Author: ویب ڈیسک

لاہور: پاکستان میں چھ سال بعد بین الااقوامی کرکٹ کی رونقیں بحال ہوگی، زمبابوے کی کرکٹ ٹیم شاہینوں سے ٹکرانے کیلئے آج پاکستان پہنچ رہی ہے۔

پاکستان میں اب انٹرنیشنل کرکٹ کی بحالی ہورہی ہے، زمبابوے ٹیم کی آمد میں حائل تمام رکاوٹیں دور ہوگئی ہیں، زمبابوے ٹیم ہرارے سے پاکستان کے سفر کا آغاز کرچکی ہے۔

زمبابوے کی کرکٹ ٹیم دبئی پہنچ گئی، پندرہ گھنٹے قیام کے بعد پاکستان میں قدم رکھے گی، ٹیم کے شاندار استقبال کی تیاریاں مکمل کرلی گئیں ہیں۔

پاکستان کرکٹ بورڈ کے آفیشلز اور اعلٰی حکام ٹیم کا پرتپاک استقبال کریں گے،لاہور میں میچ کے لئے تمام تر انتظامات مکمل ہیں، سیکورٹی ہائی الرٹ ہے، ذرائع کے مطابق لاہور آمد کے بعد ٹیم کو سخت سیکورٹی میں ہوٹل پہنچایا جائے گا، ہوٹل، قذافی اسٹیڈیم اور اطراف میں پولیس کی بھاری نفری تعینات کردی گئی ہے۔

ہرارے ائیرپورٹ پر پاکستان کمیونٹی کی بڑی تعداد نے نیک تمناؤں کیساتھ زمبابوے کرکٹ ٹیم کو روانہ کیا۔ آخر وہ چھ سال بعد پاکستان میں انٹرنیشنل کرکٹ جو واپس لا رہے ہیں۔

طویل فاصلہ طے کرنے کے بعد ٹیم زمبابوے منگل تک پاکستان کی سرزمین پر قدم رکھے گی، تمام میچز لاہور میں ہونگے اور مہمانوں کو مکمل پروٹوکول دیا جائے گا۔