Author: سنجے سادھوانی

کراچی: سابق نگراں وزیر اعلیٰ سندھ مقبول باقر گورنر سندھ کے لیے مضبوط امیدوار بن گئے۔

اے آر وائی نیوز نے تصدیق کے لیے جسٹس (ر) مقبول باقر سے رابطہ کیا تو انہوں نے کہا کہ لوگ مبارک باد دے رہے ہیں لیکن باضابطہ طور پر مجھے آگاہ نہیں کیا گیا۔

ذرائع کا کہنا ہے کہ گورنر سندھ کی تبدیلی جلد متوقع ہے۔

ذرائع کا بتانا ہے کہ گورنر سندھ کے لیے خوشبخت شجاعت سمیت دیگر نام بھی زیر غور ہیں لیکن جسٹس (ر) مقبول باقر گورنر کے لیے مضبوط امیدوار ہیں۔

واضح رہے کہ اس سے قبل پیپلزپارٹی کے چیئرمین بلاول بھٹو زرداری نے کہا تھا کہ ان کی پارٹی کو سندھ کی گورنر شپ کے حوالے سے کسی شخص پر تحفظات نہیں ہیں۔

ان کا کہنا تھا کہ پیپلزپارٹی اور ن لیگ کے درمیان مختلف عہدوں پر تقرریوں پر بات چیت ہوئی ہے جس میں دونوں جماعتوں کو رہنماؤں کو عہدے تفویض کیے جائیں گے۔

قبل ازیں ذرائع کا کہنا تھا کہ مسلم لیگ ن اور پیپلزپارٹی نے گورنر سندھ کے لیے سینیٹر خوشبخت شجاعت کا نام پیش کیا جبکہ ایم کیو ایم پاکستان کامران ٹیسوری کو برقرار رکھنا چاہتی ہے۔

یاد رہے کہ جسٹس (ر) مقبول باقر کو 14 اگست 2023 کو سندھ کا نگراں وزیر اعلیٰ نامزد کیا گیا تھا جب گورنر کامران ٹیسوری نے 11 اگست کو وزیر اعلیٰ سندھ مراد علی شاہ کے مشورے پر سندھ اسمبلی تحلیل کردی تھی۔

پاکستان پیپلز پارٹی نے سابق وزیراعظم یوسف رضا گیلانی کو چیئرمین سینیٹ کیلئے امیدوار نامزد کر دیا۔

چیئرمین پی پی بلاول بھٹو زرداری نے پارٹی کے سینئر رہنما یوسف رضا گیلانی کی بطور چیئرمین سینیٹ امیدوار کی منظوری دیدی ہے۔

پیپلزپارٹی چیئرمین کے سیکریٹریٹ کی جانب سے نوٹیفکیشن جاری کر دیا گیا۔ پیپلزپارٹی چیئرمین سینیٹ بنانے کے لیے پرُعزم دکھائی دیتی ہے۔

پارٹی رہنماؤں کا ماننا ہے کہ یوسف رضا گیلانی چیئرمین سینیٹ منتخب ہو جائیں گے اس کے لیے وہ مسلم لیگ ن سمیت دیگر جماعتوں سے رابطہ کریں گے۔

یار رہے کہ یوسف رضا گیلانی نے ملتان سے قومی اسمبلی کی نشست جیتنے کے بعد 29 فروری کو رکن قومی اسمبلی کا حلف اٹھایا تھا اور قومی اسمبلی میں وزیراعظم کے انتخاب کے دوران مسلم لیگ (ن) کے صدر شہباز شریف کو ووٹ دیا تھا۔

صدر مملکت آصف علی زرداری کی صاحبزادی آصفہ بھٹو بلا مقابلہ رکن قومی اسمبلی منتخب ہوگئیں۔

اے آر وائی نیوز کے مطابق آصفہ بھٹو نے شہید بینظیر آباد این اے 207 سے کاغذات نامزدگی جمع کروائے تھے جہاں سے وہ بلامقابلہ رکن قومی اسمبلی منتخب ہوئیں۔

ریٹرننگ افسر نے این اے207  سے  آصفہ بھٹو زرداری کی بلامقابلہ کامیابی کا نوٹیفکیشن جاری کردیا۔

الیکشن کمیشن کا کہنا ہے کہ آصفہ بھٹو کے مدمقابل تین امیدوار دستبردار ہوگئے ہیں۔

کراچی: وزیر ٹرانسپورٹ سندھ شرجیل میمن نے عید کے بعد نئی بس سروس شروع کرنے کا اعلان کردیا۔

اے آر وائی نیوز کے مطابق صوبائی وزیر ٹرانسپورٹ شرجیل میمن نے میڈیا سے گفتگو کرتے ہوئے کہا کہ عید کے بعد کراچی میں الیکٹرک بسوں کے مزید دو روٹس کا اضافہ ہوگا، پنک بسوں میں بھی اضافہ کریں گے۔

انہوں نے کہا کہ 18 اپریل تک بس سروس کے لیے پری پیڈ کارڈ لانچ کررہے ہیں، سندھ کے ہر شہر میں پیپلز بس سروس چلائی جائے گی۔

وزیر ٹرانسپورٹ کا کہنا تھا کہ 500 نئی بسیں خریدی جائیں گی، چاہتے ہیں کہ عوام کو ریلیف دینے کے لیے بہترین اور سستی سفری سہولیات میسر آئیں، عوام کے لیے جتنی بھی خوشخبریاں دی ہیں ان پر من و عن عمل ہوگا۔

شرجیل میمن نے ریڈ لائن منصوبے سے متعلق بات کرتے ہوئے کہا کہ مہنگائی اور قیمتوں میں اضافے کے باعث ریڈ لائن بی آر ٹی کا کام متاثر ہوا جبکہ نگران حکومت نے ریڈ لائن بی آر ٹی پر توجہ نہیں دی۔

ان کا مزید کہنا تھا کہ چیئرمین بلاول بھٹو اور صدر آصف زرداری نے ٹرانسپورٹ انفرا اسٹرکچر پر توجہ دینے کی ہدایت کی ہے۔