اسلام آباد : پاک فوج کے سربراہ جنرل راحیل شریف نے وزیراعظم نوازشریف سے ملاقات کی۔ ملاقات میں آپریشن ضرب عضب سمیت دیگراہم امورپرتبادلہ خیال کیا گیا۔
تفصیلات کے مطابق پاک فوج کے سربراہ جنرل راحیل شریف نے وزیراعظم نوازشریف سے ملاقات کی۔
وزیراعظم ہاؤس اسلام آباد میں ہونے والی اس ملاقات میں دہشت گردی کے خلاف جنگ، آپریشن ضرب عضب، قومی سلامتی کے امور، دہشت گردی میں را کے ملوث ہونے کے شواہد اورکراچی کی صورتحال سمیت دہشت گردی کے واقعات کی روک تھام کے حوالے سے تفصیلی تبادلہ خیال کیاگیا۔
کراچی : وفاقی وزیر داخلہ چودھری نثار علی خان نے کہا ہے کہ دہشت گردی کے واقعات پروزیر اعلیٰ سے استعفیٰ طلب کرنا درست نہیں۔
ان خیالات کااظہار انہوں نے کراچی میں صحافیوں سے گفتگو کرتے ہوئے کیا،تفصیلات کے مطابق وفاقی وزیر داخلہ چودھری نثار علی خان بھی آصف زرداری کے ہم نوا بن گئے۔
کہتے ہیں دہشت گردی کے واقعات آئے روز ہوتے ہیں کیا ہر روز وزیر اعلیٰ تبدیل کردیں ۔ کراچی کے ایک روزہ دورہ پر وفاقی وزیر داخلہ نے وزیر اعلیٰ سندھ کی بھرپور حمایت کی ۔
ان کا کہنا تھا کہ دہشت گردی کے واقعات پر وزیر اعلیٰ سندھ کوتبدیل نہیں کیاجا سکتا۔ ایسی بات و زیر داخلہ نے کچھ عرصے قبل بھی کہی تھی کہ قائم علی شاہ سے استعفے کا مطالبہ کرنے والے بتائیں پشاور میں ا سکول پر حملے کے بعد وزیر اعلیٰ کےپی کے کیوں مستعفی نہیں ہوئے تھے۔
ایسا ہی سابق صدر آصف علی زرداری نےکہا کہ وہ وزیر اعلیٰ سندھ کی تبدیلی کے قائل نہیں۔وزیر داخلہ اور سابق صدر کابیان سیاست ہےیامفادکی ترجمانی،دہشتگردی پر استعفیٰ جمہوری روایات کاحصہ ہے۔
کیا نون لیگ اور پیپلزپارٹی کو اپنے مفادات عوام کے جان و مال سے زیادہ عزیز ہیں۔
شمالی وزیرستان : امریکی ڈورن حملے میں6افراد ہلاک اور2زخمی ہوگئے، ہلاکتوں میں مزید اضافے کا خدشہ ہے۔
تفصیلات کے مطابق شمالی وزیرستان ایجنسی پاک افغان سرحد کےقریب تحصیل شوال کے علاقے زوئی نرائے میں امریکی ڈرون طیاروں نے ایک مکان اور ایک گاڑی پر چار میزائل داغے ہیں۔
ابتدائی رپورٹ کے مطابق امریکی ڈورن حملے میں چھ افراد جاں بحق اور دو زخمی ہوئے ہیں، ہلاکتوں میں مزید اضافے کا خدشہ ہے۔
علاقے کے مقامی افراد نے اپنی مدد آپ کے تحت ملبے سے لاشیں اور زخمی نکال لئے ہیں۔ حملے کے باوجود امریکی ڈرون طیاروں کی علاقے میں پروازیں بدستور جاری ہیں۔
جس سے علاقے میں شدید خوف و ہراس پایا جاتا ہے۔ رواں ماہ میں علاقے میں ہونے والا یہ دوسرا ڈرون حملہ ہے۔ اس سے قبل تحصیل شوال میں ہی ایک امریکی ڈرون حملے میں پانچ افراد ہلاک اور متعدد زخمی ہوئے تھے۔
