برطانیہ: برطانیہ میں طوفان کیارا کے بعد ڈینس نے تباہی مچا دی ہے، ویلز میں متعدد علاقے طوفان سے شدید متاثر ہو چکے ہیں، طوفان کے باعث گزشتہ روز 2 افراد ہلاک ہوئے۔ ساؤتھ ویلز میں طوفان کو بڑا واقعہ قرار دیا گیا ہے۔
تفصیلات کے مطابق برطانیہ میں طوفان ڈینس سے معمول کی زندگی درہم برہم ہو گئی ہے، متعدد علاقے زیر آب آئے، طوفان میں دو ہلاکتیں ہوئیں، ایک نوجوان کینٹ کے علاقے میں سمندر میں ڈوبنے سے اور ایک شخص ساؤتھ ویلز میں سمندر میں گرنے سے ہلاک ہوا، طوفان کے باعث جنوبی برطانیہ میں 90 میل فی گھنٹے کی رفتار سے ہوائیں چلتی رہیں، سینکڑوں پروازیں معطل ہوئیں، طوفان تھم جانے کے بعد اب بھی ساؤتھ ویلز میں سیلابی کیفیت ہے اور ایمرجنسی سروسز امدادی کاموں میں مصروف ہیں۔
محکمہ موسمیات کی جانب سے برطانیہ سمیت یورپ میں ایک ماہ کی بارش ایک دن میں ہونے کا امکان ظاہر کیا گیا ہے، طوفانی ہواؤں اور تیز بارش سے گھروں کی چھتیں اڑ گئیں اور درخت گر گئے، متاثرہ علاقوں میں امدادی کارروائیاں جاری ہیں، برطانوی فوج بھی امدادی کاموں میں مصروف ہے۔
ایک کے بعد دوسرا طوفان، برطانیہ بڑے طوفانوں کی زد میں
پانی میں ڈوبے علاقوں سے لوگوں کو ہیلی کاپٹر کے ذریعے محفوظ مقام پر منتقل کیا گیا، برطانیہ میں طوفان ڈینس کی 700 سے زائد وارننگز بدستور برقرار ہیں۔ جنوبی ویلز کی پولیس متعدد سیلابوں اور لینڈ سلائڈز سے نمٹنے کی کوشش کر رہی ہے، جن میں لوگ بھی پھنسے ہوئے ہیں۔
یاد رہے کہ اس سے قبل آنے والے طوفان کیارہ سے بڑے پیمانے پر تباہی ہوئی تھی، نشیبی علاقے زیر آب آ گئے تھے جب کہ جہاز، ٹرین اور پبلک ٹرانسپورٹ بری طرح متاثر ہوئی تھی، طوفان کیارہ کے باعث 2 افراد بھی لقمہ اجل بنے تھے، جب کہ 5 لاکھ سے زائد گھروں کی بجلی کٹ گئی تھی۔
اس طوفان کو دہائی کا سب سے بڑا طوفان قرار دیا گیا تھا، جس نے برطانیہ میں بڑے پیمانے پر تباہی مچا دی تھی، شمالی برطانیہ میں 92 میل فی گھنٹہ کی رفتار سے ہوائیں چلتی رہیں، یارکشائر کے مضافاتی علاقے زیر آب آ گئے، اور پانی لوگوں کے گھروں اور دکانوں میں داخل ہو گیا تھا۔ طوفان تھمنے کے بعد 6 انچ تک برف پڑنے کی پیش گوئی بھی کی گئی تھی۔
