Author: ذولقرنین حیدر

اسلام آباد: چیئرمین پی ٹی آئی بیرسٹر گوہر کو بھی گرفتار کرلیا گیا، بیرسٹر گوہر خود گرفتاری دینے پارلیمنٹ سے باہر آئے۔

اے آر وائی نیوز کے مطابق اسلام آباد پولیس نے پاکستان تحریک انصاف کے چیئرمین کو پارلیمنٹ کے گیٹ سے گرفتار کیا، اس سے قبل پولیس نے شیر افضل کے بعد شعیب شاہین کو بھی گرفتارکرلیا ہے، پی ٹی آئی رہنما کو ان کے گھر سے حراست میں لیا گیا۔

پاکستان تحریک انصاف کی لیڈرشپ نے شیر افضل کے گرفتار ہونے کے بعد گرفتاری سے بچنے کیلئے پارلیمنٹ میں پناہ لی تھی، تاہم بیرسٹر گوہر گرفتاری دینے خود پارلیمنٹ سے باہر آئے۔

پی ٹی آئی رہنما اپوزیشن لیڈر چیمبرز بند ہونے کے باعث سروس برانچ میں بیٹھے ہیں، بیرسٹر گوہر نے گرفتاری سے قبل پی ٹی آئی ارکان کا مشاورتی اجلاس بھی کیا تھا۔

پارلیمنٹ میں موجود پی ٹی آئی رہنما ممکنہ گرفتاری سے بچنے کیلئے حکمت عملی پر غور کررہے ہیں، بیرسٹر گوہر کے علاوہ زین قریشی، شیخ وقاص اکرم، حامد رضا و دیگر ارکان پارلیمنٹ کے اندر موجود ہیں۔

اس موقع پر پارلیمنٹ ہاؤس میں پی ٹی آئی ارکان کی اسپیکر سے رابطے کی کوشش ناکام ہوگئی، پی ٹی آئی ارکان نے اپوزیشن لیڈر کے چیمبر میں جانے کی کوشش کی، تاہم اپوزیشن لیڈر چیمبر کو لاک کر دیا گیا۔

قبل ازیں شعیب شاہین کی گرفتاری کی سی سی ٹی وی فوٹیج بھی سامنے آگئی ہے، ایس ایچ اور رمنا اور ان کے ساتھ نفری وہاں پہنچی، اس دوران شعیب شاہین اپنے آفس میں کام کررہے تھے۔

ایس ایچ او اس دوران شعیب شاہین کو سلام کرتے ہیں اور انھیں اپنے ساتھ چلنے کا کہتے ہیں جبکہ شعیب شاہین اپنے اسٹاف کو آواز دیتے ہیں، پولیس اہلکار ان کے اسٹاف کو روک دیتے ہیں۔

اسلام آباد: پولیس نے شیر افضل مروت کو گرفتار کرلیا، پاکستان تحریک انصاف کے رہنما کو پارلیمنٹ ہاؤس کے گیٹ سے گرفتار کیاگیا۔

اے آر وائی نیوز کے مطابق رکن پارلیمنٹ شیرافضل مروت کو پارلیمنٹ ہاؤس کے گیٹ سے پولیس نے حراست میں لیا، اس موقع پر شیر افضل مروت کے پرائیویٹ گارڈ نے مزاحمت کی جس پر اسے بھی گرفتار کرلیا گیا۔

پولیس شیر افضل مروت کو لیکر روانہ ہوگئی ہے، رہنما تحریک انصاف کو 26 نمبر چونگی پر بدنظمی اور جلسہ مقررہ وقت پر ختم نہ ہونے پر گرفتار کیاگیا۔

اسلام آباد پولیس نے بتایا کہ جلسے کے بعد زرتاج گل،عمر ایوب اور دیگر کو بھی گرفتار کیا جائیگا، شیر افضل مروت کو تھانہ کوہسار منتقل کیا جائے گا۔

پولیس آخری اطلاعات آنے تک پاکستان تحریک انصاف کے دیگرارکان کے باہر آنے کا انتظار کررہی ہے تاکہ ان کی گرفتاری بھی عمل میں لائی جاسکے۔

ذرائع نے بتایا کہ شیرافضل مروت کو تھانہ کوہسارمنتقل کیا جائےگا، پی ٹی آئی رہنماؤں کیخلاف جلسہ این اوسی کی خلاف ورزی پر ایف آئی آرز درج کی گئی۔

زرتاج گل، عامرمغل، شعیب شاہین ، عمرایوب اور شیر افضل مروت ایف آئی آر میں نامزد ہیں، پی ٹی آئی کی سیمابیہ طاہر اور راجہ بشارت سمیت 28 رہنما نامزد ہیں۔

پولیس نے بتایا کہ جلسہ مقررہ وقت پر ختم نہ کرنے اور روٹ کی خلاف ورزی پر 3 مقدمات درج کیے گئے، زرتاج گل، عمر ایوب اور دیگر کو بھی گرفتار کیا جائیگا، اسلام آباد پولیس کو پی ٹی آئی کے دیگرارکان کے باہر آنے کا انتظار ہے۔

رہنما پی ٹی آئی نثار جٹ نے کہا کہ تمام اراکین اسمبلی گاڑیوں میں بیٹھے ہیں اور پولیس باہر کھڑی ہے، ہمارے پاس جلسے کیلئے این اوسی موجود تھا،

دریں اثنا اسلام آباد پولیس نے پی ٹی آئی رہنما شعیب شاہین کو بھی گرفتارکرلیا ہے، شعیب شاہین کو ان کے گھر سے گرفتار کیا گیا ہے، شیر افضل مروت کی گرفتاری کے بعد پی ٹی آئی کی لیڈرشپ مرکزی دروازے سے واپس ہوگئی۔