Author: زاہد نور

مانچسٹر: شمالی برطانیہ میں ہونے والے بلدیاتی انتخابات میں  پاکستانی نژاد امیدوار بڑی تعداد میں کامیاب قرار پائے ہیں۔

نمائندہ اے آر وائی نیوز کے مطابق شمالی برطانیہ میں 6 مئی کو بلدیاتی انتخابات کا انعقاد کیا گیا۔ جس کے حتمی اور سرکاری نتائج اب جاری کردیے گئے ہیں۔

 ان انتخابات میں  پاکستانی نژاد برطانوی شہریوں کی بڑی تعداد نے بطور امیدوار حصہ لیا، جن میں سے درجنوں نے فتح اپنے نام کی۔

الیکشن کمیشن کی جانب سے جاری ہونے والے حتمی اور سرکاری نتائج کے مطابق مانچسٹر سے پانچ، اولڈھم سے چار، راچڈیل سے چار، بلیک ہرن سے تین، بریڈ فورڈ سے 10، لیڈز سے 7، شیفلڈ سے دو، رادھرم سے چار، ڈونکاسٹر ، ویکفیلڈ اور کرکلیز سے ایک ایک پاکستانی نژاد برطانوی شہری نے کامیابی اپنے نام کی۔

بلدیاتی و میئرل انتخابات میں مجموعی طور پر 42 کے قریب پاکستانی نژاد برطانوی امیدوار کامیاب قرار پائے۔ اتنی بڑی تعداد میں کامیابی پر برطانیہ میں مقیم پاکستانیوں نے خوشی اور اطمینان کا اظہار بھی کیا۔

گریٹر مانچسٹر کے میئر اینڈی برنم بھی اپنی میئرشپ کا دفاع کرنے میں کامیاب رہے جبکہ ویسٹ یارکشائر میں پہلی بار میئر کے لیے ہونے والے انتخابات میں باٹلی سے رُکن پارلیمنٹ ٹریسی بریبن فتح یاب ہوئیں۔

بولٹن: برطانیہ میں اسرائیلی فورسز کی مسجد اقصیٰ میں‌ پُرتشدد کارروائیوں کے خلاف اور فلسطینیوں سے اظہارِ یکجہتی کے لیے مظاہرہ کیا گیا جبکہ برطانیہ کی رکن پارلیمنٹ نے اسرائیل فوج کے حملے کی مذمت کرتے ہوئے وزیراعظم بورس جانسن سے معاملے پر آواز اٹھانے کا مطالبہ کردیا۔

نمائندہ اے آر وائی نیوز کے مطابق برطانوی پارلیمنٹ کی رکن یاسمین قریشی نے فلسطین کی صورتحال پر تشیویش کا اظہار  کرتے ہوئے وزیر اعظم بورس جانسن کو صورتحال پر خط لکھ دیا۔ اپنے خط میں انہوں نے لکھا کہ ’اسرائیلی فوج کی فائرنگ سے مسجدِ اقصیٰ میں عبادت کرنے والے 200 سے زائد فلسطینی زخمی ہوئے‘۔

انہوں نے اپنے خط میں بورس جانسن کو متوجہ کرتے ہوئے لکھا کہ ’ وزیر اعظم اس معاملے  کو اسرائیلی حکام کے سامنے اٹھائیں اور فوری طور پر فوج کے پُرتشدد واقعات کو رکوائیں‘۔

مزید پڑھیں: مسجد اقصیٰ پر اسرائیلی حملہ: پاکستان کی شدید الفاظ میں مذمت

اپنے خط میں انہوں نے لکھا کہ مسجد اقصیٰ میں مسلمانوں پر حملے سے پوری دنیا کے مسلمانوں کے جذبات مجروح ہوئے ہیں۔

دوسری جانب بریڈ فورڈ میں واقع ٹاؤن ہال کے سامنے فلسطینیوں سے اظہارِ یکجہتی کے لیے مظاہرہ بھی کیا گیا، جس میں رکن پارلیمنٹ ناز شاہ بھی شریک ہوئیں۔

مظاہرے میں خواتین اور بچے بھی موجود تھے، جنہوں نے فلسطینیوں کے حق میں اور اسرائیل کے خلاف نعرے لگائے۔ شرکا نے فلسطین کے پرچم اور پلے کارڈ اٹھا رکھے ہیں۔ جن پر مظالم فوری بند کرو کے الفاظ درج تھے۔

واضح رہے کہ گزشتہ شب قابض اسرائیلی فورسز نے مسجد اقصیٰ میں عبادت کرنے والے نمازیوں پر پھر دھاوا بولا تھا۔ اسرائیلی فوج کی فائرنگ اور شیلنگ سے بچی اور خواتین سمیت 80 سے زائد نمازی زخمی ہوئے۔