واضح رہے کہ حکومت پاکستان نے شمالی وزیرستان میں امریکی ڈرون حملے کی شدید مذمت کرتے ہوئے کہا ہے کہ ڈرون حملے بند کئے جائیں۔
سولہ مئی کو شمالی وزیرستان کے علاقے مانا میں ڈورن حملے سے متعدد ہلاکتیں ہوئیں، پاکستانی دفترِ خارجہ کے ترجمان نے کہا ہے کہ امریکی ڈرون حملے پاکستان کی خود مختاری اور سالمیت کے خلاف ہیں۔
دفترِ خارجہ کے بیان کے مطابق پاک فوج دہشت گردی کے خلاف ضرب عضب میں مصروف ہے، جو فیصلہ کن مر حلے سے آگے بڑھ رہا ہے، ڈرون حملوں سے دہشت گردی کے خلاف جاری آپریشن ضرب عضب متاثر ہورہا ہے۔
اسلام آباد : عمران خان نے ایبٹ آباد سمیت تمام جلسے منسوخ کردیئے، منسوخی کا فیصلہ الیکشن کمیشن کے نوٹس پرکیا گیاہے۔
تفصیلات کے مطابق تحریک انصاف کے سربراہ عمران خان نے ایبٹ آباد میں ہونے والا جلسہ منسوخ کردیا،الیکشن کمیشن نے جلسہ کرنے پر اکیس مئی کو طلب کررکھا ہے۔
پی ٹی آئی ذرائع کے مطابق عمران خان نے ایم این ایز ،ایم پی ایز اوروزیر اعلیٰ کے پی کے کو الیکشن کمیشن کے ضابطہ اخلاق پرعمل کرنے کی ہدایت کی ہے۔
عمران خان کوانیس سے چھبیس مئی تک مختلف مقامات پر بارہ جلسے کرناتھے، جو تمام منسوخ کردیئے گئے ہیں، جلسوں کی منسوخی کا فیصلہ الیکشن کمیشن کے نوٹس پرکیا گیا ہے۔
عمران خان نے الیکشن کمیشن سے ن لیگ کیخلاف ایکشن لینے کا مطالبہ بھی کیا ہے، ان کا کہنا ہے کہ ن لیگ گلگت میں ضابطہ اخلاق کی خلاف ورزی کررہی ہے۔
علاوہ ازیں انتخابی ضابطہ اخلا ق کی خلاف ورزی پر الیکشن کمیشن نے تحریک انصاف کے سربراہ عمران خان کو نوٹس جاری کردیا ہے۔
عمران خان سے کہا گیا ہے کہ وہ اکیس مئی کو الیکشن کمیشن کے سامنے ذاتی طور پر پیش ہوں۔ الیکشن کمیشن ذرائع کے مطابق عمران خان کی طرف سے خیبرپختون خوا میں جلسوں کے شیڈول جاری کرنے اور اس حوالے سے ان کے بیانات پر نوٹس جاری کئے گئے ہیں۔
کمیشن نے کے پی کے کے دو صوبائی وزرا مشتاق غنی اور حبیب الرحمان کو بھی انتخابی ضابطہ اخلاق کی خلاف ورزی پر نوٹس جاری کئے ہیں۔ دونوں وزرا کو پچیس مئی کو طلب کیا گیا ہے۔
کراچی: سابق صدرآصف علی زرداری کا کہنا ہے گورنر راج لگے گا اور نہ ہی وزیراعلی سندھ کو تبدیل کیا جائیگا۔
آصف علی زرداری نے زرداری ہاوٴس اسلام آباد میں صحافیوں سمیت پیپلز پارٹی کے رہنما وں سے ملاقات کی، اس موقع پر آصف علی زرداری کا کہنا تھا کہ اٹھارویں ترمیم کے بعد سندھ میں گورنر راج لگانا آسان نہیں ہے، وزیر اعلی سندھ کی تبدیلی کے سوال پر بھی انہوں نے انکارکیا۔
