ٹھیک نہیں تھا۔

پولیس کا کہنا تھا کہ لاش کا پوسٹ مارٹم کرا لیا گیا ہے، اور محبوب کو حراست میں لے کر تفتیش کی جا رہی ہے۔

کراچی: شہر قائد کے علاقے تین ہٹی پل کے نیچے جھگیوں میں آگ بھڑک اٹھی۔

تفصیلات کے مطابق کراچی کے علاقے تین ہٹی پل کے نیچے جھگیوں میں خوفناک آگ بھڑک اٹھی، جس کے نتیجے میں 2 افراد جھلس کر زخمی ہوگئے، فائر بریگیڈ کی تین گاڑیاں آگ پر قابو پانے میں مصروف ہیں۔

واٹر بورڈ کے ہائیڈرنٹس پر ایمرجنسی نافذ کردی گئی ہے، ایم ڈی واٹر بورڈ کا کہنا ہے کہ نیپا اور سخی حسن ہائیڈرنٹس سے متعدد ٹینکرز پہنچادئیے گئے ہیں۔

ایم ڈی واٹر بورڈ کے مطابق فوکل پرسن ہائیڈرنٹس سیل آگ کے مقام پر موجود ہیں۔

فائر بریگیڈ حکام کا کہنا ہے کہ جھگیوں میں لگنے والی آگ پر قابو پالیا گیا ہے، فائربریگیڈ کی پانچ گاڑیوں نے آگ بجھانے میں حصہ لیا۔

نمائندہ اے آر وائی نیوز کے مطابق ایک گھنٹے قبل آگ لگی تھی اور 50 سے زائد جھگیاں جل کر خاکستر ہوگئی اور کچھ معمولی متاثر ہوئی ہیں۔

آگ لگنے کے نتیجے میں 2 افراد جھلس کر معمولی زخمی ہوگئے جنہیں اسپتال منتقل کردیا گیا ہے۔

ادھر کلفٹن کے علاقے زمزمہ میں نجی بینک میں آگ لگ گئی، آگ پر قابو پانے کے لیے فائر بریگیڈ کی گاڑیاں روانہ کردی گئی ہیں۔

واضح رہے کہ گزشتہ سال مارچ میں کراچی کے علاقے نیپا میں جھگیوں میں آگ لگنے کے نتیجے میں 4 سالہ بچی فاطمہ جاں بحق اور 2 افراد زخمی ہوگئے تھے۔