پشاور : افغانستان کی تازہ صورتحال کے پیش نظر کابل میں موجود شہریوں نے اطمینان کا اظہار کیا ہے ان کا کہنا ہے کہ لوٹ مار کرنے والے والے ملزمان کو طالبان نے گرفتار کرلیا۔
اس حوالے سے کابل میں موجود شہریوں نے اے آر وائی نیوز سے گفتگو کی اور آنکھوں دیکھی موجودہ صورت حال پر اپنے تاثرات کا اظہار کیا۔ شہریوں نے بتایا کہ کابل میں صورتحال 60 فیصد کنٹرول میں ہے، افغان فورسز نے چوکیاں خالی کیں تو گاڑیاں چھیننے اور ڈکیتیوں کے واقعات میں اضافہ ہوگیا۔
انہوں نے بتایا کہ طالبان کے روپ میں چہرے ڈھانپے کچھ ملزمان نے شہریوں کو لوٹنے کی کوشش کی، طالبان نے بروقت کارروائی کرکے تمام افراد کو حراست میں لے لیا۔
افغان شہریوں نے اے آر وائی نیوز سے خصوصی بات چیت کرتے ہوئے بتایا کہ طالبان کی آمد سے کابل کے شہری اب مطمئن ہیں، خواتین کے برقعے کی پابندی کے حوالے سے پالیسی میں نرمی نظر آرہی ہے۔
ایک افغان شہری کا کہنا تھا کہ اسکول اور بینک دو روز کیلئے بند کردیئے گئے، مارکیٹیں بھی بند ہیں، طالبات کو امتحانات دینے کی اجازت دیدی گئی ہے۔
انہوں نے بتایا کہ گرلز اسکولوں کے باہر کسی بھی مرد کی موجودگی کی اجازت نہیں دی جارہی، طالبان نے پولیس چوکیوں پر اپنے لوگ تعینات کرکے سرکاری گاڑیاں تحویل میں لی ہیں۔
افغان شہری کا کہنا تھا کہ طالبان نے تحویل میں لی گئی سرکاری گاڑیوں میں گشت شروع کردیا ہے، بارڈر کی بندش سے اشیائے خوردونوش کی قلت اور قیمتوں میں اضافہ ہوگیا ہے۔ افغانستان میں پیٹرول ،دالیں، گھی چینی چاول، آٹا اور دیگر اشیائے خورو نوش مہنگی ہوگئی ہیں۔
افغان شہری کے مطابق ایئرپورٹ پر امریکہ اور کینیڈا کے جہازوں کی آمد کی افواہ پھیلائی گئی، افواہ کے بعد ایئرپورٹ پر ہنگامہ آرائی اور رش کی صورتحال دیکھنے میں آئی، افواہ پھیلائی گئی کہ امریکہ اور کینیڈا کے جہاز افغان شہریوں کو لے جانے آئے ہیں۔