سابق صدر نے کہا کہ پیپلز پارٹی نیوٹرل امپائر نہ ہونے کے سبب انتخابات میں کامیاب نہ ہوسکی۔
سابق وزیر داخلہ کی دبنگ انٹری کے سوال پر آصف زرداری کا کہنا تھاکہ ذوالفقار مرزا کسی کے اشارے پر چل رہے ہیں، ان کا کہنا تھا کہ پاک چین اقتصادی راہداری کے روٹ میں اضافے سے کوئی پریشانی نہیں۔
کراچی: ڈیفنس کے علاقے زمزمہ اسٹریٹ پر واقع اسلحہ کی دکان پر پولیس نے چھاپہ مار کر دکان کو سیل کردیا۔
تفصیلات کے مطابق سابق وزیر داخلہ ذوالفقار مرزا کو مبینہ طور پر اسلحہ فراہم کرنے کے شبہ میں پولیس نے ایس پی کلفٹن امجد حیات کی سربراہی میں ڈیفنس کے علاقے زمزمہ اسٹریٹ پر واقع اسلحہ کی دکان گنز اینڈ ایسیسریز پر چھاپہ ماراہے۔
دکان سے ایک رائفل اور لائسنس برآمد کرکے دکان کو سر بمہر کردیا گیا، پولیس نے دکان کا ریکارڈ اپنی تحویل میں لے لیا ہے۔ پولیس نے دیگر لائسنس بھی اپنے قبضے میں لے لئے۔
پولیس کے مطابق برآمد ہونے والا لائسنس اور رائفل ذوالفقار کے بیٹے حسنین مرزاکی ہے، مذکورہ لائسنس ڈی سی او بدین نے جاری کیا ہے۔
پولیس حکام کا کہنا ہے کہ اس دکان سے ذوالفقار مرزا کے گن مینوں کو اسلحہ فراہم کیا جا تا ہے، سابق وزیر داخلہ ذوالفقار مرزا نے دو تین روز قبل اس دکان سے اسلحہ بھی خریدا تھا۔
چھاپہ کے دوران کوئی گرفتاری عمل میں نہیں آئی، واضح رہے کہ مذکورہ دکان پر اس سے قبل بھی چھاپہ مارا گیا تھا، جہاں سے ممنوعہ اسلحہ برآمد بھی ہوا تھا۔
لاہور : انٹیلی جنس بیورو نےلاہور میں آگ لگنے سے چھ بچوں کی اموات میں ضلعی انتظامیہ کو ذمہ دار قراردیدیا۔ لاہورکےعلاقےکوٹ خواجہ سعید میں آتشزدگی سے چھ بچوں کی مو ت کا ذمہ دا ر ضلعی انتظامیہ تھی۔
انٹیلی جنس حکام نے بھی اے آروائی نیوز اورعینی شاہدین کےبیانات تصدیق کردی۔ انٹیلی جنس بیورو نے متاثرہ گھر کا دورہ کیا اور آگ لگنے سے معصوم بچوں کی اموات کے محرکات کا جائزہ لیا۔
آئی بی حکام کے مطابق آگ پر بروقت قابو نہیں پایا گیا جس سے معصوم بچے جان سے چلے گئے۔ حادثے میں ضلعی انتظامیہ کی غفلت اور نا اہلی کھل کر سامنے آگئی۔
اے آر وائی نیوز نے گزشتہ روز فائر بریگیڈ کی نااہلی کا پردہ چاک کیا تھا۔ واضح رہے کہ لاہور کے علاقے شاد باغ میں گذشتہ روز شارٹ سرکٹ کے باعث لگنے والی آگ سے ایک ہی خاندان کے چھ بچے جاں بحق ہوگئے تھے جن میں تین لڑکے اور تین لڑکیاں شامل تھیں۔
کراچی : سندھ اسمبلی کا اجلاس ہو اور ہنگامہ آرائی نہ ہو۔ یہ روایت سندھ اسمبلی نے آج بھی برقرار رکھی، تلخ جملوں کا تبادلہ۔الزامات کی بوچھاڑ۔ شور شرابا۔چیخ و پکار حسب سابق ہوتی رہی۔
