Author: زعیم باصر

کراچی: صوبائی وزیر اطلاعات شرجیل میمن نے کہا ہے کہ پیپلز پارٹی نے کراچی کو انفرا اسٹرکچر دیا ہے۔ کراچی میں پانی کے لیے اسکیمیں دی ہیں جبکہ کراچی میں کے فور منصوبے پر بھی کام چل رہا ہے.

اے آر وائی نیوز کے مطابق پی پی کے وزیر نے کہا کہ آج پیپلزپارٹی کا میئر منتخب ہونے جارہا ہے۔ حافظ نعیم الرحمان صاحب آج شکست تسلیم کریں۔ 9 مئی کو جوپاکستان میں ہوا جماعت اسلامی انکی سپورٹ چاہ رہی ہے۔ ملک میں نفرت، منافرت کا جو بیج بویا گیا اب اس کا سامنا کررہے ہیں۔

شرجیل میمن نے کہا کہ پی ٹی آئی نے اداروں، معیشت، کشمیر کاز کو نقصان پہنچایا۔ 75 سال کی تاریخ میں کشمیر کاز کو اتنا نقصان نہیں پہنچا جو انھوں نے پہنچایا ہے۔ ان کےغلط سبق کی وجہ سے معصوم لوگ جیلوں میں ہیں۔ کوئی بچہ دہشت گردپیدا نہیں ہوتا ہے۔ کچھ لوگ ہوتے ہیں جو برین واش کرتے ہیں۔

انھوں نے کہا کہ پرامن احتجاج کرسکتے ہیں مگرسندھ حکومت قانون ہاتھ میں لینے کی اجازت نہیں دے گی۔ جماعت اسلامی نے انتشار پھیلایا تو قانون حرکت میں آئیگا۔

راولپنڈی: محکمہ موسمیات کی جانب سے 16 سے 18 جون تک پنڈی میں شدید بارشوں کی پیش گوئی کی گئی ہے۔

اے آر وائی نیوز کے مطابق میٹرو پولیٹن کارپوریشن نے شدید بارشوں کے پیش نظر خستہ حال عمارتوں کو خالی کرنے کے لیے نوٹسز جاری کر دیے ہیں۔ اس حوالے سے 86 کمرشل اور رہائشی عمارتیں رہائش کے لیے خطرناک قرار دی گئی ہیں۔

میٹرو پولیٹن کارپوریشن کا اس حوالے سے کہنا ہے کہ 22 کمرشل اور 66 رہائشی عمارتیں رہنے کے قابل نہیں ہیں۔ خستہ حال عمارتوں کے مالکان عمارتوں کو فوری خالی کریں۔ میٹروپولیٹن حکام کے مطابق خستہ حال عمارتیں بوہڑ بازار، راجہ بازار، سید پوری گیٹ، بھاپڑا بازار اور لنڈا بازارمیں واقع ہیں۔

حکام کا کہنا ہے کہ ان عمارتوں کی حالت بالکل بھی بہتر نہیں اور یہ کسی بھی وقت زمین بوس ہو سکتی ہیں۔ عمارتوں کے مالکان نے اس سلسلے میں عدم تعاون کیا تو ان کے خلاف لوکل گورنمنٹ ایکٹ کے تحت مقدمات درج کیے جائیں گے۔

شہر میں شدید مون سون بارشیں متوقع ہیں جس کے سبب حکام خستہ حال عمارتوں کا سروے کررہے ہیں تاکہ ان کا ڈیٹا جمع کیا جا سکے اور کسی انسانی المیے سے بچنے کے لیےوہاں موجود لوگوں کو محفوظ مقامات کی طرف منتقل کیا جاسکے۔ اس حوالے سے ڈپٹی کمشنر حسن وقار نے بتایا کہ مون سون بارشوں کے پیش نظر خستہ حال عمارتوں کا سروے جاری ہے۔

ہاکس بے کی ساحلی پٹی پر سمندر ایک بار پھر بپھر گیا ہے اور پانی ساحلی پٹی کے ساتھ واقع سڑک پر آنا شروع ہو گیا ہے۔

اے آر وائی نیوز کے مطابق طوفان کی شدت کے سبب ہاکس بے پر ہٹس کی حدود سے نکل کر سمندری پانی آگے آنا شروع ہوگیا ہے۔ سمندر میں طغیانی کی وجہ سے ساحلی پٹی پر بھی لہریں اونچی ہو گئی ہیں۔ اونچی لہروں نے کئی ہٹس کی حفاظتی دیواروں کو نقصان پہنچایا ہے۔ پی ڈی ایم کی جانب سے کہا گیا ہے کہ کراچی میں 15 سے 17 جون تک 120 کلو میٹر کی رفتار سے ہوائیں چلیں گی۔

ہٹس کے سامنے بنائے گئے حفاظتی بند طوفانی ہوائوں اور سمندری پانی کے آگے آنے سے ٹوٹنا شروع ہوگئے ہیں۔ اس کے علاوہ سینڈزپٹ کے قریب بھی حفاظتی بند ٹوٹ گیا جس کے بعد پانی دوسرے حفاظتی بند کے پاس جمع ہو رہا ہے۔

طوفان کی شدت کے پیش نظر کراچی میں ضلعی انتظامیہ کی جانب سے دو حفاظتی بند بنائے گئے ہیں۔ تاہم ہوائوں کے جھکڑ اور سمندر کا پانی بندوں کو بنا کسی خاطر میں لائے آگے رہا ہے۔

