Author: ذولقرنین حیدر

اسلام آباد : سوشل میڈیا پرعدلیہ کو بدنام کرنے والوں کے خلاف سخت ایکشن لینے کا فیصلہ کرلیا گیا، اگلے مرحلے میں عدلیہ مخالف مواد پھیلانے والوں کی گرفتاریاں متوقع ہے۔

تفصیلات کے مطابق عدلیہ مخالف نفرت انگیزمواد کی روک تھام کیلئے مشترکہ تحقیقاتی کمیٹی (جے آئی ٹی) کی میٹنگ ایف آئی اے ہیڈ کوارٹرز اسلام آباد میں ہوئی۔

جے آئی ٹی کی سربراہی ایڈیشنل ڈائریکٹر جنرل ایف آئی اے نے کی، حساس اداروں کے افسران نے پلان آف ایکشن سربراہ جے آئی ٹی کو پیش کیا۔

اجلاس میں سوشل میڈیا پر عدلیہ کو بدنام کرنے والوں کے خلاف سخت ایکشن لینے کا فیصلہ کیا گیا۔

جے آئی ٹی نے پی ٹی اے کو نفرت انگیز مواد پھیلانے والوں کی معلومات اکٹھی کرنے کے ساتھ ساتھ مواد اپلوڈ، شیئر اور کمنٹ کرنے والوں کی تمام تفصیلات حاصل کرنے کی ہدایت کردی۔

اگلے مرحلے میں عدلیہ مخالف مواد پھیلانے والوں کی گرفتاریاں متوقع ہے۔

اسلام آباد: ایف آئی اے نے جعلی شناختی کارڈ بنانے میں ملوث نادرا کے 4 سابق افسران کو گرفتار کرلیا۔

تفصیلات کے مطابق وفاقی تحقیقاتی ادارے ( ایف آئی اے) نے کارروائی کرتے ہوئے جعلی شناختی کارڈ بنانے میں ملوث 4 رکنی گینگ کو گرفتار کرلیا، گرفتار ملزمان نادرا کے سابق افسران ہیں۔

ایف آئی اے حکام کا کہنا ہے کہ گرفتار ملزمان نادرا میگا سینٹر اسلام آباد میں تعینات رہے، ملزمان نے دوران تعیناتی سال 2019 اور 2020 میں غیر ملکیوں کو شناختی کارڈ جاری کئے، ملزمان غیر قانونی طریقے سے احساس پروگرام کے نام پر مزدور طبقے کا بائیو میٹرک لیتے تھے اور فیملی ٹری میں افغان شہریوں کا اندراج کرتے تھی۔

حکام کا کہنا ہے کہ ملزمان دیہاڑی دار مزدور اور نشے کے عادی لوگوں کو افغان شہریوں کا والد ظاہر کرتے تھے، دوران تعیناتی گرفتار ملزمان نے متعدد شناختی کارڈز جاری کئے ملزمان نے شناختی کارڈ جاری کرنے کی آڑ میں بھاری رقوم وصول کیں۔

حکام کا مزید کہنا ہے کہ ملزمان کو گرفتار کر کے تفتیش کا آغاز کر دیا گیا دوران تفتیش مزید انکشافات متوقع ہیں۔

اسلام آباد: ملک بھر کی موبائل فون سمز بائیو میٹرک کرنے کے دعوے غلط ثابت ہوئے، سمز رجسٹریشن کیلئے انگوٹھوں کے جعلی نشانات استعمال ہونے لگے۔

تفصیلات کے مطابق پابندیاں سخت ہونے پر جعل سازوں نے بھی نت نئے طریقے ایجاد کرلئے، سمز رجسٹریشن کیلئے انگوٹھوں کے جعلی نشانات کے استعمال ہونے کا انکشاف ہوا ہے۔

رپورٹ میں انکشاف ہوا ہے کہ سیلیکون سے بنے انگوٹھوں پر نقش اتار کر سمیں رجسٹرڈ کرائی جاتی ہیں، 4 سال میں سیلیکون انگوٹھوں پر رجسٹرڈ 80 ہزار سے زائد سمز پکڑی گئیں۔

ایف آئی اے سائبر کرائم سرکل نے تفصیلی رپورٹ وزارت داخلہ میں جمع کرادی، رپورٹ کے مطابق جعل ساز ووٹر لسٹوں یا سستی اشیا کا جھانسا دیکر فنگر پرنٹ لیتے ہیں، فنگر پرنٹس سیلیکون انگوٹھوں پر نقش کرکے سم رجسٹرڈ کرائی جاتی ہیں۔

رپورٹ کے مطابق غیر رجسٹرڈ سمز دہشت گردوں کے زیر استعمال ہونے کا انکشاف ہوا، اس وقت بھی جعلی رجسٹریشن والی ساڑھے 3 ہزار سے زائد سمز فعال ہیں۔

رپورٹ میں بتایا گیا کہ 4 سال کے دوران 93 مقدمات درج جبکہ  193 افراد کو گرفتار کیا گیا ہے اس کے علاوہ بائیو میٹرک کرنے والی 294 جعلی ڈیوائسز  بھی پکڑی گئیں۔