سندھ اسمبلی کا ایوان پہلے کی طرح مچھلی بازار کا منظر پیش کرتا رہا۔ لگتا ہے بات نہ کرنے دینا اورکسی کی ایک نہ سُننا صوبائی اسمبلی کی روایت بن گئی ہے۔
ہنگا مے کا آغاز اُس وقت ہوا جب منظور وسان نے کرپشن پر بات کرنا چاہی ۔ تو ارکان نے ایوان سر پر اُٹھا لیا ۔قائم مقام اسپیکر نے ریمارکس دیئے کہ شور مچانے والے عادت سے مجبور ہیں۔
جس پرہنگامہ آرائی میں مزید شدت آگئی، منظور وسا ن نے لاکھ کوشش کی کہ کرپشن پر تقریر مُکمل کرلیں مگروہ ناکام رہے ۔جس پر دلبرداشتہ ہوکر منظور وسان نےیہ کہہ کر بیٹھ گئے کہ اپوزیشن کا سارا ہنگامہ پریس گیلری کی توجہ کیلئے ہے۔
لندن: اسکاٹ لینڈ یارڈ پولیس نے عمران فاروق قتل کیس میں زیر تفتیس زوہیب جعفری کوکلیئر قرار دے دیا۔
اسکاٹ لینڈ یارڈ پولیس ذرائع کے مطابق زوہیب جعفری سے تفتیش مکمل کرلی گئی ہے ،تفتیش کی روشنی میں زوہیب جعفری کو کلئیرقرار دے دیا گیا ہے۔
اسکاٹ لینڈ یارڈ پولیس کا کہنا ہے عمران فاروق قتل کیس میں اب زوہیب جعفری کو نہیں بلایا جائے گا، زوہیب جعفری کو گزشتہ سال اپریل کے مہینے میں ڈاکٹر عمران فاروق قتل کیس میں شامل تفتیش کیا گیا تھا۔
اس کیس میں ان کے گھر کی تلاشی بھی لی گئی تھی اور ان کے گھر سے پولیس کچھ اشیا بھی لے کر آئی تھی، اب انہیں کہا گیا ہے کہ وہ اپنی چیزیں ایک ہفتے میں لے جاسکتے ہیں۔
لاہور:زمبابوے کیخلاف ہوم سیریز کیلئے قومی ٹی ٹوئنٹی اسکواڈ کا اعلان آج متوقع ہے، ون ڈے سیریز کیلئے ٹیم کا اعلان بعد میں کیا جائے گا۔
زمبابوے سے سیریز، سلیکشن کمیٹی کے اجلاس کا آج آخری راؤنڈ ہے ابتدائی فہرست تیارکرنے کے بعد ٹی ٹوئنٹی کیلئےقومی اسکواڈ کااعلان آج کیا جائے گا۔
تین ون ڈے میچز کی سیریزکیلئے ٹیم کا چند روز بعد ہوگا،ذرائع کے مطابق ہیڈ کوچ وقار یونس اور اظہر علی سے مشاورت مکمل کرلی گئی ہے، ٹی ٹوئنٹی کے کپتان شاہد آفریدی آج رات لندن سے وطن واپس پہنچ رہے ہیں۔
ٹی ٹوئنٹی ٹیم کیلئے آفریدی سے فون پر بات چیت کر لی گئی تھی، بنگلادیش کے خلاف مایوس کن کارکردگی کے بعد نوجوان کرکٹرز سمیع اسلم، سعد نسیم اور فواد عالم کو ڈارپ کیے جانے کا امکان ہے۔
ڈومیسٹک کرکٹ میں شاندار کارکردگی دکھانے پرمحمد سمیع، شعیب ملک اور عمراکمل کی واپسی متوقع ہے۔
انجری مسائل کا شکار صہیب مقصود اور محمد عرفان زمبابوے کیخلاف سیریز کا حصہ نہیں ہوں گے، پاکستان میں چھ سال بعد پہلا انٹرنیشنل میچ بائیس مئی کو قذافی اسٹیڈیم میں ہوگا۔