Author: سلمان لودھی

کراچی: ایف آئی اے سائبر کرائم سرکل نے شہر قائد کے علاقے ڈیفنس میں کارروائی کرتے ہوئے نجی ٹریول ایجنسی اور موبائل شاپ کے دفاتر کو سیل کر کے 3 افراد کے خلاف مقدمہ درج کرلیا۔

ایف آئی اے حکام کے مطابق کارروائی ایف بی آر،پی ٹی اے کی ہدایت پر کی گئی،ملزمان مسافروں کا ریکارڈحاصل کرکے اسمگل شدہ موبائل ڈیوائس رجسٹرڈکراتےتھے،گروہ موبائل رجسٹرڈکرکے مارکیٹ میں اسے بلیک میں فروخت کرتا تھا۔

ایف آئی اے سائبر کرائم سرکل کے مطابق پی ٹی اےنے1328 ایسے افراد کے نام فراہم کیے جن کا ڈیٹا غیر قانونی طور پر استعمال ہوا، کارروائی کے دوران دفاترسےملنےوالےلیپ ٹاپ،سامان سےشہریوں کاریکارڈحاصل کرلیا۔

ڈپٹی ڈائریکٹر سائبر کرائم سرکل کا کہنا تھا کہ 3ہزارمسافروں کاڈیٹامل چکا، کیس کے مرکزی کردارعبدالواحد کے بھائی علی رضا کو گرفتار کرلیا جس نے دورانِ تفتیش انکشاف کیا کہ ای این اےٹریول کامالک مسافروں کا ڈیٹا موبائل شاپ کوفروخت کرتاتھا، ہر آئی ایم آئی نمبرپرکمیشن ملتا تھا۔

مزید پڑھیں: بیرونِ ملک سے ایک موبائل فون لانے کی اجازت پر مخالفت، سینیٹ کمیٹی کا نظر ثانی کا مطالبہ

کارروائی کے دوران پاسپورٹ، ای میل آئی ڈیز، اور اہم شخصیات کا بھی ڈیٹا ملا جبکہ 100سےزائدموبائل فونز قبضےمیں لےگئے، ایف آئی اے نے غیر قانونی طریقے سے موبائل کھولنے والے گروہ کے تین اہم کارندوں کے خلاف مقدمہ درج کر کے نجی ٹریول ایجنسی اور موبائل شاہ کے دفاتر کو سیل کردیا۔

یاد رہے کہ ایک روز قبل ایف آئی اے نے کارروائی کر کے ایک شخص کو گرفتار کیا تھا جو سافٹ ویئر کے ذریعے لوگوں کے اسمگل شدہ موبائل پرانی تاریخوں پر رجسٹرڈ کر کے دیتا تھا، ملزم نے دورانِ تفتیش جو انکشافات کیے اُس کی روشنی میں کارروائیاں کی گئیں۔

دوسری جانب رینجرز نے کراچی کے مختلف علاقوں میں کارروائیاں کرتے ہوئے 9 ملزمان کو گرفتار کرلیا، جو ڈکیتی اور اسٹریٹ کرائم کی وارداتوں میں ملوث تھے۔ ترجمان رینجرز کے مطابق ملزمان سےاسلحہ،ایمونیشن اور مسروقہ سامان بھی برآمد  ہوا۔

کراچی: شہر قائد کے علاقے گلشن اقبال یونیورسٹی روڈ پر پولیس کی مبینہ فائرنگ سے 19 ماہ کا کمسن بچہ جاں بحق ہوگیا۔

تفصیلات کے مطابق سندھ پولیس کا دس روز کے دوران پولیس کی مبینہ فائرنگ سے جاں بحق ہونے والے بچوں کی تعداد دو تک پہنچ گئی، اب سے کچھ دیر قبل یونیورسٹی روڈ پر 19 ماہ کا کمسن بچہ پولیس کی مبینہ گولی لگنے سے جاں بحق ہوا۔

مقتول بچے کے والد کاشف نے دعویٰ کیا ہے کہ وہ  یونیورسٹی روڈ پر رکشے میں جاررہے تھے کہ اسی دوران پولیس کو فائرنگ کرتے دیکھا اور کچھ دیر بعد احسن کے جسم سے خون نکلنے لگا۔ اُن کا کہنا تھا کہ خون بہنے کے بعد ہم اُسی رکشے میں بچے کو لے کر اسپتال پہنچے مگر وہ اُس وقت تک دم توڑ چکا تھا۔ پولیس نے فائرنگ کرنے والے دونوں اہلکاروں کو حراست میں لے لیا۔

مزید پڑھیں: قائد آباد میں پولیس مقابلہ : ملزم اور اہلکار زخمی، فائرنگ کی زد میں آکر بچہ جاں بحق

کاشف کے مطابق بچے کے سینے میں گولی لگی جو جان لیوا ثابت ہوئی،  واقعے کے بعد سچل پولیس اور رینجرز کی بھاری نفری نجی اسپتال پہنچ گئی۔

وزیر اعلیٰ سندھ کا نوٹس

وزیر اعلیٰ سندھ مراد علی شاہ نے پولیس مقابلے میں بچے کے جاں بحق ہونے کا نوٹس لیتے ہوئے ایڈیشنل آئی جی سے فوری رپورٹ طلب کی۔ مراد علی شاہ کا کہنا تھا کہ ’اس قسم کے واقعات افسوسناک ہیں جن کی روک تھام بہت ضروری ہے‘۔

