اسلام آباد : ملک میں 2 سے 3 ارب روپے کے آن لائن فراڈ کیسز رپورٹ ہونے کا انکشاف سامنے آیا، ہیکرز شہریوں کے دوستوں اور اہل خانہ کے نام استعمال کرتے ہوئے رقوم ہتھیا لیتے ہیں۔

تفصیلات کے مطابق نیشنل سائبر کرائم انویسٹی گیشن ایجنسی (NCCIA) حکام نے انکشاف کیا ہے کہ ملک میں اب تک 2 سے 3 ارب روپے مالیت کے آن لائن مالی فراڈ کے کیسز رپورٹ ہو چکے ہیں۔

یہ انکشاف سینیٹ کی قائمہ کمیٹی برائے آئی ٹی اینڈ ٹیلی کمیونیکیشن کے اجلاس میں کیا گیا، جس کی صدارت سینیٹر پلوشہ خان کر رہی تھیں۔

بریفنگ میں حکام نے بتایا کہ غیر قانونی کال سینٹرز کے ذریعے عام شہریوں کو مختلف کالز کی جاتی ہیں، جبکہ واٹس ایپ ہیکنگ کے ذریعے مالی فراڈ کے کیسز سب سے زیادہ رپورٹ ہوئے ہیں۔

حکام کا کہنا تھا کہ ہیکرز شہریوں کے دوستوں اور اہل خانہ کے نام استعمال کرتے ہوئے رقوم ہتھیا لیتے ہیں۔

حکام کے مطابق اب تک مجموعی طور پر 63 غیر قانونی کال سینٹرز پر چھاپے مارے گئے ہیں اور 7 کروڑ 20 لاکھ روپے کے فراڈ کے کیسز رجسٹرڈ کیے جا چکے ہیں۔

حکام نے مزید بتایا گیا کہ مجرمان بیرون ملک ملازمتوں کا جھانسہ دے کر بھی شہریوں کو لوٹتے ہیں، جبکہ سوشل میڈیا پر پرتعیش لائف اسٹائل دکھا کر لوگوں کو متاثر کرتے ہیں۔

اسلام آباد: سینیٹر افنان اللہ نے ایلون مسک کے پاکستانیوں کے خلاف ریمارکس پر شدید برہمی کا اظہار کرتے ہوئے اسٹارلنک کو پاکستان میں لائسنس نہ دینے کی تجویز دیدی۔

تفصیلات کے مطابق سینیٹر پلوشہ خان کی زیر صدارت سینیٹ کی قائمہ کمیٹی برائے انفارمیشن ٹیکنالوجی و ٹیلی کمیونی کیشن کا اجلاس ہوا، جس میں اسٹار لنک کے لائسنس اور سیکیورٹی کلیئرنس کا معاملہ زیر بحث آیا۔

اجلاس میں سینیٹر افنان اللہ نے ایلون مسک کے پاکستانیوں کے خلاف ریمارکس پر شدید برہمی کا اظہار کرتے ہوئے کہا کہ ایلون مسک پاکستان اور عوام کے خلاف نسل پرستانہ رویہ رکھتے ہیں، ان کے بیانات اور ٹویٹس اس بات کا ثبوت ہیں۔

اس موقع پر سینیٹر افنان اللہ نے تجویز دی کہ اسٹار لنک کو پاکستان میں لائسنس نہ دیا جائے، ایلون مسک کا ٹویٹر دیکھ لیں وہ نان وائٹ لوگوں کےبارےمیں کیا کہتا ہے۔

چیئرپرسن کمیٹی سینیٹر پلوشہ خان نے کہا کہ "ہم صرف یہ جاننا چاہتے ہیں کہ اسٹار لنک کا پاکستان میں موجودہ اسٹیٹس کیا ہے”۔ اس پر پی ٹی اے حکام نے بریفنگ دیتے ہوئے بتایا کہ ابھی تک کمپنی کو لائسنس اور سیکیورٹی کلیئرنس نہیں ملی۔

