Author: ذولقرنین حیدر

اسلام آباد : جماعت اسلامی اور پی ٹی آئی کے احتجاج کی کال پر شہراقتدارمیں ریڈ زون کو کنٹنیر لگا کر سیل کرکے داخلی راستے بند کر دیئے گئے۔

تفصیلات کے مطابق اسلام آباد میں جماعت اسلامی اور پی ٹی آئی کے احتجاج کی کال پر شہراقتدار میں ریڈ زون کو کنٹنیر لگا کر سیل کر دیا گیا ہے۔

ایکسپریس چوک اور نادرا چوک بھی ٹریفک کے لئے بند کردیئے گئے, صرف متعلقہ افراد کو ہی ریڈ زون جانےکی اجازت دی جاری ہے جبکہ شہر کے داخلی اورخارجی راستوں پر پولیس اہلکار کی تعینات ہیں۔

راولپنڈی میں بھی انتظامیہ اور پولیس نے فیض آباد کے مقام پر کنٹینرز لگادیئے ہیں جبکہ اور مرکزی شاہراہوں کو کنٹینرز اور رکاوٹیں کھڑی کر کے بند کر دی گئی ہے، جس کی وجہ سے ٹریفک بری طرح متاثر ہے اور شہریوں کو مشکلات کاسامنا ہے۔

پنجاب اور اسلام آباد میں گذشتہ روز سے دفعہ ایک سو چوالیس کا نفاذ کردیا گیا ہے جو اٹھائیس جولائی تک نافذالعمل رہے گی۔

ترجمان جماعت اسلامی اسلام آباد عامربلوچ کا کہنا ہے کہ جڑواں شہروں اورداخلی راستوں کی بندش فسطائیت ہے، عوام کومشکلات سےدوچارنہ کریں،راستےکھولےجائیں۔

ان کا کہنا تھا کہ ہماری جنگ حکمران طبقےسےہے،عوامی راستےبندنہیں کرناچاہتے، دھرناہر صورت ڈی چوک میں ہی ہو گا۔

خیال رہے بھاری بھرکم ٹیکسوں اورمہنگی بجلی کےخلاف جماعت اسلامی کا آج اسلام آباد میں دھرنا ہے ، امیرجماعت اسلامی حافظ نعیم الرحمان نے خبردار کیا ہے کہ اگرہمیں روکا گیا تو حالات خراب ہوں گے، ذمے دارحکومت ہوگی۔

اسلام آباد : پی ٹی آئی سیکریٹریٹ پر پولیس کے چھاپے کی وجہ سامنے آگئی، حکام نے بتایا کہ پی ٹی آئی کے ڈیجیٹل میڈیا مرکز سے لوگوں کو بھڑکایا اور پروپیگنڈا کیا جارہا تھا۔

تفصیلات کے مطابق پولیس حکام کی جانب سے بیان میں کہا گیا ہے کہ قانون نافذکرنیوالےاداروں نے پی ٹی آئی سیکریٹریٹ پر شواہدکی بنیاد پرچھاپہ مارا، پارٹی دفتر میں ڈیجیٹل میڈیا مرکز انٹرنیشنل ڈس انفارمیشن کا حب بنا ہوا تھا۔

پولیس نے بتایا کہ چھاپہ پی ٹی آئی انٹرنیشنل سوشل میڈیا ایکٹیوسٹ کی جانب سے دی گئی معلومات پر مارا گیا، پی ٹی آئی کے ڈیجیٹل میڈیا مرکز سے لوگوں کو بھڑکایا اور پروپیگنڈا کیا جا رہا تھا۔

حکام کا کہنا تھا کہ قانون نافذ کرنیوالےاداروں نے پروپیگنڈاکرنیوالے ملوث لوگوں کو گرفتارکیا۔

اس سے قبل اسلام آبادپولیس نے پی ٹی آئی رہنما رؤف حسن کی گرفتاری کی تصدیق کرتے ہوئے کہا تھا کہ بیرسٹر گوہر کی گرفتاری کی خبر درست نہیں۔

اس دوران پولیس نے پی ٹی آئی کے مرکزی دفتر سےکمپیوٹراور ریکارڈ ضبط کرلیا ہے۔

اسلام آباد : چیئرمین پی ٹی آئی بیرسٹر گوہر کی گرفتاری پر اسلام آباد پولیس کا مؤقف سامنے آگیا۔

تفصیلات کے مطابق اسلام آباد پولیس نے پی ٹی آئی کے مرکزی دفتر سے چیئرمین تحریک انصاف بیرسٹر گوہر کی گرفتاری کی خبروں کی تردید کردی۔

پولیس ذرائع نے کہا کہ چیئرمین پی ٹی آئی کی گرفتاری کی خبر درست نہیں، صرف رؤف حسن کو حراست میں لیا ہے۔

پولیس نے پی ٹی آئی کے مرکزی دفتر سےکمپیوٹراور ریکارڈ ضبط کرلیا تاہم پی ٹی آئی سیکریٹریٹ کے اطراف انٹرنیٹ سروس بھی متاثر ہے۔

یاد رہے اس سے قبل خبر تھی کہ اسلام آباد پولیس کی بھاری نفری پی ٹی آئی کے مرکزی سیکریٹریٹ پر پہنچی اور چیئرمین پی ٹی آئی اور پارٹی ترجمان کوحراست میں لے لیا ہے۔

بعد ازاں سینیٹ میں اپوزیشن لیڈر شبلی فراز نے دونوں کو حراست میں لینے کی تصدیق کرتے ہوئے کہا تھا کہ پولیس والے دونوں کوساتھ لے گئے ہیں، وجہ نہیں بتائی، ان کے موبائل فونزبھی لے لیے ہیں۔

اسلام آباد : پولیس کی بھاری نفری نے پی ٹی آئی سیکریٹریٹ کو گھیرے میں لے لیا، سیکریٹری اطلاعات رؤف حسن مرکزی سیکریٹریٹ میں موجود ہیں۔

تفصیلات کے مطابق پولیس کی بھاری نفری پی ٹی آئی کے مرکزی سیکریٹریٹ پر پہنچ گئی ، بیرسٹر گوہر ، سیکریٹری اطلاعات رؤف حسن مرکزی سیکریٹریٹ میں موجود ہیں۔

پولیس کی نفری نے پاکستان تحریک انصاف کے سیکریٹریٹ کو گھیرے میں لے لیا ہے ، اسلام آباد پولیس کیساتھ خواتین اہلکار بھی موجود ہیں۔

ذرائع کا کہنا ہے کہ پولیس نے عدالت سے مرکزی سیکریٹریٹ کے سرچ وارنٹ بھی حاصل کر رکھے ہیں۔