دوسری جانب ڈی آئی جی ایسٹ نے پولیس فائرنگ سے بچے کی ہلاکت کے واقعے کا نوٹس لے لیا، اعلامیے کے مطابق فائرنگ میں میں ملوث اہلکاروں کی شناخت کر لی گئی۔ ان کا کہنا تھا کہ دونوں اہلکاروں کا بیان قلمبند کیا جا رہا ہے تاکہ شواہد سامنے آئیں، موٹر سائیکل سوار اہلکار کسی کی نشاندہی پر مبینہ ڈاکوؤں کا پیچھا کر رہے تھے۔

قائم مقام ایس ایس پی ملیر

قائم مقام ایس ایس پی ملیر اعظم جمالی نے میڈیا سے گفتگو کرتے ہوئے کہا کہ ’’4اہلکاروں کوحراست میں لےلیاگیا، اہلکاروں کےپاس چھوٹےہتھیار تھے، دونوں اہلکارکس کا تعاقب کررہےتھے ابھی اس کی جانچ پڑتال جاری ہے،قانون کےمطابق جوکارروائی ہوگی وہ کی جائے گی‘‘۔

کراچی: شہر قائد کے علاقے لیاری میں چھت سے گر کر جاں بحق ہونے والی 6 سالہ بچی سویرا کی والدہ کے خلاف پولیس نے قتل بالسبب کا مقدمہ درج کرلیا۔

تفصیلات کے مطابق ایک روز قبل کراچی کے علاقے لیاری میں واقع نیاآباد کے علاقے میں عمارت کی چھٹی منزل سے 6 سال کی کمر عمر بچی جاں بحق ہوگئی تھی۔ والدین بچی کو لے کر اسپتال پہنچے تو پولیس نے وہی اُن کا بیان ریکارڈ کیا۔

والدین کا کہنا تھا کہ سویرا 2 روز سے مدرسے نہیں جارہی تھی اسی وجہ سے ہاتھ پاؤں باندھ کر اُسے کمرے میں بند کیا تھا مگر معلوم نہیں اُس کے پاؤں کیسے کھلے اور وہ گیلری سے نیچے گر گئی۔

مقتولہ بچی کے ماموں کا کہنا تھا کہ سویرا اپنے مدرسے کے استاد کے تشدد کی وجہ سے نہیں جارہی تھی اور اُسے خوف تھا کہ سبق یاد نہ ہونے پر بہت زیادہ مار پڑے گی۔

پولیس نے واقعے کی تفتیش شروع کی تو یہ بات سامنے آئی کہ سویرا کی والدہ نے اُس کے دونوں ہاتھ باندھے اور خود پڑوسیوں کے گھر چلی گئی، مقتولہ ماں کو کھڑکی سے دیکھنے کے لیے آئی تو نیچے گر کر جاں بحق ہوگئی۔

پولیس نے بچی کی ہلاکت کا ذمہ دار ماں کو قرار دیتے ہوئے سویرا کی والدہ کے خلاف قتل بالسبب کی دفعات کے تحت کلری تھانے میں مقدمہ درج کرلیا۔ ایف آئی کے متن میں لکھا گیا کہ سویرا اپنی ماں کی غفلت کی وجہ سے جاں بحق ہوئی، ملزمہ نے بیان دیتے وقت جھوٹ کا سہارا لیا کیونکہ اُس نے صرف ہاتھ باندھے تھے۔

کراچی: شہر قائد کے علاقے بلدیہ ٹاؤن میں پسند کی شادی کرنے والی خاتون اور اُس کے دیور کو قتل کردیا گیا، متاثرہ شوہر کا کہنا ہے کہ سالے نے فون کر کے بتایا ہم نے انہیں قتل کردیا۔

تفصیلات کے مطابق کراچی کے علاقے بلدیہ ٹاؤن سے خاتون اور مرد کی لاشیں برآمد ہوئی تھیں، پولیس کے مطابق مقتولین کا آپس میں دیور اور بھابھی کا رشتہ تھا۔

پولیس حکام کا کہنا تھا کہ جائے وقوعہ سے سےنائن ایم ایم، 30 بورکے2،2خول ملے، مقتولین کا تعلق بلوچستان سے تھا۔ مقتولہ فضیلہ کے شوہر نے الزام عائد کیا ہے کہ اُس کی بیوی اور بھائی کے قتل میں 2 رشتے دار ملوث ہیں۔

بعد ازاں فضیلہ کے خاوند تاج محمد نے پولیس کو بیان دیا کہ ہم نے پسند کی شادی کی جس سے لڑکی کے گھر والے خوش نہیں تھے، میں شارجہ میں تھا واپس آیا تو  سالے نے فون کر کے بتایا کہ ہم نے تمھارے بھائی اور بیوی کو قتل کردیا اُن کی لاشیں اٹھوا لو۔

شوہر نے الزام عائد کیا کہ قتل میں دو سسرالی رشتے داور اور سالہ ملوث ہے، پولیس نے تاج محمد کی مدعیت میں مقدمہ درج کر کے ملزمان کی تلاش شروع کردی۔ پولیس حکام کا کہنا ہے کہ مقتولین کو غیرت کے نام پر قتل کیا گیا۔