Author: ذولقرنین حیدر

اسلام آباد : چیئرمین پی ٹی آئی اور ان کی اہلیہ کیخلاف نوسر بازی کا مقدمہ درج کرلیا گیا، مقدمے میں شہزاد اکبر،زلفی بخاری اور فرحت شہزادی بھی نامزد ہے۔

تفصیلات کے مطابق توشہ خانہ کیس میں چیئرمین پی ٹی آئی اور ان کی اہلیہ بشریٰ بی بی کے خلاف اسلام آباد میں فراڈ اور دھوکہ دہی کا مقدمہ درج کرلیا گیا۔

تھانہ کوہسار میں درج مقدمے میں شہزاد اکبر، زلفی بخاری اور فرحت شہزادی بھی نامزد ہے، مقدمہ تاجر نسیم الحق کی جانب سے درج کرایا گیا ہے، مقدمے کا مدعی جناح سپر گول مارکیٹ میں گھڑیوں کی خرید و فرخت کا کاروبار کرتا ہے۔

شہری نسیم الحق کی جانب سے تھانہ کوہسار میں درج کرائی ایف آئی آر کے متن میں کہا گیا ہے کہ چیئرمین پی ٹی آئی اور دیگر نے توشہ خانے کے تحائف بیچنے کیلئے ہماری دکان کا جعلی لیٹر ہیڈ اور دستخط استعمال کیا، گھڑی ، کف لنکس اور دیگر تحائف کی جعلی رسیدیں بنا کر ساکھ کو نقصان پہنچایا۔

مقدمے کے متن میں کہا گیا کہ میں نے نہ اس نے کبھی ایسی کوئی چیزیں خریدیں اور نہ کبھی بیچیں، چیئرمین پی ٹی آئی ، ان کی اہلیہ بشری بی بی ،شہزاد اکبر،زلفی بخاری، فرح اور دیگر افراد نے توشہ خانے کے تحائف بیچنے کیلئے ہماری دکان کا جعلی لیٹر ہیڈ اور دستخط استعمال کیا۔

مدعی مقدمے نے بتایا کہ انہوں نے نہ صرف جعلی رسیدیں بنائی بلکہ انہیں اصلی رسیدیں بنا کر پیش کیا جو آزادانہ تحقیقات سے معلوم ہوا کہ رسیدیں جعلی ہیں ، ہم متعلقہ حکام کو بار بار بتاتے رہے کہ یہ رسیدیں ہماری دکان سے جاری نہیں کی گئیں، ہماری دکان پر کام کرنے والے کسی بندے نے کوئی رسید نہیں دی۔

متن میں کہا گیا کہ حقائق واضح کرتے ہیں کہ ملزمان نے فراڈ اور دھوکہ دہی کا ارتکاب کیا ہے ، جس پر ان کیخلاف قانونی کاروائی ہونی چاہئیے۔

اسلام آباد : راول ڈیم میں زہریلا کیمیکل چھوڑنے سے ہزاروں مچھلیاں اور آبی حیات مرگئیں جبکہ ڈیم سے پانی پینے والے پرندے بھی تڑپ تڑپ کرمرگئے۔

تفصیلات کے مطابق راول ڈیم میں زہریلا کیمیکل چھوڑنے سے ہزاروں آبی حیات مرگئیں، مچھلیاں مرنے کے بعد مارکیٹ میں فروخت کی جانی تھی۔

زہریلے کیمیکل سے آبی حیات کیساتھ ڈیم سے پانی پینے والے پرندے بھی تڑپ تڑپ کرمرگئے، تاہم ضلعی انتظامیہ کی جانب سے راول ڈیم کے قریب سے دو مشتبہ افراد کو گرفتار کرلیا گیا ہے۔

یاد رہے راول ڈیم میں کرنٹ اور گرنیڈ کے ذریعے مچھلیوں کو مارنے کے پہلے بھی واقعات ہوچکے ہیں۔

خیال رہے کہ ماضی میں بھی ماہی گیر مچھلیوں کے شکار کے لیے راول ڈیم میں زہر ملاتے رہے ہیں، جس کی وجہ سے راول جھیل کا پانی زہریلا ہو جاتا ہے اور مقامی آبادی کی صحت کے لیے خطرناک ہو جاتا ہے۔

ڈیم کے پانی میں زہر ملانے میں مقامی افراد اور کشتی مافیا ملوث ہوتے ہیں ، جن کے خلاف کئی ایف آئی آر درج کی جا چکی ہیں تاہم ایف آئی آر درج کرائی جانے کے باوجود ملوث افراد کے خلاف کسی کارروائی کا نہ ہونا متعلقہ اداروں پر سوالیہ نشان بن گیا ہے۔

پانی میں زہر ملا کر ایک طرف اگر مچھلیوں کی نسلوں کو نقصان پہنچتا ہے تو دوسری طرف انسانوں کی صحت بھی خطرے سے دوچار ہو جاتی ہے۔