Author: ذولقرنین حیدر

وفاقی کابینہ نے سپریم کورٹ کے پنجاب میں الیکشن سے متعلق فیصلے کو مسترد کر دیا ہے اور کہا ہے کہ یہ فیصلہ اقلیتی ہے۔

اے آر وائی نیوز کے مطابق وفاقی کابینہ نے سپریم کورٹ کی جانب سے پنجاب میں الیکشن کے حوالے سے سنائے گئے فیصلے کو مسترد کرتے ہوئے کہا ہے کہ سپریم کورٹ کا فیصلہ اقلیتی ہے جو قابل عمل نہیں ہے۔

واضح رہے کہ سپریم کورٹ نے پنجاب میں الیکشن التوا کے خلاف پاکستان تحریک انصاف کی درخواست کی کئی روز سماعت کے بعد محفوظ فیصلہ سناتے ہوئے الیکشن کمیشن کے 22 مارچ کے فیصلے کا کالعدم قرار دے دیا ہے۔

سپریم کورٹ کے تین رکنی بینچ کے سربراہ چیف جسٹس عمر عطا بندیال نے فیصلہ سنایا اور الیکشن کمیشن کے 22 مارچ کے فیصلہ کالعدم قرار دیتے ہوئے کہا کہ الیکشن کمیشن کو اس فیصلے کا کوئی قانونی اختیار نہیں تھا، آئین اور قانون الیکشن کمیشن کوتاریخ میں توسیع کی اجازت نہیں دیتا۔

سپریم کورٹ نے معمولی تبدیلی کیساتھ انتخابی شیڈول بحال کردیا اور کہا الیکشن کمیشن کےغیر آئینی فیصلےسے13دن ضائع ہوئے، الیکشن پروگرام میں ترامیم کی جائے۔

سپریم کورٹ نے فیصلے میں کہا کہ پنجاب میں 14مئی کو انتخابات ہوں گے، کاغذات نامزدگی 10اپریل تک جمع کرائے جائیں جبکہ حتمی فہرست 19 اپریل تک جاری کی جائے گی اور انتخابی نشانات20 اپریل کو جاری کئے جائیں گے۔

سپریم کورٹ نے حکومت کو 10 اپریل تک فنڈز مہیا کرنے اور 21 ارب جاری کرنے کا حکم دیتے ہوئے الیکشن کمیشن کو فنڈ کی وصولی کی رپورٹ سپریم کورٹ میں جمع کرانے کی ہدایت کردی اور کہا فنڈز نہ جمع کرانےکی صورت میں عدالت مناسب حکم جاری کرے گی۔

خیبرپختونخوا میں الیکشن کے حوالے سے سپریم کورٹ نے فیصلے میں کہا کہ خیبرپختونخوا اسمبلی کے حوالے سے وکیل نے دلائل نہیں دیئے، خیبرپختونخواکے حوالے سے الگ پٹیشن دائر کی جائے، عدالت اس پر مناسب حکم جاری کرے گی،گورنرخیبر پختونخوا کے وکیل کیس سے الگ ہوگئے، خیبرپختونخوا الیکشن کے حوالے سےدوبارہ رجوع کیا جائے۔

سپریم کورٹ نے ہدایت کی کہ نگراں پنجاب حکومت ،چیف سیکریٹری ، آئی جی سیکیورٹی پرمعاونت کریں اور صوبائی حکومت بھی الیکشن کمیشن کےساتھ تعاون کرے جبکہ وفاقی حکومت آئینی ذ مہ داری پوری کرے اور ساتھ ہی الیکشن کمیشن کومکمل تعاون اور سہولت فراہم کرے۔

توشہ خانہ کیس میں نیب راولپنڈی نے پاکستان تحریک انصاف کے چیئرمین اور سابق وزیراعظم عمران خان کو کل طلب کر لیا ہے۔

اے آر وائی نیوز کو ذرائع سے ملنے والی اطلاعات کے مطاب قومی احتساب بیورو راولپنڈی نے پاکستان تحریک انصاف کے چیئرمین اور سابق وزیراعظم عمران خان کو توشہ خانہ کیس میں کل طلب کرلیا ہے۔

