اسلام آباد : الیکشن کمیشن سنی اتحاد کونسل کو مخصوص نشستیں دینے کے معاملے پر حتمی فیصلہ آج کرے گی، جبکہ لا ونگ سنی اتحاد کونسل کو نشستوں کے معاملے پر قانونی رائے بھی دے گا۔
تفصیلات کے مطابق سنی اتحاد کونسل کو مخصوص نشستوں کے معاملے پر الیکشن کمیشن کا اجلاس طلب کرلیا گیا ، چیف الیکشن کمشنر سکندر سلطان راجہ کی زیر صدارت اجلاس آج ہوگا۔
اجلاس میں کمیشن کے چاروں ممبران،سیکرٹری اورسپیشل سیکرٹری سمیت لاء ونگ شرکت کرے گا، اجلاس میں سنی اتحاد کونسل کی درخواست کا جائزہ لیا جائے گا۔
کمیشن سنی اتحاد کونسل کو مخصوص نشستیں دینے یا نہ دینے سے متعلق حتمی فیصلہ کرے گا جبکہ لا ونگ سنی اتحاد کونسل کو نشستوں کے معاملے پر قانونی رائے بھی دے گا۔
یاد رہے 8 فروری کو ہونے والے انتخابات میں پی ٹی آئی کے حمایت یافتہ آزاد امیدوار بڑی تعداد میں کامیاب ہوئے اور سنی اتحاد اب مخصوص نشستوں کیلیے وہ سنی اتحاد کونسل میں شامل ہوئے ہیں۔
گزشتہ روز سنی اتحاد کونسل نے خواتین اور اقلیتوں کی مخصوص نشستوں کیلیے الیکشن کمیشن میں تحریری درخواست جمع کروائی تھی۔ تحریری درخواست کے ساتھ پارٹی لیٹر اور بیان حلفی بھی جمع کروایا گیا تھا جبکہ استدعا کی گئی تھی کہ خواتین اور اقلیت کی مخصوص نشستوں پر کوٹہ الاٹ کیا جائے۔
درخواست میں کہا گیا تھا کہ پنجاب اسمبلی کے 107 آزاد اراکین نے بھی سنی اتحاد کونسل میں شمولیت اختیار کر لی ہے، اس لیے تمام کامیاب آزاد امیدواروں کے تناسب سے مخصوص نشستیں لاٹ کی جائیں۔
