لاہور : رائیونڈ میں 30 روپے کے تنازع پر 2 بھائیوں کے قتل میں ملوث مرکزی ملزم اویس کوگرفتار کرلیا گیا، ملزم کی نوجوان کوبلا مارنے کی فوٹیج سامنے آئی تھی۔
تفصیلات کے مطابق لاہور کے علاقے رائیونڈ میں پھل فروشوں کے ساتھ 30 روپے کے تنازع پر ہونے والے تشدد کے افسوسناک واقعے میں دو بھائیوں کی ہلاکت کے واقعے میں پیش رفت ہوئی۔
پولیس نے بتایا کہ دو بھائیوں کے قتل میں ملوث مرکزی ملزم اویس کوگرفتارکرلیا، ملزم اویس کی نوجوان کو بلا مارنے کی فوٹیج سامنے آئی تھی۔
پولیس کا کہنا تھا کہ اویس اور تیمور سمیت دو ملزمان پہلے ہی گرفتار کیے جا چکے ہیں جبکہ مزید چار ملزمان کی گرفتاری کے لیے چھاپے مارے جا رہے ہیں اور واقعے کی تفتیش سی سی ڈی چوہنگ کے حوالے کر دی گئی ہے۔
یاد رہے لاہور کے علاقہ تھانہ رائے ونڈ سٹی کے علاقے میں صرف 30 روپے کی خاطر پھل فروش نے اپنے ساتھیوں کے ساتھ مل کر دو بھائیوں پر بہیمانہ تشدد کیا تھا۔
جھگڑے میں دونوں بھائی شدید زخمی ہو گئے تھےم جنہیں اسپتال منتقل کیا گیا تھا، جہاں کچھ دیر بعد 21 سالہ واجد زخموں کی تاب نہ لاتے ہوئے دم توڑ گیا تھا جب کہ 17 سالہ راشد کو تشویشناک حالت میں اؔئی سی یو منتقل کیا گیا تھا، جہاں وہ زندگی اور موت کی کشمکش میں مبتلا رہنے کے بعد دم توڑ گیا تھا۔
مزید پڑھیں : صرف 30 روپے کی خاطر پھل فروش کے تشدد سے زخمی دوسرا بھائی بھی دم توڑ گیا
بعد ازاں رائے ونڈ پولیس نے واقعہ کا مقدمہ نوجوانوں کے والد کی مدعیت میں درج کر کے ایک ملزم پھل فروش تیمور کو گرفتار کیا تھا۔
پولیس کا یہ بھی کہنا تھا کہ حملہ آور جب بھائیوں پر تشدد کر رہے تھے تو وہاں موجود ہجوم انہیں بچانے کی بجائے ویڈیو بناتا رہا، خون میں لت پت لڑکا اپنے بے ہوش بھائی کا سر گود میں لیے بیٹھا تھا، ایک ملزم نے آگے بڑھ کر زخمی بھائی کے سر پر زور سے بیٹ مارا تو وہ بھی بے ہوش ہو گیا۔