اجلاس میں اسپیکٹرم آکشن کے معاملے پر بھی غور کیا گیا۔ آئی ٹی حکام نے بریفنگ میں بتایا کہ اس وقت پاکستان میں 600 میگا ہرٹز اسپیکٹرم موجود ہے جو ناکافی ہے۔

حکام کے مطابق، بنگلہ دیش کی آبادی 130 ملین ہے اور وہاں بھی اسپیکٹرم صرف 600 میگا ہرٹز ہے، جب کہ سعودی عرب اس وقت 1200 میگا ہرٹز اسپیکٹرم پر کام کر رہا ہے۔

سینیٹر افنان اللہ نے کہا کہ دنیا تیزی سے 6G کی جانب جا رہی ہے، اور اگر یہی صورتحال رہی تو پاکستان کو وہاں پہنچنے میں 25 سال لگ جائیں گے۔

سینیٹر ہمایوں مہمند نے اسپیکٹرم آکشن میں تاخیر پر سوال اٹھاتے ہوئے کہا کہ رکاوٹیں کیا ہیں اور تاخیر کیوں ہو رہی ہے۔

آئی ٹی حکام نے وضاحت کی کہ اسپیکٹرم آکشن میں تاخیر کی بڑی وجہ عدالتوں کی جانب سے دیے گئے اسٹے آرڈرز ہیں، تاہم وزارت قانون کے تعاون سے انہیں ختم کرانے کی کوشش جاری ہے۔

حکام نے مزید بتایا کہ اسپیکٹرم آکشن کے لیے کنسلٹنٹ ہائر کیا جا چکا ہے اور دسمبر تک آکشن کرانے کی کوشش کی جائے گی۔

اسلام آباد: نیشنل ڈیٹابیس اینڈ رجسٹریشن اتھارٹی (نادرا) نے شہریوں کے لیے کال سینٹر سہولت کے حوالے سے بڑا اعلان کردیا۔

تفصیلات کے مطابق نیشنل ڈیٹا بیس اینڈ رجسٹریشن اتھارٹی (نادرا) نے اعلان کیا ہے کہ راولپنڈی اور اسلام آباد میں آج رات نادرا کال سینٹر سہولت معطل رہے گی تکنیکی وجوہات کے باعث کال سینٹر کی سروسز عارضی طور پر معطل ہوگی۔

نادرا کا کہنا تھا کہ ہیلپ لائن نمبر 051-111-786-100 اور موبائل صارفین کے لیے مختص نمبر 1777 آج رات 12 بجے سے کل صبح 8 بجے تک دستیاب نہیں ہوں گے۔

ادارے نے شہریوں سے ہونے والی اس عارضی تکنیکی خرابی پر معذرت کرتے ہوئے کہا ہے کہ خدمات صبح 8 بجے بحال کر دی جائیں گی۔

نادرا نے شہریوں کو مزید معلومات کے لیے اپنی آفیشل ویب سائٹ www.nadra.gov.pk اور سوشل میڈیا پلیٹ فارمز سے رابطہ رکھنے کی بھی ہدایت کی ہے۔

مزید پڑھیں: گھر بیٹھے پیدائش اور وفات کے آن لائن اندراج کا آغاز

خیال رہے نادراحکومت پاکستان کا ایک اہم ادارہ ہے جس کا آغاز 2000ء میں کیا گیا، اس ادارے کا کام عوام کی رجسٹریشن کرنا اور ان کو قومی شناختی کارڈ جاری کرنا ہے۔

کمپیوٹرائزڈ قومی شناختی کارڈ (CNIC) ایک جدید کمپیوٹرائزڈ نظام سے مربوط کارڈ ہے، جو ہر پاکستانی شہری کی معلومات کو جدید ٹیکنالوجی سے ہم آہنگ کرنے کے لیے ایک ابتدائی قدم ہے۔

جس کے تحت 2012ء تک 89ء5 ملین لوگوں کو یہ کارڈ جاری کیے جا چکے ہيں ۔ یہ کارڈ ہر اٹھارہ سال سے زائد عمر کے شہری کو جاری کیے جاتے ہیں ۔