رپورٹ کے مطابق نیب نے عمران خان کو طلبی کا ثمن بھی بھجوا دیا ہے جس میں انہیں کل نیب راولپنڈی میں طلب کیا گیا ہے اور ساتھ ہی ہدایت کی گئی ہے کہ وہ اپنے ہمراہ اس کیس سے متعلقہ دستاویز بھی لائیں۔

نیب راولپنڈی کی جانب سے عمران خان کو طلب کیے جانے کا یہ دوسرا نوٹس ہے۔ اس سے قبل بھی پی ٹی آئی چیئرمین کو اس حوالے سے نوٹس دیا گیا تھا تاہم وہ پیش نہیں ہوئے تھے۔

واضح رہے کہ نیب لاہور نے توشہ خانہ کیس میں کل عمران خان کی اہلیہ بشریٰ بی بی کو بھی طلب کیا ہے۔

پاکستان تحریک انصاف کے چیئرمین اور سابق وزیراعظم عمران خان پر انسداد دہشتگردی کے تحت تھانہ سی ٹی ڈی میں مقدمہ درج کرلیا گیا ہے۔

اے آر وائی نیوز کے مطابق پاکستان تحریک انصاف کے چیئرمین اور سابق وزیراعظم عمران خان پر انسداد دہشتگردی کے تحت تھانہ سی ٹی ڈی میں مقدمہ درج کرلیا گیا ہے۔ یہ مقدمہ تھانہ رمنا کے ایس ایچ او کی مدعیت میں جوڈیشل کمپلیکس اسلام آباد میں عمران خان کی پیشی کے معاملے پر درج کیا گیا ہے۔

اس مقدمے میں عمران خان کے ساتھ پی ٹی آئی کے دیگر رہنماؤں علی امین گنڈا پور، مراد سعید، شبلی فراز، عمر ایوب، حسان نیازی، حماد اظہر، خرم نواز، فرخ حبیب، عامر کیانی، کرنل ریٹائرڈ عاصم، عمر سلطان اور اسد قیصر کو بھی نامزد کیا گیا ہے۔

تھانہ سی ٹی ڈی میں درج مقدمے کے متن میں درج ہے کہ ملزمان نے ملزمان نے جوڈیشل کمپلیکس کو چاروں طرف سے گھیرا اور اس کے شیشے بھی توڑے۔ سرکاری گاڑیوں اور پولیس ملازمین کی موٹر سائیکلیوں کو آگ لگائی گئی۔

ایف آئی آر کے مطابق ملزمان وائر لیس سیٹ، پستول، نقدی بھی چھین کر لے گئے۔ پولیس ملازمین سے 8 اینٹی رائٹ کٹس بھی چھینی گئیں۔

پی ٹی آئی کارکنان نے جوڈیشل کمپلیکس کا گیٹ توڑ کر اندر داخل ہونے کی کوشش کی اور کمپلیکس کو چاروں اطراف سے گھیر لیا، آہنی باڑ کو توڑا۔ اس دوران پولیس اہلکاروں پر تشدد بھی کیا۔ جلاؤ گھیراؤ کیا گیا اور جی الیون پر پولیس چیک پوسٹ کو آگ لگائی گئی۔

مقدمے میں مزید کہا گیا ہے کہ پولیس اہلکاروں پر پٹرول بم سے حملہ کیا گیا۔ تھانہ گولڑہ کے ایس ایچ او کی سرکاری گاڑی کو توڑا گیا۔ سرکاری گاڑی سے 9 ایم ایم پستول، وائرلیس اور 20 ہزار روپے چوری کیے گئے۔

ایف آئی آر میں بتایا گیا ہے کہ پولیس نے 38 پی ٹی آئی کارکنان کو گرفتار کیا اور ان کے قبضے سے پتھر اور پولیس پر حملے میں استعمال مواد برآمد کر لیا گیا۔