اس سے قبل جب جمعۃ الوداع کی شب فلسطینیوں نے بڑی تعداد میں مسجد اقصیٰ پہنچ کر عبادت شروع کی تو اسرائیلی فورسز نے قبلۂ اوّل میں داخل ہوکر نمازیوں کو نکالنے کے لیے لاٹھی چارج اور فائر و شیلنگ کی تھی۔

مزید پڑھیں: رمضان میں قبلہ اول پراسرائیلی حملہ انسانیت اور عالمی قوانین کی توہین ہے: وزیراعظم

خبررساں ادارے کی رپوٹ کے مطابق گزشتہ دو روز سے جاری اسرائیلی فورسز کی کارروائیوں میں ایک سالہ بچی سمیت ڈھائی سو سے زائد نمازی زخمی ہوئے۔

ترک صدر رجب طیب اردوان اور وزیراعظم عمران خان نے مسجد اقصیٰ میں نمازیوں پر اسرائیلی حملے کی شدید الفاظ میں مذمت کرتے ہوئے فلسطینی بھائیوں کے ساتھ اظہارِ یکجہتی کا اعلان کیا۔

مانچسٹر: ملکہ برطانیہ نے پاکستانی نژاد برطانوی شہری فاروق حکیم کو اہم عہدے پر تعینات کردیا۔

نمائندہ اے آر وائی کے مطابق ملکہ برطانیہ نے پاکستانی نژاد فاروق حکیم کو ہائی شیرف تعینات کیا۔ اب فاروق حکیم نیو کاسل سے ملکہ برطانیہ کے سال 2021-2022 کے لیے نمائندے ہوں گے ۔

واضح رہے کہ فاروق حکیم گزشتہ تیس سال سے برطانیہ کی صف اوّل کی کمپنیوں میں ایگزیکٹو عہدوں پر ذمہ داریاں سر انجام دے چکے ہیں۔

فاروق حکیم کا آبائی تعلق آزاد کشمیر کے علاقے چکسواری سے ہے۔

ملکہ برطانیہ کی جانب سے ملنے والے اعزاز پر جہاں فاروق حکیم پُرمسرت ہیں وہیں برطانیہ میں مقیم پاکستانی بھی خوشی کا اظہار کررہے ہیں۔

برطانیہ میں صرف 3 کاوینٹیز ایسی ہیں، جہاں پر ہائی شیرف ازخود ملک برطانیہ تعینات کرتی ہیں، جن میں مانچسٹر ایک ہے۔

فاروق حکیم نے سنہ 1990 میں یونیورسٹی آف سندرلینڈ سے گریجویشن  مکمل کیا۔ بعد ازاں انہوں نے ایمپریئل کالج لندن سے ڈپلومہ برائے کاروبار اور آکسفورڈ یونیورسٹی سے 2014 میں ماسٹرز کیا۔

مانچسٹر: برطانوی حکومت نے مردم شماری سروے میں حصہ نہ لینے والے شہریوں پر جرمانہ عائد کرنے کا اعلان کردیا۔

نمائندہ اے آر وائی نیوز کے مطابق برطانیہ میں مردم شماری 2021کاسروے سلسلہ جاری ہے، اس ضمن میں حکومت کی جانب سے ایک سروے فارم جاری کیا گیا ہے۔

تمام شہریوں کو ہدایت کی گئی ہے کہ وہ سروے فارم مقررہ تاریخ 23 مارچ تک بھر کر جمع کرادیں۔ ایسا نہ کرنے والے شہریوں پر ایک ہزار پاؤنڈز (دو لاکھ 16 ہزار 372 روپے) جرمانہ عائد کیا جائے گا۔

برطانیہ میں ہر دس سال بعد مردم شماری کی جاتی ہے، جس میں  سوالنامہ فارم ہر گھر میں بھیجا جاتا ہے، جس میں قومیت، مذہب، جنس، ساتھ رہنے والے افراد، جائیداد اور رہائشی سے متعلق سوال کیے جاتے ہیں۔

ہر گھرانے کو ایک ہی فارم مکمل کرنا ہوتا ہے، فارم پر ایک کوڈ درج کیا جاتا ہے، جس کی مدد سے شہر اس فارم کو آن لائن بھی جمع کراسکتے ہیں۔

انگلینڈ اور ویلز کے شہریوں کو آج فارم مکمل کر کے ارسال کرنے کی تاکید کی گئی کیونکہ مردم شماری کی آخری تاریخ 23 مارچ ہے  جبکہ اسکاٹ لینڈ میں دو ہزار بائیس میں مردم شماری ہوگی ۔

برطانیہ کے قانون کے مطابق مردم شماری فارم میں غلط معلومات فراہم کرنا قابل سزا جرم ہے، ایسا کرنے والے شخص کو قید اور جرمانے یا پھر دونوں سزاؤں کا سامنا کرنا پڑ سکتا ہے۔