Author: ذولقرنین حیدر

اسلام آباد: ایف آئی اے اینٹی کرپشن سرکل نے کارروائی کرتے ہوئے اغوا، غیر قانونی حراست اور بھتہ طلب کرنے پر اسلام آباد پولیس کے تھانیدار سمیت 5 اہلکاروں کو گرفتار کر لیا۔

ایف آئی اے نے پانچوں اہلکاروں کو ضمانتیں خارج ہونے پر گرفتار کیا۔ ملزمان میں سی آئی اے اسلام آباد کے اے ایس آئی رانا تسنیم، ہیڈ کانسٹیبل محمد بلال، مبشر الرحمان، شکیل احمد، اور کانسٹیبل عدیل احمد شامل ہیں۔

واضح رہے کہ ایف آئی اے نے معراج بی بی کی درخواست پر انکوائری اسلام آباد ہائی کورٹ کے احکامات پر شروع کی تھی۔

ایف آئی آر کے مطابق گرفتار پولیس اہلکاروں نے پرائیویٹ افراد کی ملی بھگت سے درخوات گزار کے پوتے کو غیر قانونی حراست میں رکھا، اس پر تشدد کیا اور بھتہ طلب کرتے رہے۔

اسلام آباد پولیس کے سی آئی اے آر ڈی یو کے ڈی ایس پی فیاض رانجھا، اے ایس آئی رن تسنیم احمد، عدیل احمد خان کانسٹیبل وغیرہ کے خلاف ابتدائی طور پر مقدمہ درج کیا گیا تھا۔

مقدمے میں امجد کانسٹیبل، شکیل اختر کانسٹیبل، مبین کوثر لیڈی کانسٹیبل، اظہر جاوید کانسٹیبل، محمد بلال کانسٹیبل، مبشر رحمان کانسٹیبل، عمر دراز کانسٹیبل اور آصف احسان اور بوٹا بھی نامزد تھے۔

ایف آئی اے کے مطابق ملزمان سے مزید تفتیش جاری ہے۔

اسلام آباد: اسرائیلی بربریت کے خلاف جماعت اسلامی اسلام آباد کی ریلی پر پولیس نے دھاوا بول کر قیادت اور کارکنوں کو گرفتار کر لیا۔

اسلام آباد پولیس نے سرینا چوک پر احتجاجی کیمپ اور ساؤنڈ سسٹم اکھاڑ دیے جبکہ امیر جماعت اسلامی نصر اللہ رندھاوا، ترجمان عامر بلوچ اور کاشف چوہدری سمیت کئی رہنماؤں اور کارکنوں کو گرفتار کیا۔

پولیس نے ریلی کے شرکا پر لاٹھی چارج اور شیلنگ کی جس کے ردعمل میں مظاہرین نے پولیس پر پتھراؤ کیا۔ پولیس اور کارکنوں کے درمیان جھڑپ سے سرینا چوک میدان جنگ کا منظر پیش کرنے لگا۔

جماعت اسلامی نے الزام لگایا ہے کہ پولیس غزہ مارچ روکنے کی کوشش کر رہی ہے، ہمارے رہنما گرفتار کر لیے ہیں۔ جماعت اسلامی کے رہنما میاں اسلم نے کہا امریکا سمیت دنیا بھر میں فلسطین سے اظہار یکجہتی کیلیے احتجاج کیا جا رہا ہے لیکن ہمیں احتجاج سے روکا جا رہا ہے۔

سراج الحق کا ردعمل

امیر جماعت اسلامی پاکستان سراج الحق نے اپنے ویڈیو بیان میں کہا کہ حکومت نے امریکی نائب وزیر خارجہ کے فون اور حکم پر غزہ مارچ کی اجازت نہ دینے کا اعلان کیا، دنیا بھر میں مظاہرے ہو رہے ہیں تو حکومت یہاں کیوں روکنا چاہتی ہے؟

سراج الحق نے کہا کہ میں خود اسلام آباد پہنچ رہا ہوں اور تمام لوگوں سے اپیل کرتا ہوں کہ کل اپنے مظلوم بھائیوں کی حمایت کریں اور غزہ مارچ میں شریک ہوں۔

انہوں نے کہا کہ اسلام آباد میں غزہ مارچ کی تیاریاں روکنا اور اسلام آباد کے امیر نصراللہ رندھاوا اور تاجر رہنما کاشف چوہدری کی گرفتاری انتہائی قابل مذمت ہے۔

ان کا کہنا تھا کہ نگراں حکومت اور ادارے کس کو خوش کرنا چاہتے ہیں؟ امریکا کے بعد کیا اب اسرائیل نوازی بھی ان کیلیے کوئی قابلِ شرم بات نہیں رہی؟

سراج الحق نے مطالبہ کیا کہ ہماری قیادت اور کارکنوں کو فوری طور پر رہا کیا جائے۔

امریکی سفارت خانے کے سامنے احتجاج کا اعلان

سراج الحق نے چند روز قبل اسلام آباد میں امریکی سفارت خانے کے سامنے 29 اکتوبر کو احتجاج کا اعلان کر رکھا ہے اور آج اسی سلسلے میں ریلی کا انعقاد کیا گیا۔

منصورہ میں پریس کانفرنس کرتے ہوئے امیر جماعت اسلامی پاکستان کا کہنا تھا کہ غزہ کے محاصرے کو 18 دن ہوگئے ہیں جہاں گولیوں کی بارش جاری ہے، 5 ہزار سے زائد افراد شہید ہو چکے اور اب تو جنازہ کو کندھا دینے کیلیے صرف مائیں اور بہنیں ہیں۔

ان کا کہنا تھا کہ 29 اکتوبر کو اسلام آباد میں امریکی سفارت خانے کے باہر غزہ مارچ کریں گے، تمام سیاسی جماعتوں کو دعوت دی ہے۔