Author: ذولقرنین حیدر

اسلام آباد: جعفر ایکسپریس حملے کے بعد قومی اداروں کے خلاف ہرزہ سرائی پر وفاقی تحقیقات ایجنسی (ایف آئی اے) سائبر کرائم اسلام آباد نے 3 مقدمات درج کر لیے۔

ایف آئی اے نے مقدمات پیکا ایکٹ کے تحت صحافی احمد نورانی، شفیق احمد ایڈووکیٹ اور آئینہ درخانی کے خلاف درج کیے گئے، ان پر الزام ہے کہ انہوں نے پروپیگنڈے کے ذریعے عوام کو اداروں کے خلاف بھڑکایا اور کالعدم تنظیموں کو پروموٹ کرنے کی کوشش کی۔

پروپیگنڈے میں بھارتی میڈیا جو جعلی خبریں پھیلا رہا تھا اسے بھی پھیلانے کی کوشش کی گئی۔ ایف آئی اے سائبر کرائم کی جانب سے مزید اکاؤنٹس کی چھان بین کا سلسلہ جاری ہے۔

جعفر ایکسپریس پر حملے کے بعد سے ملک دشمن سوشل میڈیا اکاؤنٹس گمراہ کن، جھوٹا اور فیک پروپیگنڈا کرنے میں مصروف ہیں۔

ذرائع کے مطابق بھارتی سوشل میڈیا ایکٹویسٹ را اور کالعدم تنظیم بی ایل اے کے پیغامات پھیلانے میں مصروف ہے، بھارتی چینلز نے حملے کی بی ایل اے سوشل میڈیا اکاؤنٹ کی خبر دی جسے بھارتی اکاؤنٹس نے پھیلایا۔

بھارتی چینلز حسب روایت اے آئی (آرٹیفیشل انٹیلیجنس) سے بنی ویڈیوز اور تصاویر کا سہارا لے کر پروپیگنڈا کر رہے ہیں، جعلی ویڈیو بھارتی اور مخصوص جماعت کے اکاؤنٹس پر جاری کی گئی جو 2022 کی ایک فلم کی ہے۔

ذرائع نے بتایا کہ بھارتی میڈیا کے بے بنیاد پروپیگنڈے کے ساتھ مخصوص سیاسی جماعت سے جڑے اکاؤنٹس بھی حصہ لے رہے ہیں اور مخصوص سیاسی جماعت اور بھارتی میڈیا ریسکیو آپریشن میں مصروف افواجِ پاکستان کے خلاف زہر اگل رہے ہیں۔

لیبیا کشتی حادثے میں ملوث انتہائی مطلوب انسانی اسمگلر کو ایف آئی اے نے کارروائی کرتے ہوئے گرفتار کرلیا۔

اے آر وائی نیوز کے مطابق ایف آئی اے کوہاٹ زون نے ملزم عامر حسین کو پاراچنار سے گرفتار کیا، ملزم کی گرفتاری کے لیے انٹیلیجنس، جدید ٹیکنالوجی کو بروئے کار لایا گیا۔

ترجمان کا کہنا ہے کہ گرفتار ملزم لیبیا کشتی حادثے میں ملوث ہے، ملزم شہریوں کو سمندر کے راستے یورپ بھجوانے میں ملوث ہے، ملزم عامر حسین ایف آئی اے کو فروری 2025 کشتی حادثے میں مطلوب تھا۔

ملزم نے متاثرہ شہری نصرت حسین کو یورپ بھجوانے کے لیے 37 لاکھ روپے بٹورے جبکہ بھاری رقم بینک اکاؤنٹ میں وصول کی تھی، ملزم نے دیگر ساتھیوں سے مل کر شہریوں کو لیبیا سے اٹلی بھجوانے کی کوشش کی۔

ایف آئی اے ترجمان کے مطابق ملزم کے دیگر ساتھی منیر، احمد، شاہ فیصل، واجد علی نیٹ ورک چلا رہے ہیں، ملزم عامر نے کشتی حادثے کے دیگر متاثرین سے بھی بھاری رقم وصول کیں۔

ترجمان کا کہنا ہے کہ ملزم کی گرفتاری کے لیے اس سے قبل بھی متعدد بار چھاپے مارے گئے، ملزم کو گرفتار کرکے تفتیش کا آغاز کردیا گیا ہے۔

ایف آئی اے کا کہنا ہے کہ دیگر ملزمان کی بیرون ملک سے گرفتاری کے لیے انٹرپول سے رابطے ہیں، کشتی حادثات میں ملوث عناصر کے خلاف کریک ڈاؤن جاری ہے، انسانی اسمگلنگ نیٹ ورک کے خلاف کارروائیاں تیز کردی گئی ہیں۔

ترجمان کا کہنا ہے کہ انسانی اسمگلنگ کے خلاف زیر ٹالرنس پالیسی پر عمل جاری ہے انہیں قانون کے مطابق سخت سزائیں دلوائی جائیں گی، بین الاقوامی سطح پر انسانی اسمگلنگ کے نیٹ ورک کو جڑ سے ختم کیا جائے گا۔

اسلام آباد: وفاقی تحقیقات ایجنسی (ایف آئی اے) امیگریشن نے اسلام آباد ایئرپورٹ پر بڑی کارروائی کرتے ہوئے پاکستانی لڑکیوں کو چین اسمگل کرنے والا منظم گروہ پکڑا گیا۔

ایف آئی اے ترجمان نے بتایا کہ پاکستانی لڑکیوں کو چین اسمگل کرنے والے گروہ کے 3 ملزمان گرفتار کیے، ملزمان نے شادی اور ملازمت کا جھانسہ دے کر لڑکی کو اسمگل کرنے کی کوشش کی۔

ترجمان کے مطابق گرفتار ملزمان کے ساتھ مسافر پاکستانی خاتون کو بھی حراست میں لے لیا گیا، ملزمان کی شناخت شوگئی یوسف، عبدالرحمان اور محمد نعمان کے نام سے ہوئی، منظم گینگ میں متعدد خواتین بھی شامل ہیں۔

ملزمان غریب لڑکیوں کو چینی شہریوں سے شادی پر آمادہ کرتے ہیں، لڑکیوں کا ڈیٹا اور دستاویر عبدالرحمان اور محمد نعمان نامی ایجنٹوں کو دیتے ہیں، ملزم عبدالرحمان اور محمد نعمان چینی ایجنٹ پاول کے ساتھ سازباز کرتے ہیں۔

ایف آئی اے نے بتایا کہ پاول نامی ایجنٹ بھاری رقوم کے عوض چینی کلائنٹ کا بندوبست کرتا ہے، ملزمان نے متاثرہ لڑکی کی والدہ سے 10 لاکھ روپے میں معاملات طے کیے، ملزمان نے متاثرہ لڑکی کی والدہ کو ڈیڑھ لاکھ روپے کی ادائیگی کی۔

ملزمان کو انسداد انسانی اسمگلنگ اسلام آباد منتقل کر دیا گیا۔