Author: یار محمد

لاہور: رائیونڈ روڈ پر گزشتہ روز ایک غیر ملکی شہری سے ڈکیتی کے واقعے میں ان کا ڈرائیور شہباز شریف ملوث نکلا ہے۔

تفصیلات کے مطابق پولیس نے انکشاف کیا ہے کہ لاہور میں پاجیاں روڈ کے قریب گزشتہ روز ایک غیر ملکی شہری کی گاڑی پر فائرنگ کر کے انھیں لوٹنے میں انھی کا ڈرائیور شہباز شریف ملوث نکلا ہے۔

پولیس کا کہنا ہے کہ غیر ملکی شہری کا ڈرائیور شہباز شریف واردات میں ملوث تھا، ڈاکوؤں نے ڈرائیور کے ساتھ مل کر واردات کی منصوبہ بندی کی تھی، جب کہ غیر ملکی شہری سے واردات کرنے والے 3 ڈاکوؤں کا باقاعدہ ریکارڈ بھی موجود ہے۔

خیال رہے کہ پاجیاں روڈ کے قریب نامعلوم افراد نے غیر ملکی شہری کی گاڑی پر فائرنگ کی تھی تاہم غیر ملکی اور ان کا ڈرائیور اس میں محفوظ رہے تھے، پولیس کا کہنا تھا کہ ڈرائیور کی مزاحمت پر فائرنگ کی گئی تھی، اس واردات میں ڈاکوؤں نے 7 لاکھ کیش، اور ایک کروڑ 40 لاکھ مالیت کے چیک چھینے تھے۔

گزشتہ روز اس واردات کی ایف آئی آر بھی درج کرائی گئی تھی، مقدمہ غیر ملکی شہری کی مدعیت میں تھانہ رائے ونڈ سٹی میں درج کیا گیا، ایف آئی آر کے مطابق واردات کرنے والے ڈاکوؤں کی تعداد 5 تھی، اور وہ 2 موٹر سائیکلوں پر سوار تھے۔

ڈاکوؤں کی بدقسمتی کہ واردات کے بعد بھاگنے کے دوران ایک موٹر سائیکل کو حادثہ پیش آ گیا، موٹر سائیکل ٹریکٹر ٹرالی سے ٹکرا گئی، جس میں ایک ڈاکو ہلاک جب کہ 2 زخمی ہو گئے، پولیس نے انھیں حراست میں لے کر لوٹی گئی رقم بھی برآمد کر لی تھی، جب کہ زخمیوں کو اسپتال منتقل کیا گیا تھا۔ ایف آئی آر کے مطابق حادثے میں ہلاک اور زخمی ملزمان کی شناخت کر لی گئی ہے، جب کہ واردات میں ملوث دیگر 2 ملزمان کی تلاش جاری ہے۔

اس واردات کی فوٹیج بھی منظر عام پر آگئی تھی، جس میں دیکھا گیا کہ ڈاکو بیگ چھین کر ساتھیوں کے ساتھ فرار ہو رہے ہیں، اس سے قبل سی سی پی او لاہور غلام محمود ڈوگر نے سیف سٹی کیمروں کی مدد سے ملزمان ٹریس کرنے کا حکم جاری کر دیا تھا۔

اب پولیس کا کہنا ہے کہ ملزمان اسی فیکٹری کے ملازم ہیں جہاں غیر ملکی شہری کام کرتا تھا، ملزمان نے چند ماہ قبل فیکٹری سے کام چھوڑ دیا تھا، واردات کے وقت ڈرائیور نے پاجیاں چوک پر خود ہی گاڑی روک دی تھی، جب کہ ملزمان نے چوری کی موٹر سائیکل پر جعلی نمبر پلیٹ لگا کر واردات کی جسے گرین ٹاؤن سے چوری کیا گیا تھا۔

پولیس بیان کے مطابق تینوں ملزمان رائیونڈ کے علاقے جلال پورہ میں مقیم تھے، ملزمان کے خلاف رائیونڈ، سندر، مانگا منڈی میں مقدمات درج ہیں، جب کہ ڈرائیور شہباز شریف، حسنین اور شہزاد پولیس حراست میں ہیں۔

لاہور: لاہور میں ہونے والی ایک شادی کی تقریب میں بچوں کے گینگ نے فلمی کارروائی کرتے ہوئے لاکھوں روپے مالیت کا سونا چوری کر لیا۔

تفصیلات کے مطابق لاہور کے علاقے سبزہ زار میں شادی کی ایک تقریب میں بچو‍ں کے ایک گینگ نے مہمانوں کو لوٹ لیا، چور بچوں نے مہمانوں کو نہ صرف نقد رقم بلکہ زیورات سے بھی محروم کر دیا۔

رپورٹ کے مطابق شادی کی تقریب میں منظم بچوں کا گینگ تیار ہو کر داخل ہوا تھا، گینگ نے نہایت شاطرانہ انداز میں مہمانوں کو نشانہ بنایا اور مجموعی طور پر 21 تولہ سونا اور ایک لاکھ نقدی چوری کر کے فرار ہو گئے۔

شادی میں شریک متاثرین نے پولیس کو درخواست دی ہے کہ انھیں تقریب میں لوٹا گیا۔

لاہور: چڑیاگھر میں وائٹ ٹائیگر کے 2 بچوں کی اچانک ہلاکت کی وجہ معلوم کرنے کے لیے لاشوں کا پوسٹ مارٹم کیا گیا تھا جس کی رپورٹ آ گئی۔

تفصیلات کے مطابق لاہور چڑیا گھر میں ہلاک ہونے والے سفید ٹائیگر کے دونوں بچوں میں کرونا کا شبہ ظاہر کیا گیا ہے، پوسٹ مارٹم رپورٹ میں کہا گیا ہے کہ ٹائیگر کے بچوں کی آنتوں میں سوزش تھی۔

پوسٹ مارٹم رپورٹ کے مطابق ٹائیگر کے بچوں کے پھیپھڑوں میں انفیکشن سے بایاں پھیپھڑا سکڑ چکا تھا، جب کہ دائیں پھیپھڑے میں پانی بھر چکا تھا، وائٹ ٹائیگرز کے دل میں ہیمبرج کے باعث خون کے دھبے بھی پائے گئے۔

رپورٹ میں کہا گیا ہے کہ شیر کے بچوں کو سانس لینے میں بھی دشواری کا سامنا تھا، واضح رہے کہ چڑیا گھر کی انتظامیہ نے کہا ہے کہ زو کے 6 ملازمین میں بھی کرونا کی تشخیص ہو چکی ہے۔

یاد رہے کہ جمعرات کو لاہور چڑیا گھر میں نایاب سفید ٹائیگر کے دو بچے تین ماہ کی عمر میں وائرل انفیکشن کی وجہ سے مر گئے تھے، چڑیا گھر کی جانب سے کہا گیا تھا کہ دونوں بچوں کی ماں ان کی ٹھیک طریقے سے دیکھ بھال نہیں کر رہی تھی جس کی وجہ سے وہ ہلاک ہوئے۔

سفید ٹائیگر کے ہاں تین ماہ قبل 4 بچے پیدا ہوئے تھے، ایک بچہ کمزوری کے باعث پیدائش کے وقت ہی مر گیا تھا، ایک بچہ پیدائش کے ایک ماہ بعد ہلاک ہوا جب کہ دو جمعرات کو ہلاک ہوگئے۔