Author: ذولقرنین حیدر

اسلام آباد: پراسیکیوٹر جنرل نیب جسٹس(ر)سید اصغر حیدر کے بعد ڈپٹی چیئرمین نیب ظاہر شاہ نے بھی استعفیٰ دے دیا تاہم استعفیٰ کی وجوہات معلوم نہ ہو سکیں۔

تفصیلات کے مطابق ڈپٹی چیئرمین نیب ظاہر شاہ نے استعفیٰ دے دیا اور اپنا استعفیٰ چیئرمین نیب کو بھجوادیا ہے۔

ذرائع نے بتایا ڈپٹی چیئرمین نیب ظاہر شاہ کے استعفیٰ کی وجوہات معلوم نہ ہو سکیں۔

یاد رہے اکتوبر 2021 کو صدر مملکت ڈاکٹر عارف علوی نے ظاہر شاہ کی ڈپٹی چیئرمین نیب تعیناتی کی حتمی منظوری دی تھی، اس سے قبل ظاہر شاہ بطور ڈی جی آپریشن نیب ہیڈ کوارٹر میں تعینات تھے.

خیال رہے دو روز قبل پراسیکیوٹر جنرل نیب جسٹس(ر)سید اصغر حیدر نے بھی استعفیٰ دے دیا تھا، ذرائع نے بتایا کہ پراسیکیوٹر جنرل نیب نے ذاتی مصروفیات کی وجہ سے استعفی دیا، ان کی مدت ملازمت مارچ 2024 میں مکمل ہونا تھی۔

فروری 2021میں پی ٹی آئی حکومت نےسید اصغر حیدرکو 3 سال کی توسیع دی تھی۔

اسلام آباد : وفاقی حکومت کا پنشن کیساتھ بینظیر انکم سپورٹ سے رقم وصول کرنے والے ملازمین کیخلاف کارروائی کا فیصلہ کرلیا۔

تفصیلات کےمطابق بینظیر انکم سپورٹ پروگرام میں کرپشن کے معاملے پر حکومت نے پنشن کیساتھ بینظیرانکم سپورٹ سے رقم وصول کرنے والوں کیخلاف کارروائی کا فیصلہ کرلیا۔

وزارت داخلہ نےبینظیرانکم سپورٹ پروگرام کی درخواست پر اداروں کو اجازت دے دی ہے، وفاقی تحقیقاتی ادارے کا کہنا ہے کہ تمام اداروں میں ریٹائرڈ ملازمین کی پروفائلنگ کی جائے گی اور جائزہ لیا جائے گا کون سے افسر پنشن اور بینظیرانکم سپورٹ سےرقم وصول کررہےہیں۔

ایف آئی اے نے مزید کہا کہ رقم بٹورنےوالوں کے خلاف مقدمات درج کئے جائیں گے اور ملازمین سے بینظیر انکم سپورٹ پروگرام کی رقم برآمد کی جائے گی۔

ایف آئی اے نےتمام زونل اسٹاف کی چھان بین شروع کر دی ساتھ ہی پولیس اور دیگر اداروں کو بھی جلد رپورٹ پیش کرنے کی ہدایت کردی ہے۔

یاد رہے اس سے پہلے بھی ایف آئی اے کئی سرکاری ملازمین پر مقدمات درج کر چکا ہے۔

اسلام آباد: چیئرمین پی ٹی آئی، شاہ محمود قریشی کے خلاف ایف آئی آر آفیشل سیکریٹ ایکٹ کے تحت درج ہوئی، ایف آئی آرسیکریٹری داخلہ کی مدعیت میں درج کی گئی۔

تفصیلات کے مطابق چیئرمین پی ٹی آئی، شاہ محمود کے خلاف درج ایف آئی آر کی کاپی اے آر وائی نیوز نے حاصل کرلی ہے، سابق وزیراعظم اور سابق وزیرخارجہ کے خلاف ایف آئی آر 15 اگست کو درج کی گئی تھی۔

ایف آئی آر میں چیئرمین پی ٹی آئی، شاہ محمود نامزد ہیں، اعظم خان اور اسدعمر کا بھی تذکرہ ہے، سائفر کے معاملے میں اعظم خان اور اسد عمر ملوث پائے گئے تو ان کے خلاف بھی کارروائی ہوگی۔

ایف آئی آر کے متن میں کہا گیا ہے کہ سابق وزیراعظم اور سابق وزیرخارجہ نے حقائق توڑ مروڑ کر پیش کیے، مذموم مقاصد کی تکمیل کے لیے سائفرکے مندرجات کے غلط استعمال کی سازش کی گئی۔

متن کے مطابق سابق وزیراعظم اور سابق وزیرخارجہ نے ریاستی مفادات کو خطرے میں ڈالا، 28 مارچ کو بنی گالہ اجلاس میں سائفر کے مندرجات کے غلط استعمال کی سازش کی گئی۔

اس سے قبل نگراں وزیرداخلہ سرفرازبگٹی کہا کہنا تھا کہ شاہ محمود قریشی کو سائفر معاملے میں گرفتار کیا گیا ہے، شاہ محمود کو ایف آئی اے نےگرفتار کیا ہے، شاہ محمود سائفر کیس میں نامزد تھے، سائفر کیس میں نامزد تمام افراد کو گرفتار کیا جائے گا.