Author: شاہد ہاشمی

دبئی: پاکستان کرکٹ بورڈ کے چیئرمین رمیز راجہ نے کہا ہے کہ حسن علی کو کیچ چھوڑنے کی ندامت سے نکلنے میں تھوڑا وقت لگے گا، ہمیں محمد رضوان کے جذبہ حب الوطنی سے سیکھنے کی ضرورت ہے۔

چیئرمین پی سی بی رمیز راجہ نے فائنل کے بعد دبئی اسٹیڈیم کے باہر میڈیا سے گفتگو کرتے ہوئے کہا کہ  پاکستان ٹیم کی قیادت بہت اچھی تھی،  کرکٹ ان چند کھیلوں میں جہاں لیڈر شپ اہمیت رکھتی ہے، کھلاڑیوں پراعتمادکیا تو انہوں نے بہترین نتائج دیے، اُن کی اپنی محنت رنگ لائی ہے۔

رمیز راجہ نے کہا کہ ’میں کھلاڑیوں سے بحیثیت کھلاڑی بات کرتا ہوں، چیئرمین بن کرنہیں، ہم دوستانہ ماحول میں رہتے اور ایک دوسرے سے سیکھتے ہیں‘۔

اُن کا کہنا تھا کہ ’ہمیں شکست سے خوفزدہ نہیں ہونا چاہیے،  ٹورنامنٹ میں کھلاڑی متحدد ہوکر کھیلے جس کی خوشی ہوئی‘۔ حسن علی کا دفاع کرتے ہوئے رمیز راجہ نے کہا کہ ’حسن علی کو یہ بات باربار ستائے گی، انہیں اس صورت حال سے نکلنے میں تھوڑا وقت لگےگا، میں حسن علی کی جگہ ہوتا تو اس غلطی کے بعد فیلڈنگ ٹریننگ ڈبل کردوں‘۔

انہوں نے مشورہ دیا کہ ’حسن علی کیچ چھوڑنے کی غلطی کو بارباریاد نہ کرے، انہیں اپنی غلطی سےسیکھنا ہوگا،  حسن علی سے غلطی ہوئی تو سب نے اُس کی حمایت کی، جو بہت اچھی بات ہے‘۔

وکٹ کیپر کے جذبے کے حوالے سے پی سی بی چیئرمین نے کہا کہ ’ہمیں محمد رضوان سے نیشنل ازم سیکھنےکی ضرورت ہے، اُس نے بڑے حوصلے سے کام لیا اور بہادری کا مظاہرہ کیا‘۔

ایک سوال کا جواب دیتے ہوئے رمیز راجہ نے کہا کہ ’کمنٹری باکس کی کمی کس قدر محسوس کررہا ہوں، یہ بتا نہیں سکتا‘۔

رمیز راجہ نے یقین دہانی کرائی کہ ’میرے ہوتے ہوئے کھلاڑیوں کو کبھی کوئی پریشانی نہیں ہوگی،  میرا وعدہ ہے کہ ہماری کرکٹ اپنے پاؤں پر کھڑی ہوگی،  ہم ایک نیا ہوم سیزن بنائیں گے، جس کے بعد پاکستان کرکٹ کا پروڈکٹ اپنے پیروں پر کھڑا ہوجائے گا‘۔