Author: ذولقرنین حیدر

لاہور: پنجاب حکومت نے وزیر اعلیٰ خیبرپختونخوا علی امین گنڈا پور کو اڈیالہ جیل آنے سے روک دیا۔

اے آر وائی نیوز کے مطابق پنجاب حکومت کی جانب سے خیبرپختونخوا حکومت کو خط بھجوایا گیا ہے جس میں کہا گیا ہے کہ سیکیورٹی تھریٹ کی وجہ سے جیل میں ملاقات پر پابندی عائد ہے۔

خط کے متن کے مطابق وزیر اعلیٰ خیبرپختونخوا اپنا جیل کا دورہ منسوخ کردیں۔

خط میں کہا گیا ہے کہ اٹک، اڈیالہ، ڈی جی خان، میانوالی جیلوں کی سیکیورٹی بڑھا دی گئی ہے۔

آئی جی جیل خانہ جات کا کہنا ہے کہ تمام جیلوں میں دو ہفتے تک ہر قسم کی ملاقات پر پابندی عائد ہے، پولیس اور رینجرز کلیئرنس آپریشن کریں گے۔

علاوہ ازیں بانی پی ٹی آئی سے جیل میں ملاقات کی اجازت دینے کے فیصلوں کے خلاف اپیل دائر کردی گئی ہے، سپرنٹنڈنٹ اڈیالہ جیل اور کمشنر اسلام آباد نے الگ الگ اپیلیں دائر کی ہیں۔

اپیلوں میں جیل میں ملاقات کی اجازت دینے کے سنگل بنچ کا فیصلہ کالعدم قرار دینے کی استدعا کی گئی ہے جبکہ اپیلوں میں بانی پی ٹی آئی اور فیصل جاوید کو فریق بنایا گیا ہے۔

رجسٹرار اسلام آباد ہائیکورٹ نے اپیلیں کل سماعت کے لیے مقرر کردیں، چیف جسٹس عامر فاروق اور جسٹس طارق محمود جہانگیری سماعت کریں گے۔

پاکستان کی خفیہ ایجنسی انٹیلیجنس بیورو کو مکمل ڈویژن کا درجہ دے دیا گیا۔

اے آر وائی نیوز کے مطابق نگراں وزیراعظم انوار الحق کاکڑ کی منظوری کے بعد خفیہ ایجنسی انٹیلیجنس بیورو کو مکمل ڈویژن کا درجہ دینے کا نوٹیفکیشن جاری کردیا گیا ہے۔

نوٹیفکیشن میں کہا گیا ہے کہ انٹیلیجنس بیورو ڈویژن کیبنٹ سیکریٹریٹ کے تحت کام کرے گی۔

واضح رہے کہ پہلے انٹیلیجنس بیورو ڈپارٹمنٹ کے طور پر تھا جسے اب باقاعدہ طور پر ڈویژن بنایا گیا ہے، ڈی جی انٹیلیجنس بیورو سیکریٹری بھی ہوں گے۔

ذرائع کا بتانا ہے کہ یہ فیصلہ انٹیلیئجنس بیورو کے مالی معاملات مزید بہتر کرنے کے لیے کیا گیا ہے۔

وفاقی تحقیقاتی ادارے (ایف آئی اے) نے جعلی پاسپورٹ کے اجرا پر 7 افسران کو گرفتار کر لیا۔

تفصیلات کے مطابق افغانوں کو پاکستانی پاسپورٹ اجرا کے کیس میں پاسپورٹ اور نادرا کے 7 افسران کو گرفتار کیا گیا ہے جن میں 3 اسسٹنٹ ڈائریکٹر پاسپورٹ امیگریشن اور 4 نادرا افسران شامل ہیں۔

ایف آئی اے کا کہنا ہے کہ کارروائی میں 4 ایجنٹ اور 5 افغان شہری بھی گرفتار کیےگئے ہیں۔ یہ کارروائی نادرا حکام اور پاسپورٹ آفس کی شکایت پر کی گئی ہے۔

ایف آئی اے کے مطابق جعلی پاکستانی پاسپورٹ کا گروہ بین الاقوامی سطح پر سرگرم تھا۔ کیس میں اب تک 15ملزمان گرفتار کیے جا چکے ہیں جن سے تفتیش جاری ہے جب کہ مزیدگرفتاریوں کا بھی امکان ہے۔