Author: ذولقرنین حیدر

اسلام آباد: سنگجانی ٹول پلازہ پر نامعلوم افراد نے دہشتگردی کے مقدمات میں گرفتار پاکستان تحریک انصاف (پی ٹی آئی) کے ملزمان کی قیدی وینز پر حملہ کر دیا۔

آئی جی اسلام آباد سید علی ناصر رضوی نے بتایا کہ سنگجانی ٹول پلازہ کے قریب 3 قیدی وینز پر حملہ کیا گیا تاہم پولیس نے قیدیوں کو فرار کروانے کی کوشش ناکام بنا دی، تمام قیدیوں کو دوبارہ گرفتار کر لیا گیا ہے۔

سید علی ناصر رضوی نے بتایا کہ حملے کے بعد کچھ قیدی وین سے فرار ہوئے تھے، گاڑیوں پر حملہ کرنے والے ملزمان کی تعداد 18 سے 20 تھی، حملہ آوروں میں وزیر بہبود آبادی خیبر پختونخوا کا بیٹا بھی شامل ہے۔

انہوں نے بتایا کہ 3 قیدی وینز میں 82 ملزمان موجود تھے جنہیں پیشی کے بعد اٹک منتقل کیا جا رہا تھا،ا حملے میں ملوث 4 ملزمان کو گرفتار کر لیا گیا ہے۔

پی ٹی آئی کا ردعمل

سیکریٹری اطلاعات پی ٹی آئی شیخ وقاص اکرم نے اپنے بیان میں الزام عائد کیا کہ قیدی وینز پر حملے کا واقعہ پولیس نے خود کروایا ہے، ہمارے ورکرز کی ضمانت ہوگئی تھی اور دوسرے مقدمے میں گرفتاری ڈالی جا رہی ہے۔

شیخ وقاص اکرم نے کہا کہ پولیس کارکنان کو اٹک جیل منتقل کر رہی تھی، پولیس نے فیصل ٹاؤن کے قریب گاڑیاں موڑ کر خود کارروائی کی، 3 قیدی وینز کھڑی کر کے متعلقہ ایس ایچ او شبیر تنولی نے وین کا شیشہ توڑا۔

انہوں نے مزید کہا کہ ہمارے کارکنان کو کہا گیا یہاں سے فرار ہو جاؤ، ہمارے کارکنان فرار ہونے کیلیے تیار نہیں ہیں، میڈیا چاہے تو موقع پر جا کر حالات دیکھ سکتا ہے۔

پی ٹی آئی رہنما ارباب عاصم نے اپنے بیان میں بتایا کہ قیدی وینز میں ایم پی اے لیاقت خان سمیت 164 کارکنان موجود تھے، رہنماؤں اور کارکنان کی ضمانت ہو چکی تھی۔

ارباب عاصم کے مطابق پولیس ضمانت کے باوجود ہمارے کارکنوں کو رہا نہیں کرنا چاہتی تھی، کارکنوں کو اٹک منتقل کیا جا رہا تھا اور راستے میں پولیس نے خود حملہ کروا دیا۔

وفاقی حکومت نے پشتون تحفظ موومنٹ (پی ٹی ایم) کو کالعدم قرار دیتے ہوئے اس پر پابندی عائد کر دی ہے۔

اے آر وائی نیوز کے مطابق وفاقی حکومت نے پشتون تحفظ موومنٹ (پی ٹی ایم) پر پابندی عائد کر دی ہے۔ اس حوالے سے وزارت داخلہ کی جانب سے نوٹیفکیشن جاری کیا گیا ہے، جس میں پی ٹی ایم کو ملک میں امن اور سیکیورٹی کے لیے خطرہ قرار دیتے ہوئے اس پر پابندی عائد کر دی گئی ہے۔

وفاقی حکومت نے سیکشن 111 بی کے تحت اختیارات کا استعمال کرتے ہوئے 1997 کے انسداد دہشتگردی ایکٹ کے تحت اس جماعت کو کالعدم قرار دیتے ہوئے فوری پابندی عائد کرنے کا حکمنامہ جاری کیا ہے۔

اس حوالے سے نوٹفیکیشن کے اجرا کے بعد اب پی ٹی ایم کو کالعدم قرار دے دیا گیا ہے اور نیکٹا کی فہرست میں بھی شامل کیا جا رہا ہے۔

واضح رہے کہ چند روز قبل پی ٹی ایم کے سربراہ منظور پشتین نے وزیراعلیٰ خیبر پختونخوا علی امین گنڈا پور سے بھی ملاقات کی تھی اور انہیں پشتون قومی عدالت میں شرکت کی دعوت بھی دی تھی۔