واضح رہے کہ پی ڈی ایم اے نے سمندری طوفان بیپر جوائے کے حوالے سے 21 واں الرٹ جاری کردیا ہے، جبکہ جنوب مشرقی سندھ کے لیے بھی 8 واں الرٹ جاری کیا گیا ہے۔
پی ڈی ایم اے کے مطابق انتہائی تیز طوفان جنوب کراچی سے 310 کلو میٹر کے فاصلے پر ہے، یہ طوفان ٹھٹھہ سے 300 کلو میٹر اور کیٹی بندر سے 240 کلو میٹر کے فاصلے پر موجود ہے۔

راوالپنڈی: اے این ایف کی جانب سے ملک میں منشیات کے خلاف بڑے پیمانے پر کارروائیاں جاری ہیں، مختلف واقعات میں 184 کلو گرام منشیات ضبط کرتے ہوئے 5 ملزمان کو گرفتار کر لیا گیا۔

اے آئی وائی نیوز کے مطابق اے این ایف کی جانب سے ملک کے مختلف شہروں میں منشیات اسمگلنگ کیخلاف کارروائیاں جاری ہیں۔ ان تمام کارروائیوں میں 184 کلو گرام سے زائد منشیات برآمد کی گئی ہیں جبکہ 2 افغان باشندوں سمیت 5 ملزمان کی گرفتاری عمل میں آئی ہے۔

ترجمان اے این ایف کے مطابق پہلی کارروائی میں موٹر وے ٹول پلازہ اسلام آباد کے قریب گاڑی سے 22 کلو 800 گرام چرس برآمد کی گئی۔ برآمد ہونے والی چرس گاڑی میں رکھے ہوئے CNG سیلنڈر کے اندر چھاپائی گئی تھی۔ اس کارروائی کے دوران پشاور کے رہائشی ملزم کو گرفتار کیا گیا۔

جی ٹی روڈ پر واقع سنگ جانی ٹول پلازہ کے قریب گاڑی سے 2 کلو ہیروئن اور 2 کلو میتھ (آئس) برآمد ہوئی۔ برآمد کی گئی منشیات گاڑی کے بمپر کے نیچے بنائے گئے خُفیہ خانے میں پوشیدہ کی گئی تھی۔ گاڑی میں سوار دو افغان باشندوں کو موقع پر گرفتار کر لیا گیا۔

حب ریور روڈ، کراچی پر کارروائی کے دوران مسافر بس میں موجود پارسل سے 22 کلوگرام چرس برآمد ہوئی۔ پارسل چمن سے کراچی کیلئے بک کروایا گیا تھا۔ رنگ روڈ پشاور پر ٹرک سے 32 کلو 400 گرام چرس برآمد کی گئی۔ خیبر کا رہائشی ملزم منشیات باڑہ سے کراچی اسمگل کرنے کی کوشش میں حراست میں لیا گیا۔ خیبر کے علاقے باڑہ میں چھپائی گئی 9 کلو گرام چرس بھی برآمد کر لی گئی۔

سیانوالی انٹرچینج فیصل آباد کے قریب گاڑی سے 70 کلو 800 گرام چرس اور 22 کلو 800 گرام افیون برآمد کی گئی۔ گاڑی پر سرکاری نمبر پلیٹ لگا کر اسمگلنگ کی کوشش کی جا رہی تھی۔ گاڑی میں سوار پشاور کے رہائشی ملزم کو اہلکاروں نے حراست میں لے لیا۔
اے این ایف حکام نے بتایا کہ تمام ملزمان کے خلاف انسداد منشیات ایکٹ کے تحت مقدمات درج کر کے مزید تحقیقات کا آغاز کر دیا گیا ہے۔

کراچی: سمندری طوفان بیپر جوائے کے ممکنہ نقصانات سے نمٹنے کیلئے اقدامات تیز کردیے گئے ہیں، اس حوالے سے گورنر سندھ کامران ٹیسوری نے چیئرمین این ڈی ایم اے، کمشنر کراچی اور ایڈمنسٹریٹر سے رابطہ کرلیا ہے۔

اے آر وائی نیوز کے مطابق گورنر کا کہنا تھا کہ این ڈی ایم اے کو جو تعاون چاہیے اس کے لیے حاضر ہیں۔ شہریوں کے انخلا میں مسائل ہوں تو بتایا جائے تعاون کیا جائے گا۔
گورنرسندھ نے کہا کہ کمشنر کراچی ساحلی پٹی سے ہونے والے انخلا کے حوالے سے آگاہ رکھیں۔ ساحلی پٹی سے لوگوں کو جہاں بھی منتقل کیا جائے بتایا جائے۔ لوگوں کے کھانے پینے اور راشن کا انتظام گورنر ہاؤس کرے گا۔ کراچی انتظامیہ اپنی تیاری پوری رکھے، متعلقہ اداروں کو الرٹ رکھا جائے۔

کامران ٹیسوری نے واضح کیا کہ نالوں کی صفائی میں کسی قسم کی کوتاہی برداشت نہیں کی جائے گی۔ کل خود شہر کا دورہ کروں گا اور نالوں کی صفائی کے انتظامات دیکھوں گا۔ ایڈمنسٹریٹر کراچی، کے ایم سی اور ڈی ایم سیز کے عملے کو الرٹ رکھیں اور ان کی چھٹیاں منسوخ کردی جائیں۔

انھوں نے کہا کہ ایڈمنسٹریٹر سمیت کے ایم سی کے افسران، متعلقہ ادارے اور مشینری سڑکوں پر موجود رہنی چاہیے۔ گورنر سندھ کی جانب سے موجودہ انتظامات اور سمندری طوفان سمیت بارش کےحوالےسے اقدامات پر بریفنگ بھی طلب کی گئی۔