Author: شعیب نظامی

عالمی مالیاتی ادارے (آئی ایم ایف) نے پاکستان کے لیے قرض کی تیسری قسط 1.1 ارب ڈالر کے اجرا کی تاحال تاریخ نہیں دی ہے۔

اے آر وائی نیوز کو ذرائع سے ملنے والی اطلاعات کے مطابق عالمی مالیاتی ادارے (آئی ایم ایف) نے پاکستان کو قرض کی تیسری قسط 1.1 ارب ڈالر کے اجرا کی تاحال تاریخ نہیں دی ہے۔

ذرائع کا کہنا ہے کہ آئی ایم ایف کے ایگزیکٹو بورڈ شیڈول میں ایک بار پھر پاکستان شامل نہیں تاہم اسے ایگزیکٹو بورڈ 29 اپریل سے 3 مئی تک شیڈول میں شامل کر سکتا ہے۔

ذرائع نے یہ بھی بتایا کہ پاکستان کے لیے 1.1 ارب ڈالر کے اجرا میں اب کوئی رکاوٹ نہیں ہے جب کہ نئے قرض پروگرام کیلیے آئی ایم ایف وفد آئندہ ماہ کے وسط میں پاکستان آئے گا۔

واضح رہے کہ وزیر خزانہ اورنگزیب خان گزشتہ دنوں واشنگٹن کے دورے پر گئے تھے جہاں انہوں نے آئی ایم ایف حکام سے قرض کی قسط سمیت نئے قرض پروگرام کے لیے مذاکرات کیے۔

وزیر خزانہ گزشتہ شب ہی پاکستان واپس پہنچے تھے اور آج انہوں نے اسلام آباد میں ایک تقریب سے خطاب میں قوم کو خوشخبری سنائی تھی کہ آئی ایم ایف 1.1 ارب ڈالر قرض کی قسط رواں ماہ کے آخر تک جاری کر دے گا۔

’پاکستان چین سے 25 کروڑ ڈالر کے پانڈا بانڈ لے گا‘

انہوں نے یہ بھی کہا تھا کہ پاکستان سرمایہ کاری کے لیے چین سے رواں سال 25 کروڑ ڈالر کے پانڈا بانڈ لے گا۔

عالمی بینک نے پاکستان کے سرکاری ملکیتی اداروں کی ہوشربا رپورٹ جاری کی ہے جس میں کہا گیا ہے کہ تین سال میں 84 اداروں نے قومی خزانے کو ایک ہزار ارب سے زائد کا نقصان پہنچایا۔

اے آر وائی نیوز کے مطابق اس وقت مجموعی طور پر 212 سرکاری ملکیتی ادارے کام کر رہے ہیں، جن میں سے 84 اداروں نے قومی خزانے کو تین سال میں ایک ٹریلین (ایک ہزار ارب) سے زائد کا نقصان پہنچایا ہے۔ عالمی بینک نے تجویز کیا ہے کہ سرکاری ملکیتی اداروں کے سالانہ خسارے 350 ارب روپے کے لگ بھگ ہیں اور یہ خسارے کم کرنے کے لیے سرکاری اداروں میں خود مختار اور ماہرین کو شامل کیا جائے۔

سرکاری ملکیتی اداروں کے مسلسل خساروں اور نجکاری کے حوالے سے عالمی بینک کی رپورٹ میں تجویز کیا گیا ہے کہ   ایس او ایز پالیسی کی بجائے ایس او ایز ٹریاج پر عمل درآمد یقینی بنایا جائے۔ آئی ایم ایف کی مشاورت سے 2021 میں ایس او ایز ٹریاج لاگو کیا گیا۔ ٹریاج کے تحت 84 کمرشل سرکاری ملکیتی اداروں کا انتخاب کیا گیا تھا۔ ان 84 اداروں نے قومی خزانے کو تین سال میں ایک ٹریلین کا نقصان پہنچایا۔

رپورٹ میں کہا گیا ہے کہ اس وقت مجموعی طور پر 212 سرکاری ملکیتی ادارے کام کر رہے ہیں۔ ایس او ایز ٹریاج کے بعد فروری 2023 کو ایس او ایز ایکٹ کا نفاذ کیا گیا۔ ایس او ایز ایکٹ کے تحت اپریل 2023 میں ایس او ایز پالیسی لائی گئی۔ ٹریاج کا مقصد 84 کمرشل اداروں کے منافع اور نقصانات کا اندازہ لگانا تھا اور یہ فیصلہ کرنا تھا  کہ کن اداروں کو ملکیت میں رکھنا ہے اور کن کو نہیں۔ ایس او ایز پورٹ فولیو 2016 سے مسلسل خسارے کا شکار ہے۔

ورلڈ بینک کی رپورٹ کے مطابق  وفاقی حکومت سرکاری ملکیتی اداروں کو مالی مدد فراہم کرتی ہے، ایس او ایز کو حکومتی امداد فوری محدود کرنے پر عمل کیا جائے، سرکاری ملکیتی اداروں کے مالی اخراجات کو کم کیا جائے۔

عالمی بینک نے رپورٹ میں تجویز کیا ہے کہ اقتصادی کارکردگی کے لیے ایس او ایز میں حکومتی عمل دخل کم کریں، ہائی پروفائل ایس او ایز کی منتخب تقسیم کے ساتھ آگے بڑھیں۔

اسی رپورٹ کے مطابق ایس او ایز کے گورننس اور مالی مسائل پر توجہ دی جائے، ایس او ای ایکٹ سے مطابقت رکھنے والی پالیسیوں کا نفاذ ضروری ہے۔ کارپوریٹ گورننس اور مالیاتی ڈسپلن کی پالیسیاں نافذ کی جائیں۔بورڈز کا مسابقتی انتخاب، پُرفارمنس ایگریمنٹس کا قیام بھی ضروری ہے جب کہ سینٹرل مانیٹرنگ یونٹ کے ذریعے باقاعدہ مانیٹرنگ بھی ہونی چاہیے۔