Author: شعیب نظامی

پاکستان میں غربت کی شرح مسلسل بڑھ رہی ہے اور کورونا کے بعد مہنگائی میں شتر بے مہار اضافہ ملک میں غربت کی شرح بڑھانے کا اہم سبب ہے۔

اے آر وائی نیوز کے مطابق پاکستان میں گزرتے وقت کے ساتھ ساتھ غربت کی شرح میں بھی مسلسل اضافہ ہو رہا ہے اور عالمی بینک کی رپورٹ کے مطابق گزشتہ 20 برسوں سے پاکستان میں غربت میں مسلسل اضافہ ہو رہا ہے۔

رپورٹ کے مطابق ایک سال میں غربت کی شرح 34.2 فیصد سے بڑھ کر 39.4 فیصد تک پہنچ گئی ہے۔ کورونا، مہنگائی اور بے روزگاری نے پاکستان میں 9 کروڑ 50 لاکھ سے زائد افراد کو غربت کی حد کی لکیر سے نیچے دھکیل دیا ہے۔

عالمی بینک کی ایک رپورٹ کے مطابق پاکستان میں گزشتہ ایک سال میں مزید ایک کروڑ 25 لاکھ افراد غربت کا شکار ہوئے ہیں تاہم اس نے امید ظاہر کی ہے کہ آئندہ مالی سال غربت کی سطح 39.4 فیصد سے کم ہو کر 35 فیصد تک رہنے کا امکان ہے۔

اقوام متحدہ کے پائیدار ترقی کے اہداف یعنی ایس ڈی جیز گولز کے حصول میں بھی پاکستان 128 واں نمبر ہے۔ صنعت کاروں کا کہنا ہے کہ صنعت تباہ حال ہے اسی لیے روزگار سکڑ رہے ہیں۔

سال 2023 میں بھی قرضوں کا سونامی تھم نہ سکا

ماہرین معاشیات کے مطابق پاکستان میں غربت کے خاتمے کے لیے بے نظیر انکم سپورٹ پروگرام کا فنڈز ناکافی ہیں۔ نوجوانوں کو روزگار، صحت عامہ سمیت بنیادی سہولیات  کی فراہمی بہتر بنانے سے غربت میں تیزی سے کمی ہوسکتی ہے۔

سال 2023 رخصت ہو رہا ہے لیکن اپنے دامن میں قرضوں کا ایک وسیع بوجھ چھوڑ کر جا رہا ہے کیونکہ اس سال بھی قرضوں کا سونامی تھم نہ سکا۔

اے آر وائی نیوز کے مطابق سال 2023 رخصت ہو رہا ہے لیکن اپنے دامن میں قرضوں کا ایک وسیع بوجھ چھوڑ کر جا رہا ہے کیونکہ اس سال بھی قرضوں کا سونامی تھم نہ سکا۔ اس سال ہر مہینے قرض میں ایک ہزار ارب روپے کا اضافہ ہوا۔

اسٹیٹ بینک کے ڈیٹا کے مطابق اکتوبر 2023 تک اکتوبر 2022 کی نسبت مجموعی قرضوں میں 12 ہزار ارب روپے کا اضافہ ہوا۔ مجموعی قرضے 62 ہزار 486 ارب روپے تک جا پہنچے۔

ماہرین کا کہنا ہے کہ ملک میں حکومت ضرور بدلتی ہے لیکن سرکاری افسران کے خرچے اٹھانے کے لیے قرض در قرض لینے کی روش تبدیل نہیں ہوتی۔

ماہرین معاشیات کا کہنا ہے کہ سال 2023 میں بنیادی شرح سود 16 فیصد سے بڑھ کر 22 فیصد تک پہنچی اور یہ بھی قرضوں کا حجم بڑھنے کا سبب بنی جب کہ ماہرین سمجھتے ہیں کہ اب صرف ایسے پراجیکٹس کے لیے قرض لیا جائے جن کی آمدن سے قرضے اتارے بھی جائیں۔

دستور پاکستان کے مطابق قرضوں کا حجم معیشت کے 60 فیصد سے زائد نہیں ہونا چاہیے لیکن کئی سال سے اس کی مسلسل خلاف ورزی ہو رہی ہے۔ حکومت ہر چھوٹے اور بڑے کام کرنے کے لیے قرض لیتی ہے حتیٰ کہ قرض اتارنے کے لیے بھی قرض لیا جاتا ہے۔