Author: سنجے سادھوانی

کراچی انٹر بورڈ میں طلبا کے امتحانی نتائج میں جعلسازی کی تصدیق ہوگئی ہے۔

تفصیلات کے مطابق کراچی انٹر بورڈ سال اوّل کے امتحانی نتائج میں 60 فیصد سے زائد طلبہ و طالبات فیل ہوگئے ہیں تاہم اب رپورٹ میں اہم انکشافات سامنے آئے ہیں۔

رپورٹ کے مطابق کراچی انٹربورڈ میں نتائج تبدیل کرنا سالوں سے جاری ہے، بورڈ کے دو سابق چیئرمین پروفیسر سعید الدین، نسیم احمد میمن، دو سابق کنٹرولر امتحانات انور علیم، ظہیر الدین بھٹو نتائج بدلنے میں ملوث نکلے ہیں۔

نگراں وزیر اعلی سندھ مقبول باقر کی تحقیقاتی کمیٹی نے بھانڈا پھوڑ دیا بورڈ کے تین سابق اسسٹنٹ کنٹرولر امتحانات تنویر عباس، حارث فاروقی،محمد اطہر بھی نتائج تبدیل کرانے میں ملوث پائے گئے۔

رپورٹ میں انکشاف ہوا کہ انگلش، بائیولاجی، کیمسٹری اور فزکس کے نتائج بدلے گئے، حکومت نے انٹر بورڈز کے 8 افسران کیخلاف فوجداری مقدمے کیلئے اینٹی کرپشن کو خط لکھ دیا۔

نگراں وزیر اعلیٰ کی طرف سے کرائی گئی تحقیقات میں کرپشن الزامات درست ثابت ہوگئے، نگراں وزیر اعلیٰ نے بورڈ نتائج کے بعد اٹھنے والے سولات پر تحقیقات کا حکم دیا تھا۔

کراچی : کراچی میں جہانگیر، مارٹن، کلیٹن اور پاکستان کوارٹرز کی از سرنو تعمیر کرنے کا فیصلہ کرلیا گیا، وفاق نے صوبائی حکومت کے ساتھ ایم او یو کی منظوری دے دی ہے۔

تفصیلات کے مطابق کراچی میں پرانے سرکاری کوارٹرز کی خالی زمینوں پر بڑی عمارتیں بنانے کے منصوبے پر وفاقی حکومت نے سندھ حکومت کےساتھ ایم او یو کی منظوری دے دی۔

ایم اویو وفاقی وزارت ہاؤسنگ اینڈورکس اورمحکمہ بلدیات سندھ اور کے ایم سی کے درمیان ہوگا، تینوں فریقین جہانگیر،مارٹن، کلیٹن اورپاکستان کوارٹرزکی تعمیرنو کریں گے، کراچی شہر کے وسط میں تقریباً 335 ایکڑ اراضی خالی ہے ، حکومت کےبنائے ہوئے کوارٹر زیادہ تر خستہ حالی شکار ہوچکے ہیں۔

نگراں وزیراعلٰی سندھ مقبول باقر کا کہنا ہے کوارٹرز وفاقی ملازمین کواس وقت الاٹ کیے گئے جب کراچی وفاقی دارالحکومت تھا،دارالحکومت منتقلی کےبعد وفاقی ملازمین سےکوارٹرز کبھی واپس نہیں لیے گئے۔

مقبول باقر نے کہا کہ زیادہ تر کوارٹرز اب ملازمین کے اہل خانہ کے قبضے میں ہیں جبکہ کچھ کوارٹرزکو فروخت کرنے کی اطلاعات بھی ہیں۔

ان کا مزید کہنا تھا کہ کسی بھی رہائشی کے پاس کوئی الاٹمنٹ یا ٹائٹل ڈیڈ دستیاب نہیں، پائلٹ پروجیکٹ کے آغاز کیلئے دستیاب خالی زمین کی نشاندہی کی جائے گی۔

نگراں وزیراعلٰی سندھ نے کہا کہ کوارٹرز کی تعمیر کے ساتھ گرین زون اور کمرشل ایریا بنایا جائے گا ، منصوبے پر پبلک پرائیویٹ پارٹنرشپ کے ذریعے سرمایہ کاری ہوگی۔

ان کا کہنا تھا کہ رہائشیوں کیلئے مکانات کی تعمیر کا حصہ چالیس فیصد مختص ہوگا، کوارٹرزکے تمام مکینوں کو نئی رہائشی عمارتوں میں ہر صورت منتقل کیا جائے گا اور پاور آف اٹارنی منتقل کی جائے گی۔

پاکستان پیپلز پارٹی کی جانب سے آصفہ بھٹو زرداری کی سیاست میں لانچنگ موخر کردی گئی ہے۔ فی الحال وہ انتخاب نہیں لڑیں گی۔

تفصیلات کے مطابق چیئرمین پیپلزپارٹی بلاول بھٹور زرداری کی ہمشیرہ آصفہ بھٹو کی سیاست میں لانچنگ کو موخر کردیا گیا ہے۔ آصفہ بھٹوزرداری قومی و صوبائی اسمبلی کی نشست پرانتخاب نہیں لڑیں گی۔

آصفہ بھٹو نے کسی بھی حلقے سے کاغذات نامزدگی جمع نہیں کرائے۔ آصفہ کا نام پی پی کی جانب سے مخصوص نشستوں کی فہرست میں بھی نہیں ہے۔

پیپلز پارٹی کا کہنا ہے کہ بلاول بھٹو زرداری کئی حلقوں سے الیکشن لڑ رہے ہیں۔ بلاول کی کامیابی کے بعد آصفہ بھٹوکی انتخابی سیاست میں انٹری کا فیصلہ ہوگا۔

واضح رہے کہ پی پی چیئرمین بلاول بھٹو نے 8 فروری 2024 کا الیکشن لڑنے کے لیے اپنی والدہ سابق وزیراعظم بینظیر بھٹو کے روایتی حلقے این اے 196 لاڑکانہ کا انتخاب کیا ہے۔

بلاول بھٹو زرداری آج لاڑکانہ پہنچ رہے ہیں جہاں وہ عام انتخابات کے سلسلے میں دو قومی حلقوں پر اپنے کاغذات نامزدگی فارم جمع کروائیں گے۔

بلاول بھٹو زرداری نے اس بار انتخابات میں اترنے کے لیے لاڑکانہ اور قمبر شہدادکوٹ کا انتخاب کیا ہے۔ وہ قومی اسمبلی کے حلقے این اے 194 اور اپنی والدہ بینظیر بھٹو کے روایتی انتخابی حلقے این اے 196 سے فارم جمع کرائیں گے۔